真·後現代末世純手寫校愛網小《交叉仔傳記》: 2K227

我：「明嘅…如果…假設我係咁追阿花，應該都有得食。」
Q：「如果佢夠秤，我早就讓返間屋畀你啦，我無咁好心會幫佢保護貞操，佢發姣係佢嘅事。」
我：「乜…妳真係覺得佢…好發姣咩？」
Q：「吓，擺到明呀，佢幾個姐妹都差唔多啦，如果唔係Myth點會喺我隔籬暈下暈下咁喎，但正常嘅，青春期，求偶期吖嘛，上年韻婷咪又係對住你發姣…只不過姣呢隻字唔配合佢人設啫，正如我都唔會話易汪發姣，因為佢根本就喺度玩嘢，重成日喺度同我講笑，話諗緊你會唔會射精入去我哋隻襪入面，因為射一次就無得再用…」
我：「我都唔鍾意，黐埋去實俾佢玩死。」
Q：「講你就叻，如果佢撩你上床，睇下你點忍。」
我：「咪咁自信啦，我晚晚對住妳，已經展現出好好嘅忍耐力，我諗妳…可以對我有返啲信心。」
Q：「你而家梗係咁講，過多幾年先再評估吧啦。」
呢個QQ挑通眼眉，不過幾年後，可能妳都…
始終身邊有太多活生生嘅例子，Angel，欣姐，思韻條仔…全部都有唔太正常嘅感情生活同肉體關係。




我：「呀，係呢，嚟緊我哋會經過一條幾特別嘅隧道。」
Q：「係咩，我淨係覺得你想帶我行去啲危險嘅小路。」
我：「咪玩啦，妳裸體瓹入我被竇都未危險，而家走嚟擔心…真係搵嚟講，咪話咗呢條路得好少人識行。」
Q：「講笑咋，第一，由一開始已經唔驚，第二，咪應承咗畀你囉，不過呢，你要繼續對我好㗎。」
我：「知喇…嗱，已經到咗隧道，我哋上面就係路軌。」
Q：「嘩！好靚喎！」唔知點解，呢度嘅牆係畫咗粉紅色嘅櫻花，可能政府想令條隧道感覺無咁陰深。
我：「好靚咩，其實我一直都覺得有少少恐怖。」
Q：「點會呀，畫啲花花喺度幾好睇吖。」
我：「唔知…可能睇得日本動漫多，見到樖樹就會諗起有女學生喺度上吊，加埋徐步高同啲差佬當年都係經過呢啲偏僻嘅隧道先會瓜柴。」
Q：「…，你個腦裝埋咁多無謂嘢，點解唔好好地讀書呢？難得一場嚟到，幫我影返幾幅相啦。」




我：「係咪要女鬼風格嘅？麻煩企喺樖樹下面吖。」
Q：「鬼你個頭呀！係櫻花樹下的女神。」
調返轉嚟講，港女隨時重難應付過女鬼…而每次幫佢影相我係絕對唔會入鏡嘅，但明明全世界都知我同佢好熟。
或者…可以同佢影合照嘅，就只係得商業合作對像，同埋有男朋友title嘅物體，雖然佢IG都係見唔到佢EX。
Q：「嗯…啲顏色奇奇怪怪，返去要執執。」