真·後現代末世純手寫校愛網小《交叉仔傳記》: 2K240

U：「妖，你完全信唔過呀！幾多張枱又唔諗，坐邊又唔知，我同你一齊過去問！起身！」
豬：「早知係咁我哋唔使嚟啦，妳一個實乜都搞得掂。」
U：「一日都係你呀，本身就應該要由你安排好嘅…」
的確…我哋個個都驚咗女班長，完全唔明點解同佢獨處嗰陣可以變咗第二回事…食餐飯啫，是是但但使乜咁躁…
我同佢行咗出去收銀枱，馬叔叔都估到我哋嚟食飯係有嘢搵佢㗎喇，詳情無謂講，全程基本上就係天王星一輪嘴…結果就係將最入個龍鳳位間咗畀我哋，罕有咁推三塊十二人枱嘅圓板出嚟，但就要我早一晚落去自己set場…
豬：「搞掂晒嗱？」佢已經清完碟飯…
U：「坐位安排好，你哋諗下食乜啦。」
豬：「乜係咁嘅咩…做乜唔成圍嗌呀？」
U：「唔係無諗過，但貴呀，同埋經理話晏晝主廚未必喺度…所以散嗌啦，學生價七五折，咁樣重開心啦。」
豬：「咁就…交畀佢啦！佢肯定連餐牌都識倒轉嚟背。」




我：「邊有咁嚴重喎，我負責切特價點心紙㗎咋。」
健：「其實我想問下，啲特價點心係咪真係有平到㗎？」
我：「午餐紙大概八五折，下午茶嗰張就七五折。」
健：「哦，即係我哋學生價可以用下午茶個價嚟食。」
我：「唔同㗎，下午茶嗰張唔會有蝦餃，如果你單點嘅話就係九折，可能重貴過午餐嗰張雙拼點心。」
U：「玩夠未！快啲諗食乜！唔好喺度計嗰一蚊幾毫。」
我：「但係應該點嗌？點心？小菜？炒粉麪飯？」
U：「聖誕節，咪大食會咁，乜都有啲大家最開心。」
豬：「當係大家樂到會咁嗌咪得囉，無火雞咪炸子雞，燒味拼盤，炸嘢一樣有咖哩角春卷…咪加埋鹹水角，然後一人一粒蝦餃同燒賣，三文治變叉燒包，其他你哋諗。」
我：「呀！呢度甜品有芒果布甸同椰汁糕！」




U：「主菜都未諗掂，做乜咁在意甜品？」
健：「方唔係…某個人鍾意食咩，唔通係妳？」
U：「吓，我對甜品嘅興趣唔係好大，雖然都會食。」
我：「佢鍾意食嘅係燒鵝髀。」
U：「咪亂噏呀！家陣同你好熟呀？唔好唔記得呢度係你地頭，快啲諗好晒後日要食啲乜！」
咁大個仔第一次對住酒樓全部餐牌係咁剔剔剔，除咗海鮮嗰張…點心每圍都成廿份，單單蝦餃同燒賣都去咗六份，小菜七八樣，至於炒粉麪飯呢…
馬：「你哋嗰日…應該唔諗住飲茶㗎啦？」佢突然飄埋嚟…
我：「馬叔叔，係咪…免茶可以平啲呀？」
馬：「茶嘅話，你自己沖都得啦，嗰啲唔係乜錢嚟，不過呢…我見你哋啲學生都係鍾意轉汽水。」
我：「啊，OK呀，即係好似而家咁樣一人一罐？」