真·後現代末世純手寫校愛網小《交叉仔傳記》: 2K239

U：「如果無人反對就拍板啦！一陣放飯好謦掂佢。」
我：「喂…喂…有無人可以顧下我嘅感受…」
易：「你咁叻仔識返工搵錢，呢啲easy job啦！」
講下講下，原來班主任節都完埋，先生係出面等緊…
唉…點解又要攪著我喎，其實呢我就唔介意做下粗重嘢嘅，但點解要搵我去打點活動，衰咗又賴晒我。
F：「喂，後日有乜好嘢食就靠晒你喇！」
K：「辛苦晒，咁我就等開餐喇。」妳哋班女…
不過呢…其實咁大間酒樓要容納晒成班學生容乜易喎，都係卜定幾張枱然後一齊柴娃娃去食飯啫。算啦，話晒我咁受歡迎，身邊咁多女，為女人民服務下都應該嘅。
話咁快就到放飯，我梗拉埋隻傻豬落水。
我：「哎，班會主席，你會陪我去訂位㗎可？」




豬：「得，得，得…我唔會咁無骨氣嘅。」
我：「咁我問埋健仔一唔一齊食lunch先。」
U：「喂，咪咁急，等埋我先好唔好？」
我：「又點呀…咪話咗會幫手訂枱囉…」
U：「我嚟係要昅實你哋，點知會唔會搞到一鑊粥。」
豬：「吖，妳咁無信心不如自己做返啦，橫掂我呢個主席都係掛名㗎咋，唔好話康樂，連副主席都無個…」我唔知其他班會唔會咁，係我哋個班主任先會咁求祈。
U：「得啦，總之呢個lunch一齊謦掂佢。」
慕：「重使唔使…幫手咁？」隔籬重有K姐同契妹。
U：「唔使啦…四個人重搞唔掂咩，唔使咁大陣仗。」
慕：「咁拜托你哋喇，唔該晒。」我諗佢都係做下樣…




如是者，其他幾個女神就自己食，包括埋思韻。
認真講，我公司嘅午餐出品真係唔錯，只係礙於唔想喺公司食同無乜學生鍾意食酒樓所以好少嚟。四寶飯，咖哩牛腩飯，生炒骨飯，免茶位兼可以轉汽水，都係嗰啲啦。
U：「喂，你主要唔係嚟食飯㗎，幾時開工？」
我：「呢個…唔使咁急嘅，叔叔佢重埋緊單…」諗諗下，放飯嚟訂位其實只係就我哋，如果放咗學先嚟…又或者我平時返工嗰段時間落嚟大概會方便好多。
豬：「你喺度開工，過埋去幫手埋單咪得囉。」
我：「唔好玩啦，又有乜可能俾個細路仔去收錢呀…」
U：「我唔理呀，你好快啲同我搞掂佢，唔好拖到食完先嚟諗，陣間重要當值㗎！」
我：「知喇，知喇，訂位咋嘛，全班同學…三十四人…」
U：「你係咪發緊夢呀？Miss唔使食呀？！」
我：「咁…差一人啫，即係三十五啦。」




U：「頂你個…我哋重有個副班主任㗎，係咪想死？」
我：「即係三十六啦，應該無得再加…就咁。」