[hehe] [BL] [校園] 後備情人: 第十七章

拆禮物日，分組賽最後一輪比賽，我們明德雖然有副隊長Dennis因傷缺陣，但在代替他出任正選的Eddie交出十分加十個籃板的「雙雙」成績，而且Howard貢獻全場最高的二十分，球隊以十五分的差距擊敗被譽為今屆「黑馬」的榮傑大學，以四戰全勝的成績首名晉身四強。
 
康復出院的Dennis這場穿上一身便服坐在後備席，每當球隊搶到籃板或射入跳投的時候，他仿似忘記自己有傷在身，不止一次激動到跳起來，把坐在後備席的我們多次嚇到。到第三節的時候，副教練索性坐到他身旁，圖阻止他有過於興奮的慶祝動作，但似乎沒有什麼作用。
 
當Eddie在第四節末段射入兩球罰球，將自己的得分累積到雙位數，並協助球隊拉開比分至雙位數分差後被教練換下。
 
他回到後備席的時候，我把水遞給他，並拍了他的膊頭一下，以示自己對他的欣賞和佩服。
 
他接過水樽，說了句：「唔該哂！」
我：「勁喎，一先發就雙雙。」


Eddie：「OK啦，對面打小球，我好彩啫。」
 
這時，我們身後出現一把聲：「唔使咁謙喎，死仔！」
 
說話的是因傷未能上陣的Dennis。
 
Eddie：「咁係呀嘛。」
Dennis：「教練派你打正選，梗有你原因，你睇下呀Jack，打咗咁多年仲係唔識卡位搶板。」他指著場上剛未能搶下籃板的Jack。
 
不過對方搶下進攻籃板後欲再上籃，卻被Howard成功封阻。


 
我看到這一幕的時候，即使振臂歡呼，全場的氣氛亦升到最高點。
 
比賽完結後，我一如以往地拿起為George和Howard準備的水和毛巾，遞給他們。
 
主教練：「叻仔呀你哋，打得好好呀！」
George：「果然無鬆懈呀，做哂我哋做到嘅嘢！」
主教練：「無錯！大家可以休息幾日啦，四強會喺一月二號打，決賽同季軍戰就一月五號。我哋28號同30號都會有簡單訓練。今晚再通知大家詳情啦！」
副教練：「好啦，辛苦咗好多日啦，好好休息，唔好太hyper整傷自己，好似嗰個傻仔咁就喊到無謂啦。」
 


隊員間傳出一陣笑聲，Dennis也送上一個自嘲的笑容。
 
球隊在歡愉的氣氛下解散。在主教練請George和Dennis留下談些事情的時候，Howard把手搭上我膊頭，一同跟隨大隊進入更衣室。
 
我：「又廿分，想拎MVP咁話。」
Howard：「M唔MVP好小事啫，最緊要贏波拎冠軍。」
我：「咁霸氣嘅嘢係你先講得出口。」
Howard：「係架，今年係時候拎啦。」自信滿滿的語氣。
我：「得啦，你最勁啦，快啲沖涼換衫。」
Howard：「等埋我哋呀。」
我：「得啦，出出面等你。」
 
我無意留在焗促的更衣室，便返回場館的門口，打算找個位坐。
 
坐下還未夠兩分鐘，身邊就有人坐下來。我下意識地抬頭，發現是Ben。


 
我：「咦，你喺度嘅？」
Ben：「陣間五點到我哋嘛。你打完啦？」
我：「我邊有得打呀，不過贏咗啦。」
Ben：「出硬線都無出到你？」
我：「無呀，都係坐足全場。」我有點無奈地說。
Ben：「唔緊要啦，Year 1通常係咁。」
我：「嗯。你陣間都要加油喎。」
Ben：「多謝！咁我過去準備先啦。」
 
Ben說完這句，拍了拍我的肩膀後，便走向場館方向。
 
我望著他和隊友間融洽的相處，會心微笑一下。
 
此時，我身邊響起了一把聲音：「Kyle！」