我是一個學界的灰姑娘: 8. 林醫生的推薦信

當保安送走我舊同學之後，校長行到我面前，佢撓實雙手
 
「余家琪同學」
 
「係…係!!」
 
「妳剛先隻右手做乜野?我見妳想郁手係唔係?」
 
「係…係…」我係校長面前，只係一隻小羔羊
 




「點解要郁手?」
 
「因…因為…..其他人侮辱我唔緊要…但係侮辱我媽咪就一定唔得。佢好辛苦母兼父職先養大我…所以…」
 
呢個時候，訓導主任將我個File遞俾校長
 
「媽咪….佢個File」
 
「嗯!」
 




校長慢慢睇
 
「余家琪，連續3年北角官立小學全級第一，操行獎，優異生，小學三年級喪父，住係北角劏房，有小學老師同校長推薦信，仲有….」校長呆一呆後望住我
 
「仲有咩呀奶奶?」
 
「雪凝妳自己睇」
 
Miss Lam自己拎起我個File睇
 




「仲有西區林紹雄醫生推薦信….話佢有孝心…一個心地好好嘅學生…」
 
「林….林醫生寫俾我嘅推薦信?」
 
Miss Lam俾我睇一睇
 
「係林醫生寫俾北角官小，由妳學校送過黎」
 
訓導主任再問校長
 
「媽咪…妳要罰佢呀?」
 
「奶奶…」
 
兩位老師正想幫我求情




 
「頭先妳最後冇郁手，妳好好彩，最後一刻有個師姐幫妳擋左呢一劫」
 
「係…..係..」
 
然後校長對住操場大叫
 
「排球隊!!!!同我入黎!!!!」
 
校長一叫，一眾大師姐行哂入黎
 
「校長」「校長」
 
校長轉身望住佢地
 




「邊個將個波殺去人地塊面到?!」校長怒氣沖沖咁問
 
「係我」排球隊隊長自己一個行出黎認罪
 
「Florence妳返入去，果球波我好清楚係邊個殺出黎，成隊球隊只有佢可以殺到呢種波，妳唔好用隊長身份幫佢頂罪!!」
 
然後聽到一把我聽過嘅聲
 
「婆婆，係我」
 
係人堆中，小敏姐姐行左出黎
 
「係我殺個波埋去」
 
校長望住姐姐




 
「小敏，點解妳要咁樣做，妳係4號位，攻擊只限係球場上，點可以對準人地塊面打?」
 
「果兩母女乞我憎，婆婆妳教我地唔可以笑人地身世，唔可以睇唔起人」
 
校長聽到姐姐咁講，靜落黎
 
「雪凝!!!!」
 
「係!!奶奶」
 
「妳自己處罰個女」
 
「知…知道…」
 




校長好快再係到扮校工清潔，不過仍然係唔識用吸塵機
 
Miss Lam望住小敏姐姐
 
「小敏妳罰抄校規10次，今日之內交俾我」
 
「媽咪呀!!點解呀!!!」
 
「定係妳想我話俾爸爸知?」
 
「哦…」
 
好快，成班排球隊行左出去操場
 
兩個老師行過黎我到
 
「余家琪同學妳去影學生證同埋買書啦」
 
「知…知道…」
 
正當我行緊過去果時，校長叫左Miss Lam埋佢身邊
 
校長不停吩咐佢，Miss Lam亦不停點頭
 
然後，訓導主任叫停左我
 
「余家琪同學」
 
「係…訓導主任…」
 
「妳跟我出一出黎，去更衣室」
 
「係….」
 
更衣室內，Miss Cheung拎左兩套校服同運動服俾我
 
「妳試下啱唔啱身」
 
「係….」
 
我著上身，好啱我，仲有鬆，可以著幾年。而且件校服仲好新淨
 
「呢幾套校服妳拎去，係妳d師姐唔啱著嘅舊校服」
 
「知…知道….」
 
當我著住校服影完學生證後，將校服除低，校服上寫住
 
“F.1D 程詩敏”
 
呢幾套，係小敏姐姐嘅校服….袋入邊，仲有半打全新白襪