我是一個學界的灰姑娘: 103. 四大護法大戰四方城

就算去到校長屋企，我都係純如羔羊
 
係廳到，慧思同浩翹係到打遊戲機，而且仲打得好肉緊
 
「係…射佢射佢!!!係…..避開避開!!!」
 
慧思攬實個咕臣係到睇住浩翹打Resident Evil
 
「黎黎黎!!!爆佢頭!!!!」
 




係呢個角度望過去，慧思真係同Miss Cheung個樣一模一樣，可以話係一個小美人咁
 
今日佢仍然係扎起對孖辮
 
我四周圍望，唔見大白鯊嘅?
 
「Natalie，第一次黎校長屋企覺得好奇?」Miss Lam陪左校長一陣就過黎
 
「唔係呀，我覺得奇怪，慧思係到，但係Miss Cheung又好似唔見人咁」
 




Miss Lam問一問慧思
 
「Charlotte，媽咪去左邊呀?」
 
慧思擰個頭過黎「媽咪同Daddy兩個去行街啦，俾d空間佢地兩個啦」
 
「行街?」
 
「平時佢地咁忙，難得有時間佢地咪去拍下拖囉」
 




「妳唔悶咩?」
 
「唔悶架，有呢個人陪我玩就得」慧思捉實浩翹，然後繼續打打殺殺
 
「家琪，會唔會悶親妳呀?」
 
我當然話唔會啦「唔悶呀，睇住佢地兩個打機都好好睇」
 
「趁有得靜好靜下啦」浩揚係我身邊講
 
「點解呀?」
 
「孖女就到，佢地一黎到，連埋家姐就會好嘈架啦」
 
係孖女未黎到之前，我去左廚房跟Miss Lam學整野。每一次佢黎校長屋企，佢都會連同兩個工人姐姐一齊煮野




 
而今日我就成為左佢助手
 
每一個步驟，Miss Lam都慢慢講解我知道，我嘅廚藝又進步左
 
「叮噹!!」有人撳門鐘，工人姐姐去開門
 
門一打開，就已經聽到對孖女嘅笑聲
 
「婆婆!!」x2
 
然後出現佢地兩個嘅身影
 
同時候，小敏姐係廳到企起身再叫我過去
 




「咩事呀小敏姐?」
 
佢拎出左一箱麻雀
 
「黎啦，家琪，係時候俾大家見識下妳嘅實力啦」
 
實…實力?我打牌好渣架咋
 
不過就算係咁，我都依照小敏姐意思，坐低係麻雀檯邊
 
我地四大護法坐好之後，小敏姐就擲骰，牌局開始
 
見到我坐左埋麻雀檯嘅Miss Lam對我忠告
 
「Natalie，妳打完八圈覺得頭暈就俾Ethan代妳啦」




 
「頭暈?」
 
「係呀，呀…仲有，贏就妳嘅輸就Ethan嘅」
 
Ethan聽到之後就不斷抗議「點解呀!!!」
 
而Miss Lam俾佢嘅答案係
 
「你一個月幾多零用錢呀?家琪零用係你1/8咋!」Miss Lam真係幾錫我呢個學生
 
第一次四大護法係麻雀檯上決戰。真係一如Miss Lam所講，我可能會頭暈
 
因為孖女同埋小敏姐打麻雀嘅速度係好快，快到我差d睇唔到
 




「邪牌」「碰!」
 
「二萬」「上!」
 
我夾係三大高手之間真係慢少少都唔得
 
Ethan係我身邊睇住佢自己嘅投資
 
我好想同佢講，我都唔係羊牯黎架。而家南圈，我坐緊南位，而我手牌有好多都係番子
 
「紅中」我一見到後
 
「碰!」
 
「白板!」
 
「碰!」
 
然後我又摸中隻南。而家雙番南，其他人見到我咁多番子，大家都好小心，所以我已經打亂左佢地部署
 
然後我再摸….係發財
 
「自摸!小三元、雙番南、自摸對對糊、字一色….唔…」究竟幾多番呢
 
小敏姐見到之後就講「唔洗計啦!爆哂啦!」
 
好彩我地唔係打好大者……