從零開始的留班溝女生活: 7

一返到屋企乜都唔好諗，梗係即刻去做功課。當我拎返本暑期作業出嚟嘅時候。

我：「點解個樣咁鬼熟嘅，咁似我上年嗰本。」

一本又係咁兩本又係咁，三本暑期作業入面有兩本係同上年一樣，而家啲出版社真係懶，年年轉版班友仔咪要年年再去買過晒d答案。

今次真係好彩，上年d嘢冇拎去廢紙回收箱，仲喺我屋企嗰度煲緊醋。喺答案嘅加持底下我好快做曬功課（抄曬功課）

終於搞掂。見做到攰攰地，諗住玩陣電話食埋個飯就訓。點知一開機，就見到Amy搵我，睇下乜事先。



Amy：「可唔可以比我請你食lunch，你當俾我報答你今日幫左我。講明先呀，好多人恨都恨唔到同本小姐食飯。」

我：「ok呀，你想食乜先。」

Amy：「我平時自己整飯盒晏晝食，我諗住整埋你嗰份我請你食飯。」

我心諗：有靚女整啲愛心飯盒食咁正

我：「好啊，等我試下你啲手勢，希望唔會食完肚痛 」



Amy：「你食屎就會肚痛，如果你想肚痛嘅話使唔使我加料落去你嗰份度，噉你食完肚痛。」

我：「咁又唔使講下笑嗻，聽日見啦bye。」

佢直接已讀不回，send句byebye都懶。

「鈴……鈴……鈴……」鬧鐘響即刻彈起身，望到部電話。

我：「仆你個街！邊個整9我set個六點鬧鐘！」



係喎，朝早要過去Amy屋企樓下同佢返學。基於我唔知Amy佢幾點出門口，所以我就諗住七點都未夠就過去佢樓下等佢，咁樣實早過佢出門口，所以先set過六點鬧鐘。係就係辛苦左d，不過為咗我嘅終身幸福，少少辛苦算得d咩，正所謂「吃得苦中苦，方為人上人」。

熄咗個鬧鐘之後，即刻街過去廁所刷返個牙、洗返個面、剃返個鬚、梳返個頭。準備好用一個良好狀態去見Amy，著好前一晚已經燙好的校服，執埋個書包就出門口。

望一望隻錶，先六點半，平時呢個時間我仲喺度同周公捉緊棋。呢個時候個天都唔係特別高，睇嚟太陽都係啱啱升起，不過街上面已經有唔少人，絕大部份都係上班族，返工真係辛苦。

唔使幾分鐘，我就已經行到去Amy屋企樓下，咁啱經過間麵包鋪買個麵包咬下先，反正未食早餐（唔理解點解而家咁多人唔食早餐，作者自己就習慣咗每日都要食早餐）

喺嗰度企咗半個鐘，Amy終於出現，禮貌嘅我梗係即刻過去同人哋打聲招呼。

我：「Hi，Amy，咁啱嘅不如一齊返去?」

Amy：「好呀，乜你又係住呢度咩?」

我：「係啊，係咪估唔到先。」其實我呃9佢，我住喺隔離街，特登行過嚟就係為咗同你返學。



返學嗰一小段路我同佢又講有笑，我儘量避開尋日同埋佢之前，始終已經係佢唔好嘅回憶，無謂勾起人哋啲傷心嘢，不過佢死都唔肯講佢個愛心飯盒入面係咩，不過唔緊要反正好快就會知道。

返到去班房我哋返埋自己個位，今朝咁早起身真係好鬼攰，瞓一陣應該冇嘢嘅，希望朋友吹水唔好咁嘈。

「叮噹叮噹……叮噹叮噹」估唔到班同學仔佢哋嘅吹水聲竟然阻止唔到我瞓覺，就係畀你呢個死人鐘嘈醒我。

點知我一擘大眼，我見到Tina趴喺張枱度望住我。我頂！本身仲未醒，一開眼就見到你即刻精神曬，好彩頭先瞓覺無流口水，如果唔係實俾佢笑死。不過如果每日一起身都見到有靚女望住我都住真係幾正，d人朝早會飲杯咖啡提神，我覺得呢個效果唔係特別好，朝早睇靚女提神仲提神。