美好世界的沉思者/ADVANCING (重製): 20. 優美的"無韻"詩
「賢...我地...去邊度玩好呀？」呢個時候我地漫步於街頭，周邊幾乎所有鋪頭都冇開，街上亦都冇咩人。
「唔知。」
「咁我地去食飯好冇呀？」
「唔好。」
「咁...睇戲？」
「唔睇。」
「咁...咁...咁我地...唔好拖手好冇？」
「唔好。」
「好野！」佢歡呼咗一聲之後就即刻繞住我隻手帶住我行。
唉～俾佢陰到～
—————————————————
「你係咪唔記得咗我喇...」
「…唔好意思...」
「…」
佢非常之失落，一個人望住出窗，呢個時候我先認真去望住佢。
雖然只係望到佢嘅側面，但係我可以感受佢嘅美麗，充滿住仙氣，同阿雯比嘅話......但咁靚嘅女仔...我竟然唔記得咗？
「做咩眼甘甘咁望住我呀？我塊面有污糟？」佢望返過嚟就見到我望住佢。
「…唔係呀...你好靚之嘛～」
「我都知架喇～上到中學好多男仔追我～」
「咁好呀～咁你一定係拍緊拖！」
「冇喎～冇拍過拖！」
「冇？點解呀？冇靚仔？」
「有呀！」
「咁點解唔拍呀？！」
「唔話你知！冇記性！」講完佢就起身落咗車。
我就跟住佢尾一直行，穿過呢個樂園嘅大門口，繼續行，去到售票處。
「唔該兩張成人飛。」
「我俾啦～」我制止咗佢隻打算係袋到攞錢嘅手。
「唔使喇～我帶你嚟嘅。」
「嘩～好開心呀！好耐冇嚟過呢度玩喇～」
「幾耐呀？」
「都…有10幾廿年。」
「咁咪即係冇嚟過！」
「係呀～哈哈哈！」
之後我就尾隨住佢去到商店街度行，逐間逐間鋪頭行下睇下有咩值得買。而行行下俾我發現到有樣有趣嘅野，我諗咗陣就決定買咗佢。
出到去就見到曉彤係門口度左顧右盼，好似搵緊啲咩咁。
「做咩呀？搵緊啲咩呀？」我行到去佢側邊同佢一齊周圍望。
「你去咗邊呀？！搞到我好擔心呀！」
「去咗買野呀～」講完我就將我手上嘅頭飾帶上佢嘅頭上，而佢都即刻攞出手機照下自己。
「好靚好襯我！」
「嗯...你等我一陣！」
佢入返去頭先間鋪，過一陣佢就出返嚟，而手上都攞住個頭飾，不過就係男款。而佢都一樣將個頭飾帶上去我嘅頭上，然後我地就一齊自己咗張相。
「係度行咗好耐，要去玩喇！」講完我就拖起佢隻手一齊行入去樂園嘅深處。
我相信呢個係我對佢可以做嘅唯一補償。
—————————————————
全日入面我地就係個樂園度一直玩，睇表演，同埋食野。而曉彤佢就成日都好似個細路女咁歡呼雀躍，表情天真無邪；而我就好似個爸爸咁帶住佢周圍去玩，呀唔係，應該係被佢帶住去玩，因為成個樂園我都冇咩係特別想玩，而且嚟呢度都係佢嘅意願嚟。
而最後我地就企響樂園入面嘅一座城堡前面睇煙花匯演，欣賞住咁靚嘅煙花之後我地就同其他賓客一樣離開樂園返屋企。
「今日玩得好開心呀～好想再嚟玩呀～」出到樂園佢仲繼續大嗌。
「仲有機會嘅～」
「希望啦～希望下次...都係你陪我嚟。」
「…」
「今日要難為你一日，唔好意思。」佢鬆開咗我隻手。
「唔難為呀，可以同個靚女一齊拖住手玩成日，又可以見到佢最有童真嘅一面。」
「大個咗，把口都甜咗，識氹女仔。」
上到車之後佢好快就訓著咗，而我就係度盡力係度諗緊佢究竟係邊個，我小學嘅生涯當中...有個咁靚嘅女仔？
差唔多到站佢都自己醒咗，我地就一齊落去送佢返屋企。
「今日多謝你，拜拜。」
「我都好多謝你，曉彤，我記得返你喇～」
佢聽到之後先係一臉驚喜，然後淚眼汪汪，再衝上嚟攬住咗我。當刻其實我都唔識反應，但思考過後我都回以擁抱。
攬咗一陣之後，佢都鬆開手，望住我，
突然趷高腳錫咗我面一啖就轉身走咗。
而我就摸住我嘅左面，靜下頭沉思。
—————————————————
之後個幾日我爸爸媽媽都冇逼我出去應酬，所以我都係留係屋企食玩訓。咁嘅生活雖然係自由，但一耐咗都會悶，因為一成不變，每日做住一樣嘅野。
「叮咚～叮咚～叮咚～」
有人㩒鐘？
「叮咚～」個鐘聲再次響起。
「哈～」邊個咁早呀～我半開合住眼起身，拖住疲軟嘅身軀，打住呵欠落床行去門口。
「午安～」
「？」我捽咗捽眼再望多次我眼前呢個人。
「曉彤？！」見到佢竟然上咗嚟我屋企我成個人即刻醒晒。
「而家先醒？放假就訓到咁晏，同以前唔同晒。」
「點解...喂！喂！喂～」佢冇理到我直接就入咗去屋企。
「你刷個牙沖個涼先啦，我煮啲野俾你食，睇怕你都淨係食即食麵架喇～」
唉～而家睇嚟都冇得拒絕，唯有認命啦～我攞咗套衫就入去沖涼房度沖涼。
其實我仲一直思考緊關於曉彤嘅事，但並唔係佢究竟係邊個。關於呢個問題，我呢幾日已經水落石出咗。
佢真係我嘅小學同學嚟，而六年入面佢都一直坐係我隔離。唔單止咁，個時我地住得好近，每日都一齊返學放學，放假都會一齊玩。諗返起當時無憂無慮嘅生活...哈！
不過...而家有另一個問題纏繞住我，就係我同佢嘅關係，係咪只係咁？只係咁...佢而家見到我會咁興奮？同我去玩會咁玩到成個細路咁？會突登嚟我屋企煮野俾我食？
「呀！」呢個時候我聽到曉彤一下大叫。
「你冇事嘛？做咩呀？」我即刻諗都冇諗就沖去廚房。
「…我…我淥親隻手…」
「我攞燙火膏過嚟幫你搽。」
「唔該...」
「你唔好煮喇。」
「嗯。但係...你...」佢拎轉咗面，同時用手指咗指下面。
「！對...對唔住...」呢個時候我先驚覺我係赤裸全身，頭先太匆忙都唔記得咗，成個腦都係諗住曉彤。
我入返去熄返個花灑，抹乾個身換返衫就出返去，但仲見到佢仲煮緊野。
「我咪話唔好煮囉。」
「我一番心意嚟架，你唔鍾意呀？」
「咁好啦，小心啲。」見到佢咁講，又好似好慘咁，唯有接受囉～
我出返去廳度睇電視，而咁啱因為而家係假期，所以播緊港產片。睇咗陣之後，佢就攞住啲餸出嚟。
「等陣。」眼利嘅我發現到有啲唔妥。
我小心咁打開包係佢手指上嘅一張紙巾，紙巾之下係一個傷口，而家慢慢滲緊血，好彩嘅係唔係太深。我隨即帶上手套幫佢洗傷口再包好。
「唔該，唔好意思，煮餐飯都搞到咁。」
「唔好濕水，過兩日就拆得。」
「食飯喇。」我入去廚房攞埋淨低幾碟餸出嚟。
「煮得幾好食吖，唔錯！」
「真係架？！太好喇！」
「嗯！不過做咩無啦啦嚟搵我嘅？你又係點知我住邊架？」
「咁...我見咁悶，又知你係屋企冇野做，咪上嚟搵你囉。」
「我都係問我媽咪先知你住邊咋。」
食完飯之後我就攞晒啲碗去洗，而曉彤就自己一個係廳度睇電視。當我出到嚟就見佢一個坐係梳化度悶悶不樂咁望住手機。
過你屋企
「做咩咁嘅表情呀？」
「冇呀～係呀，頭先參觀過你屋企，幾靚。同埋你啲品味唔錯，鍾意呢隻錶。」佢指住係玻璃櫃入面一隻被好好安放嘅手錶。
「哦...隻錶...人地送架，唔係我買架。」
「邊個咁好送隻錶俾你呀？朋友？老師？」
「女朋友，上年生日送俾我架，錶底仲刻住我地嘅名。」
「哦～女朋友...」
「我...我醒起有啲事要做...走先喇...」
「我送你？」
「唔使喇～拜拜。」
「係呀...」出咗門口之後佢拎轉頭同我講。
「你真係成長咗好多，同小學嘅你唔同晒，好識照顧人。但係...都係一樣咁蠢...」
「同埋...冇記性...小學啲野你都係唔記得...」
講完佢就走咗，但係我仲未知佢講啲咩，可能就等如佢所講嘅咁；又可能有另一番嘅意思...