美好世界的沉思者/ADVANCING (重製): 21. 伊甸
時間話咁快就嚟到星期日，2月13日，假期嘅最後一日，聽日就要返返學。
今日亦都係我同阿雯新年後第一次見面，過咗成個禮拜，唔知佢變成點呢...
而家只係1點鐘，我約咗佢3點鐘上嚟，仲有兩個鐘，可以慢慢嚟。
我首先就執擺係我梳化嘅衫先，順便就睇下邊啲要，邊啲唔要。而係執嘅過程，我發現咗當中有啲衫我係著都冇著過，牌都仲未剪，買咗返嚟就放咗係度。真係好浪費，遲啲攞晒落去捐先～執下抖下再執再抖，原來不知不覺就已經兩點鐘。
「叮咚～」邊個呢？
「等我一陣！」我將啲衫一併擺入衣櫃一個一早準備好嘅位置就去開門。呢個位係我早兩日執出嚟，就係曉彤嚟個日。
當我一開門，眼前嘅境象實在意想不到！嚇到我差啲魂飛魄散。
「咁...咁早嘅？2點咋喎...」我戰戰兢兢打開門。
「諗住俾個驚喜你嘛～做咩呀？收埋咗啲不可告人嘅秘密呀？」
「唔係...」當然就唔係，不過就唔想俾你知道啫...
「你屋企咁亂嘅？！」
頭先嘅衫只係冰山一角，其實地下仲有衫、盒、袋等等...
「唉～唔緊要啦～反正都嚟早咗一個鐘...」
講完佢放低咗個袋就開始執，而我當然就唔會袖手旁觀，始終都唔好意思，始終我都係諗住自己執嘅...
之後啲野就整整齊齊地推放咗係客廳嘅一個角落，而啲衫都摺得靚靚仔仔放係我衣櫃入面。
「呼～搞掂！...之後記得自己執，我唔會成日都得閒過嚟同你執架。」
「點呀？咁耐冇見有冇掛住我先？！」
「有～」
「我去拜年個時呢～啲親戚問我『咁靚女，有冇男朋友呀？』，你知唔知我點答呀？」
「我答佢呢～『咁你打幾時抱孫呢？』。」
「哼！佢唔打你就有味。」
「咁你新年又有咩節目呀？又係屋企？」
「嗯...係呀，我都唔鍾意應酬。同埋我要諗同你一齊嘅節目！」
「咁有心思？咁...有咩節目呀？」
「而家出發咪知囉～」
—————————————————
落咗車我就直接帶住佢入去商場搭𨋢直上，一出到去行幾步路就可以見到有個好大嘅溜冰場～
「溜冰？我唔識架喎～」佢見到之後就好緊張捉實我隻手講。
「好易架咋，慢慢感受下就識架喇～」
我哋俾咗錢換晒裝備之後就慢慢扶住牆邊行入去溜冰場。
「我行先喇～」我講完就一支箭咁衝上去，留低佢係後面感受。
我兜咗幾圈，玩咗幾下花式返返嚟原位仲見到佢響度自己從跌倒中學習。
「仲未得呀？」我突登經過佢身邊同佢講，但未等佢答覆我就又走咗去lu～
再一次返返嚟我見到佢終於勉強前進到幾步。
「嚟啦，捉住我隻手。」我停低係佢前面向佢伸出援手，但佢冇捉住一特止，仲打我隻手。
「真係唔要？」
佢睥咗我一眼之後就唔甘心喧捉住我隻手，而我都慢慢咁帶住佢滑。
係經過我嘅一番教導後，佢終於可以順利滑到，而我都慢慢咁鬆開我隻手。
「喂！」
「你得架，相信自己。放心，我會一直係你隔離支持住你。」
佢失去咗我之後的確滑得冇咁好，但呢一切都係因為冇信心，唔相信自己。佢望咗我一眼，而我亦回以一個堅定嘅眼神，佢都開始放膽咁滑出去，並且係捉到我感覺之後，速度逐漸加快。我亦都同佢一齊以同一個速度同一個姿勢享受住呢份喜悅。
—————————————————
滑完之後我地就離開去食飯，但成程車入面佢咩都冇講，睇嚟就係嬲緊我頭先唔理佢。
「做咩唔理我呀？」
「唔好唔開心啦，我知錯架喇。」
「錫返喇。」
但係我呢一吻卻被佢一隻手擋住咗。
唉～或者落車個時佢會下咗啖氣，或者見到啲野食佢會下咗啖氣，或者見到份禮物...唔知啦，隨遇而安啦～
「放棄喇？」
「原諒返你喇～好冇。」
「緊係好架。」
「唔好再有下次喇，一啲都唔好玩，我頭先真係好徬徨。」
「嗯。咁錫返好冇？」
「你想錫呀？」我點咗下頭。
「見係你咋～嚟啦～」聽到之後我輕吻咗佢左面一下。
「咁到我喇！」佢伸咗個頭埋嚟錫咗我一啖。
「好攰！訓先！」講完佢就帶住甜絲絲嘅笑容合埋眼訓係我嘅右肩之上。
—————————————————
最後一站，食情人節晚餐。
「唔該book咗兩位，姓雲嘅。」講完侍應就帶咗我哋去埋邊嘅一張枱度坐。
「你哋係咪有情人節套餐架？」
「係呀，我攞個menu俾你。」
「唔好啦～你係咪唔記得咗我講咩呀？」
「我記得，但係俾次機會我揸主意啦好冇？」
「話晒都情人節，你都想食得特別啲，唔會想食返平時啲嘢架嘛。」
轉眼間，menu就到咗，我同阿雯睇咗一陣之後就落咗個二人餐，有齊前菜、湯、主菜、甜品。
食完飯我哋就一齊行去海旁，感受住海風，欣賞醉人景色，享受只屬於我哋兩個嘅甜蜜時光。
「呀！阿雯，你等我一陣間，我去個廁所先！」
「嗯！」
返嚟嘅時候我收埋對手係背後，一步一步咁行返去。從遠處望過去，就可以見到阿雯好乖咁企係海邊一個人望住個對岸嘅景色等我返嚟。
「阿雯！」
「嗯？返嚟喇？」
「今日開唔開心呀？」
「廢話！緊係開心啦！」
「我哋嘅第一個情人節，我都好開心。」
「阿雯，我愛你。」
「我都愛你！」
「雖然，仲未到正日。但係～情人節快樂！」
「同時，我哋拍拖一個月紀念日快樂！」
「送俾你！」我係背後攞出一支攻瑰花。
「係花？！」
「唔好意思，我...因為資金有限，所以...買唔到99枝，買住1枝頂住先。」
「唔緊要！我好鐘意！」此刻阿雯已經熱淚盈眶。
我哋亦都因此相擁咗一段時間。
「多謝你呀。」
「不過...我諗我攞唔到返去，我阿爸未知我拍拖架。」
「咁...我哋宜家一齊拎住枝花自拍，之後枝花又擺係我屋企？」
「嗯！」
我拎出手機，用大海的以及對岸嘅景色做背景，阿雯雙手緊緊捉住枝紅玫瑰，露出幸福，甜絲絲嘅笑容，我就一手拎住部手機，另一拎手搭住佢膊頭，同佢露出同樣嘅笑容。自此，呢張相就成為咗我哋兩個嘅手機背景畫面。