美好世界的沉思者/ADVANCING (重製): 22. 小夜曲
第二日，亦即係2月14號情人節正日。
呢一日情人嘅可以收到禮物，而冇情人嘅都可以趁住呢一日向鍾意嘅人表白，而且呢一日女仔都會整朱古力送俾自己鍾意嘅人，向佢哋表達自己嘅心意。
阿霆作為男神，當然係收到唔少女仔嘅朱古力啦！去到小息嘅時候，隔離班嘅女仔都走晒過嚟，每個人嘅目的都係送自己整嘅朱古力俾男神。
「有排佢食呀今次！」威威講。
「都唔係第一次架啦！之前連高form啲師姐都有呀！」
「所以之後佢最開心嘅就係呢一日唔使返學，又或者會扮病。不過第二日返到嚟都會收到架啦！」
我哋成個小息都冇理到阿霆，佢向我哋求救我哋都視若無睹。而我睇咗一陣花生都借尿遁行開咗，去搵我阿雯。
礙於我地係學校入面，所以我地都唔可以有啲太親密嘅行為，所以都只係一齊行下傾下計咁。
而食飯因為我哋係可以出去學校出面食嘅，所以我哋都會把握機會撐枱腳，食完就去一個冇人睇到嘅地方拍拖過二人世界，坐響度望住個天，拖下手仔，吹住風傾計。
返到學校我哋就分開。
「點呀？頭先去咗邊呀？」傑仔問。
「冇呀，有啲嘢做囉。」
「有嘢做？定係溝女呀？」
「乜呀？溝咩女啫？」
「得啦！睇到晒啦！」
「你同阿雯一齊行街食飯嘛，之後仲一齊上咗去停車場個天台...你哋唔會係情到濃時...」
「唔係，絕對唔係。btw，你地見到晒？」
佢哋一齊點咗點頭，並回以一個相當奸詐狡猾嘅微笑。
「係，我哋係一齊咗。不過你哋唔好講出去呀！得我哋五個知就好喇！」
「得啦～不過你出咗pool都唔講聲，好冇義氣喎～」
「咁你想點先？」
「最基本，出pool飯。」
「唔好食咗我隻車呀！」
「就食咗你隻車！」
食完飯就返上去課室係飯氣攻心嘅情況下繼續上堂，渡過地獄般嘅兩堂中文堂。
放學嘅時候阿雯同我講佢有啲野做叫我自己返去。
既然咁，我就緊係同我班朋友一齊走啦。
「傑仔，一齊走咯。」
「唔喇，我有嘢做呀。」
「咩呀？」
「佢整咗朱古力呀！」阿霆搭嘴。
「你做咩事呀？！」聽到我當堂大吃一驚。
「咩...咩呀？！唔得呀？！」
「得～邊個呀？」
「得咗再同你講。」
「咁我嚟個地成世都唔會知。」
之後我哋就等阿霆佢裝晒啲朱古力落袋之後就一齊走。
今日因為得我一個人走上歸家路，所以路途上都有啲寂寞有啲悶，但係一諗起今晚阿雯有驚喜俾我，我心情就激動起上嚟。
返到屋企我就執屋，然後就等阿雯嘅到來，因為我實在太期待，所以感覺上時間過得特別慢，等等下我都唔小心瞓著咗。
「叮咚！」「叮咚！」門鐘響起，我即刻從夢中醒過嚟，相信係阿雯嚟到喇！
我即刻9秒9起身衝去開門。
「你等我等到瞓著咗呀？」阿雯一見到我就笑住咁講。
「你梳下個頭先啦，我去煮飯。」
趁住阿雯係廚房煮嘢嘅時候，我都去浴室快快趣沖個涼。
今晚阿雯攞咗幾樣嘢上嚟，有3個袋，有一個係裝住今晚嘅餸，而今晚佢特別炮製咗牛排，仲要唔係普通嘅牛扒，而係特別切割過嘅心形牛扒，仲要係五成熟，充滿住肉汁，煮得比我煮嘅仲好食過百倍。
「好冇食呀？」
「人間美食！」
「咁跟住...」佢係第二個袋攞咗個盒出嚟，而個盒因為係透明，所以可以睇到入面嘅嘢。
呢個係一個紅玫瑰形狀嘅細蛋糕，完完全全係紅玫瑰，外面全部都係紅色，睇唔出入面係咩蛋糕。
「我特登去咗整呢個蛋糕，你覺得點呀？」
「好有心思，好靚，好完美！」
「同埋我知道你唔食甜嘢，所以就故意落少咗糖，我都試過，奶味一啲都唔重。」
「好貼心呀！完全了解晒我嘅喜好！」
「我哋嚟影張相先！」我哋就攞住部手機，一齊係蛋糕嘅後面自拍咗幾幅相。
影完相就緊係試吓個蛋糕味道如何。切開個紅玫瑰蛋糕之後，可以見到裏面同出面好唔同，清晰見到係一個有住紅色外表嘅朱古力蛋糕。
我用叉切開一細舊放落口慢慢品嘗，首先食到甜甜嘅士多啤梨味，相信係紅玫瑰嘅外表，接著就係濃郁嘅朱古力味，就係蛋糕嘅內在。至於甜度就啱啱好。
「會唔會太甜呀？」阿雯真係好為我著想，第一句唔係問我好唔好味，而係問甜度，睇嚟佢真係怕會甜親我。
「唔夠甜。」
「唔夠？」
「嗯。」然後我就含住啖蛋糕向前吻向阿雯嘅嘴唇。
佢先係嚇一嚇，然後就配合我。
「咁樣就夠甜啦！」
「哼！鬼馬！」
「係架～唔係點會有機會呢？」
「我仲有一份禮物俾你！」佢講完就係第三個袋攞出一個盒出嚟。
「打開佢吖！」
我聽佢講慢慢打開個盒，入面係一盞小夜燈。
「鐘唔鐘意呀？」
「嗯...鐘意！」
「開著嚟睇下。」
一開著盞燈，上面就顯示住「有你一切都變得美好」。
「……多謝。」望到句句子我不禁失笑。
「我都有份禮物俾你。」講完我就入房攞咗個袋出嚟。
「……做咩咁大手筆呀？......係個袋？！」佢從個袋入面攞出盒就見到名牌子嘅名同logo，再打開就見到個袋。
「嗯，點呀？」
「鍾意係鍾意......但係唔好再買啲咁貴嘅野啦，成幾萬蚊架～」
「萬幾兩萬啫～」
「不過呢啲都係小兒科，你鍾意咪得囉～」
「仲有！呢度有兩個手機殼，一個俾你，一個俾我嘅。」
我從個袋攞出另一個比較細嘅盒，攞出兩個手機殼，分別都有一隻狗仔，而圖案係兩個連埋嘅，另外係個底都有我地兩個嘅英文名。
「我知道你鍾意狗仔，我就專登設計咗呢個手機殼，側邊加啲花呀，心心呀咁樣。」
「多謝你...」呢個時候佢感動到喊出嚟。
「嗯。我都多謝你，多謝你為我嘅人生增添色彩，令我嘅生活變得精彩，令我嘅生存變得有意義。」
「好喇！食埋個蛋糕佢先啦～」
「嗯。」
我見到佢成面都係眼淚就係腦海中萌生一個淘氣嘅想法。
我伸出我嘅舌頭舔走佢面上所有嘅眼淚以及淚痕。
「…好核突呀你～」
「……咁你鍾唔鍾意？」
「哼！咁核突，點會鍾意喎～食野啦～」