性交轉運打喪屍: （13）

我癱坐喺地上，緩緩鬆一口氣。

當心情稍稍平靜，慢慢意識到頭先自己親手隊冧左老細，個心又開始慌。

我…我...係咪殺左人？

唔係…頭先老細已經斷左氣…本來佢就已經死左…

但萬一係我睇錯…佢其實係未死…咁真正殺佢嗰個咪係我…



咁都唔關我事架…我都係出於自衛先咁做…...

「!」

樓下偏偏呢個時候傳嚟警車鳴笛聲，心虛嘅我嚇到個心離一離。

此地不宜久留，俾人發現左呢壇嘢，咁我到時水洗都唔清。

我衝入廁所，清洗走臉上和衣襟上嘅血跡，隨即急急腳離開道堂。



臨走前鎖返鐵閘，假裝無人入過嚟。

我行到𨋢口，剛好架𨋢到達四樓。

門一打開，猝不及防，一幕「人食人」嘅畫面突襲眼球。

樓下保安滿口鮮血，手上捧住一喳血淋淋嘅腸，講緊唔係香腸，係人體入面嘅大腸、小腸、直腸等等嗰啲腸。

而喳腸係嚟自保安隔籬一具屍體。



除左啲腸被挖空曬之外，屍體嘅下半身都無左，睇怕係俾保安食左落肚。

見到咁血腥嘅畫面，我又忍唔住嘔吐。

唔知係咪我嘔得太大聲，吸引左保安嘅注意。

對方慢慢擰轉身，面朝我呢邊。

我心知不妙，未等佢行出𨋢，便轉身逃跑。

「Raaauuugh！！！」

聽到可怕嘅吼叫聲，回頭一望，個保安果然追左過嚟。

平時少做運動嘅我朝早跑返公司，頭先又同老細搏鬥完一輪，體力其實所剩無幾，加上琴日俾架手推車撞到，左腳跑起上嚟隱隱作痛，但係為左唔俾人分屍，就只能繼續跑。



我諗住從後樓梯逃跑，結果萬萬無諗到，後樓梯道門居然鎖左…

頂！唔係咁黑仔下話，平時呢道門長期開住，偏偏喺呢個時候鎖左都有嘅！？

我嘗試撞開道門，可惜係唔成功。

保安已經跑到面前，佢雙手打開想捉住我。

好在我夠機警，第一時間踎低避開，並且烏低身，喺對方褲浪「捐」過去。

保安伸手只撲到空氣，趁佢未擰轉身，我起身擸起走廊上一個大垃圾桶，舉起兼一嘢將個桶連垃圾，扱落佢個頭度。

跟住我再出力一腳踢佢落地，然後掉頭往𨋢口狂奔。



一路跑緊嘅時候，不時擰轉面望，睇下保安有無繼續追嚟。

佢個頭俾個大垃圾桶笠住，搞到佢摸唔清方向，撼左埋牆跌低。

我不敢鬆懈，飛奔到𨋢口。

等左一分鐘，部𨋢到左，但我有啲卻步。

因為頭先嗰條俾保安肢解嘅屍體仲喺入面，深紅色嘅血水同內臟散落一地。

「Raaauuugh...」保安發出嘅叫聲，令我背脊發涼。

雖然部𨋢好多血、好核突，但呢個時候唔理得咁多，焗住都要行入去。

𨋢門慢慢關上後，突然間，我feel腳邊有嘢喺度郁。



低頭一望，嗰副殘缺嘅屍體雙眼瞪大，全身顫抖。

佢咬牙切齒咁喺地下典下典下，雙眼只有眼白，並無眼珠，使到兇惡嘅表情顯得更加詭異。

如果唔係無左對腳，我諗佢一定會好似老細同個保安咁，撲埋嚟咬人。

我慢慢挨到墻邊，盡量離條屍遠啲，完全唔敢望過去。

點知條屍居然用雙手作支撐，爬過嚟捉住我隻腳。

我驚恐慌亂，先起腳fing甩佢，繼而唔理三七二一，亂踢亂踩：「去死啦！唔好搞我！去死啦你！」

結果亂腳之下，我踩爆左佢個頭，腦漿同血水四面飛噴。



「叮！」

唔遲唔早，部𨋢啱啱好落到地下。

我即刻跑出去，直奔出大廈。

行出門口無幾步，又遇見人咬人嘅場面。

一名白髮老翁俾個失常阿嬸咬甩半隻手臂，血漿如水柱一般噴出嚟。

「救命呀！救我呀！」

老翁竭力呼救，我卻無能為力，只能報以一個愛莫能助嘅眼神。