性交轉運打喪屍: （15）

我同娟姐返上樓上，入到屋先發現，原來我老豆都喺屋企。

佢棟高腳坐喺客廳，手上拎住支紅藥水。

「哇，你隻手搞咩嚟，仆街整親呀？」我睇見佢右邊手臂上，有一個好深嘅傷口。

「講起就一肚火…頭先喺報紙檔買馬經…無端端有條死𡃁仔衝埋嚟…咬我隻手一啖…」

條廢老講嘢有氣無力，斷斷續續咁：「…個下嬲到我呢…一腳就踢開條死仔…伸到佢出九條街…」。



除左把聲之外，佢個樣都好唔妥，塊面蒼白如灰，一啲血色都無，成條死屍咁。

「咩話？你俾人咬咁大獲？」

「有幾大獲…搽啲紅藥水…過幾日無事啦…」

「『朽』公，「梨」個傷口『巧』似幾嚴重，『幼』唔『幼』包紗布？」娟姐走過嚟問。

「唔洗…少少嘢洗乜大驚小怪包紗布…」



老豆一口拒絕，然後問：「…有無嘢食…頭先俾個細路搞一搞…無食到早餐…家陣肚餓…」

「有糯米『佳』，不過可能攤凍左，一係『禾』叮一叮佢。」

「是但啦…仲有我好口乾呀…快快脆斟杯水過嚟…」

娟姐按老豆吩咐，入廚房返叮熱隻糯米雞，再斟杯水出嚟。

而老豆個樣越嚟越唔妥，手同腳都變成同塊面一樣嘅慘白色。



娟姐遞杯水過去，老豆喺接過水杯嗰一刻，身體突然劇烈抽搐，雙眼反白。

我同娟姐嚇左一跳。

一秒後，老豆捏爆手上嘅玻璃水杯，擘大口衝埋嚟。

我及時反應，啱啱好避得開，否則遲半秒都會俾佢撲跌。

佢呢個兇狠猙獰嘅樣，令我諗起我老細、保安、仲有剛才樓下嗰三條友。

「『朽』公，『梨』做咩？『茅』嘢呀嘛？」

「娟姐小心，唔好行埋去！」

我一隻手拉娟姐埋一邊，另一隻手靜靜雞擸起側跟嘅摺櫈。



「Raaauuugh！」

老豆怒哮一聲，跳起撲埋嚟我地度。

我揸實摺櫈，毫不留情咁車落去。

「啊！！！」娟姐嚇得大聲尖叫。

老豆俾張櫈打到應一應，但係佢同我老細一樣，仿如有鐵布衫護體，一啲損傷都無。

然之後佢成隻牛咁撞跌我落地下，再飛撲擒住我。

我後腦撼落梳化度，眼前一黑左半秒。



「Raaauuugh—」

老豆個口擘到好大，露出鋒利嘅牙齒。

我作為被壓住嘅一方，只能利用摺櫈擋隔，唔俾對方咬落嚟。

「『朽』公停手，唔『巧』打呀！」

娟姐出言勸阻，可惜老豆呢刻完全失去常性，任何說話都聽唔入耳。

「『梨』聽唔聽到，唔『巧』打，快啲停手！」

娟姐嘅說話沒有半點幫助，反而吸引老豆嘅注意力，令自己成為目標。

老豆擰轉身，雙手狠狠咁捏住娟姐條頸。