性交轉運打喪屍: （54）

跳到落泳池，個人係無事，但全個身就濕曬，鞋又無左一隻，相當之咁狼狽。

返上去池邊後，我先擰乾身上衫褲嘅水，再望返上樓上，睇到嗰班喪屍挨住圍欄邊，不停喺度叫。

唉...慘啦慘啦，咁大間學校，到處係喪屍，更慘係又同最好打嘅楊過失散左，孤零零得返自己一個，今鋪點算好？

我非常苦惱，諗緊係咪應該去揾返楊過佢地。

問題係間學校咁大，自己又唔熟路，又唔知佢地喺邊，想揾都唔知去邊揾。



再加上我手上就得一把菜刀，同一支無用嘅水槍，要喺呢個喪屍遍地嘅大學到處揾人、到處遊走，幾乎係無可能。

經過一番思量，評估過現時情況後，我決定都係快快脆揾個出口，直接離開城大算數。

由於我完全唔識路，因此要左兜右兜，兜左一大輪先揾到位從泳池行出去。

之後又不停咁揾路，想揾返個出口。

好彩暫時一路上都未遇到喪屍，最後卒之俾我揾到地鐵隧道出口。



經隧道行出去應該就係商場，再從商場行出去就返到出去外面。

就咁從隧道口望入去隧道，已經隱約見到遠處有幾對反白嘅眼睛，以及數個喪屍嘅身影。

照計喪屍係聽聲多過望人，所以我諗只要我放輕腳步，慢慢行過去，應該都唔會驚動佢地。

於是，我剝埋另一隻鞋，踮起赤裸嘅雙腳，一步一步，慢慢咁行入隧道。

隧道入面嘅燈光眨下眨下，墻身沾染鮮血，地下更是殘肢、內臟遍佈。



行嘅時候，除左要顧及喪屍，仲要留意地下，盡量避免踩到啲斷肢或者內臟。

無奈地下嗰啲斷手斷腳同心肝脾肺腸，實在太多，導致到我避左一邊，又避唔到另一邊，結果一個唔小心，叉錯腳踩到一堆腸，成個人冼低。

本來就係咁仆低，都唔會有好大聲響，弊在我手上揸住菜刀，把刀跌埋落地，發出好響嘅「鏘」一聲。

遠處嘅喪屍耳朵靈敏，聽到曬啲聲，隨即向我呢邊衝過嚟，數目加加埋埋都有七八隻。

只係行左二十米，又要返轉頭。

我快速起返身，揸起把菜刀，掉轉頭向後跑。

先跑返出隧道，跟住一路向前跑，去到前面嗰棟叫「楊建文學術樓」嘅建築，推開紅色大門衝入去。

殊不知原來裡面都有喪屍，而且數量都唔少，至少有二十隻，仲要我一推開門就撞到其中一隻。



「Raaaaauuuuugh！！！」

俾我撞到嗰隻喪屍滿臉鮮血，猙獰咁向住我咆哮。

眼見被重重喪屍包圍，呢個時候我打算重施故技，想好似頭先踩住西瓜皮咁，瞇埋眼亂咁揮刀，希望再次「盲拳打死惡喪屍」

可惜揮左兩下，就俾面前隻喪屍隨手拍走左把刀，並且順勢將我撲落地下。

呢一刻，我俾一隻喪屍㩒低，另外附近有近二十隻喪屍，準備圍埋嚟咬我，後面仲有一堆喪屍準備衝埋入嚟。

形勢極度不妙，甚至可以話係接近垂死邊緣。

我之前走甩左咁多次，呢次睇嚟無咁好彩，條命睇怕係咁大。



偏偏...偏偏又係喺我打定輸數嘅一刻，出現左奇積。

「砰啦！」

忽然之間，傳出一聲爆炸巨響。

隨之，頭上嘅天花冧左落嚟。

喺正大門口上方嘅，主要係裝有白光燈嘅假天花，呢刻見到啲燈連埋假天花，統統跌曬落嚟，砸中曬全部喪屍。

二十隻，一個不漏，全部被砸到應一應。

偏偏…偏偏就係無砸中我。