性交轉運打喪屍: （55）

點解無啦啦樓上會爆炸，呢層我唔知，我淨係知天花冧左，但自己完全無事。

不過都仲未可以鬆一口氣，因為後面嘅喪屍已經追到上嚟。

我拿拿臨起返身，拔足狂奔。

前面有個圖書館，我無跑入去，反而轉去右邊方向。

咁樣無著鞋赤腳跑，跑得好唔舒服，令到速度變慢。



聽到嗰啲密集嘅腳步聲漸近，我唔敢減速，亦唔敢向後望，只能一直向前跑。

經過一排自動售賣機，旁邊有一條往下嘅樓梯。

我幾乎用半跑半跳嘅方式飛落去樓梯。

有個門口寫住「實驗室」，我唔理咁多，見路就衝。

後面班喪屍窮追不捨，我轉個彎繼續跑，跑到中途，前面又遇六七隻喪屍擋路。



加埋後面嗰七八隻喪屍，目前我俾十幾隻喪屍包圍住。

前無去路，後有追兵，形勢再一次不妙。

我左右張望，不停掃視四周，試圖揾下仲有無路走。

好可惜，有得走嘅地方都俾喪屍堵塞住。

但咁都未絕望得曬，因為我眼尾睄到，身後嗰間實驗室，裡面好似有人。



我有理無理，大力拍道門，並對住實驗室門上透明玻璃，大嗌救命。

「救命呀！開門呀！」

而我呢幾下大嗌同拍門聲，一次過吸引曬嗰十幾隻喪屍衝埋嚟。

手無寸鐵嘅我無法對坑，只能左閃右避。

又好神奇地，我好似預測到喪屍嘅路徑一樣，我避去右邊，佢地就撲左邊，撲前面，我又識踎低避。

可惜嘅係，喪屍數目太多，無論我點避都擺脫唔到，無法衝出重圍。

過左一陣，有一個鬼佬打開門，探頭出實驗室。

「Help！Help！」我用自己僅僅識得英文呼救。



「Oh my God！Wait！」呢句我都聽得明，個鬼佬叫我等等。

大約等左十秒，對方再次打開門。

今次佢喺地下碌左幾支試管出嚟。

嗰幾支試管裝住藍色液體，一路碌，碌到去走廊遠處。

然後，幾支試管忽然同時間爆炸。

雖然爆得唔算激烈，但係所產生強烈嘅聲響，已足夠將啲喪屍引過去走廊另一邊。

我就趁呢個機會，匿入實驗室。



有驚無險，又一次成功甩身，睇嚟我都幾命大。