性交轉運打喪屍: （68）

灣仔係一個新舊交融嘅社區，既有摩登嘅商業大樓，亦有懷舊嘅唐樓。

我地要去嘅嗰間旅館，就位於莊士敦道一段電車軌旁嘅一座舊唐樓。

上樓前，當然唔可以兩手fing fing，我地先去同一條街嘅outlet，每人擸返幾件衫走。

outlet隔籬又有一間惠康，擸完衫跟住就去超市揾食物同食水。

喪屍無處不在，我地梗係唔會傻下傻下，隨便行入去outlet同超市。



利用喪屍容易俾聲音吸引嘅特性，我地諗左個方法將附近嘅喪屍引出嚟，並吸引佢地過對面街。

個方法好簡單，對面街個油站有兩架無人看管嘅私家車，我地喺街邊執起石頭之類嘅嘢，對住兩架車猛咁揼。

車窗同車頭都俾擲中，隨即兩部車響起「嗶嗶嗶」防盜聲。

喺無人又寧靜嘅街道上，呢種聲顯得特別嘈吵。

一如所料地，周邊嘅喪屍真係俾呢啲聲吸引過去，咁我地就趁機抓緊時間，去揾所需嘅衣物同糧食。



大家分工合作，總之有咩食得落口嘅，都拎得幾多得幾多。

間旅館就喺二樓，我地拎住一抽二掕，帶埋隻狗行上去。

上左幾級樓梯，忽然遇到喪屍。

行最前嘅楊過早有準備，即刻放低手上嗰嘢，一手捉住喪屍，另一隻手攞兩舊檸檬塞住喪屍個口。

喪屍咬唔到人相等於廢左一半武功，我地繞過佢繼續向上行。



嚟到旅館門口，由於無鎖匙，所以只能鑿爛個鎖開門。

楊過用剛才喺維園執嘅警棍，敲爛個鎖，跟住我地一行六人慢慢行入去。

打開燈，裡面無人，無喪屍。

至於間旅館唔係啲咩高級賓館，反而類似係細型嘅青年旅舍。

五間雙人房，十間單人房，有個家庭式嘅大廳，放置左啲檯櫈、梳化，靠墻有幾個木櫃，櫃上面擺放著一啲漫畫同board game。

另外旅舍仲有一個開放式公共廚房，廚具都幾齊全。

楊過話呢度有個備用嘅儲水缸，所以就算出面斷水，呢度都仍然有水沖涼，慳慳地應該夠我地幾個人用三四日。

不過佢又話得雙人房有獨立浴室，住單人房嘅，就要去廚房隔籬個公共浴室度沖。



有獨立沖涼房，正常都會揀雙人房入住，問題係五間雙人房入面，有三間擺滿裝修剩低嘅雜物，裡面雜亂骯髒，因此就得兩間可以住人。

S字頭姊妹獨佔一間，奄尖嘅Isabel唔鐘意公共浴室，亦唔鐘意同人同房，所以要自己一人獨佔一間雙人房。

即係話我地三個男仔無得揀，只能夠揀單人房。

不過其實無所謂啦，呢個時勢有個安全嘅地方踎下，已經叫做還得神落。

三個女仔 第一時間先入房沖涼換衫。

我同楊過就揾幾塊裝修用剩嘅木板，封住大門口。

「地中海」司機就無幫手，一入到嚟就攤喺大廳梳化隊酒。



頭先去超市，條友乜都唔拎，淨係擸曬啲啤酒，睇個款似係要借酒消愁。

「遙遠的她！！！不可以再歸家！！！」

話咁快條友就飲醉左，面紅紅又剝曬衫咁，對住心口佢老婆粒「波的」，喺度大聲唱歌：「我在夢裡卻始終只有她！！！」

我幫楊過封好個門口，然後行過去叫條友唔好唱，因為驚佢咁大聲會引到出面嘅喪屍。

「咪唱啦，陣間出面啲喪屍聽到就大獲架啦。」

「遙遠的她！！！可知心中的說話！！！」佢把聲蓋過我把聲。

而當我行近，見到無著衫嘅佢，背脊有條三吋長嘅刀疤，望落結左焦但未完全埋口，應該係無幾耐之前整親。

我就問佢：「你背脊好大條疤喎，幾時整親架？」



「嗯？你話呢條？」佢擰轉身，後手指住背脊上嘅疤痕。

「係呀。」

「咪俾乘哥班𡃁整傷。」

「乘哥？邊個乘哥？」我問。

飲得太多酒，佢gur口氣先繼續講：「咪香港最巴閉嗰個李氏家族，乘哥囉。」

「你話佢啲𡃁整到你咁？係咩一回事？」

「等我飲埋呢罐啤酒，唱埋首歌先再話你聽」



佢再開一罐啤酒，繼續高聲唱：「遙遠的她！不可以再歸家……」