性交轉運打喪屍: （120）

食飽飯後，大家收拾好啲碗筷，一齊點算下食物存貨，以及打掃下個單位，清理啲垃圾，之後就各自鋪啲紙皮喺地下訓教。

S字頭兩姊妹訓埋一齊，楊過就自己一個訓喺埋邊，至於阿得未食飽就已經飲醉左，一個人就咁訓喺門口。

啱先一路見阿得拎住一罐罐啤酒喺度飲，Kappa覺得好好奇係咩味道，因此趁其他人唔為意，偷偷地拎左一罐，訓到我旁邊開嚟飲。

「咦…都唔好飲嘅…」Kappa飲左一啖，個樣揦埋一舊，「可樂好飲好多，點解咁難飲，阿得都咁鐘意飲？」

隔籬左右都訓曬教，因此我細細聲回答：「佢唔係為左好飲而飲，只係想醉。」



「醉？」

「你想知咩係醉，飲多幾啖就明架啦。」

Kappa眨眨眼，跟住聽我講真係又飲多啖：「咳咳…」

對佢嚟講，酒精嘅味道或者都係太苦，飲左兩啖都係頂唔順放低左。

我就問佢：「你係咪開始感覺到，個頭暈暈地，個人又熱熱地？」



「好似有啲啲。」

「咁啲暈暈地嘅感覺，就係就係『醉』嘅感覺。」

「好奇怪，望住眼前啲嘢，好似會飄走咁嘅？」Kappa有啲暈陀陀，成個人挨落嚟我心口度。

開講有話「酒後吐真言」，趁佢有啲迷迷糊糊，我嘗試問返關於佢嗰隻錶入面，嗰兩條片同嗰條提示訊息嘅嘢。

「係啦，你同城大實驗室個鬼佬，係咪識得架？」我無直接問，只係旁敲側擊。



「你話Professor Dave？」

「嗯，係呀。」

「唔識，我唔識佢。」Kappa答我。

雖然單位內燈光照明不足，但我都見到對方臉上泛紅。

「咁…咁你係咪有任務在身，就係要救個鬼佬，而且要係一個限期之內完成任務？」

……

聽完呢句，對方靜左一秒，然後抬頭望住我，眨眨眼：「點算…我個心好似又跳得好快…」

「下…」此刻我視線與佢對上。



頭髮遮住左佢嘅側臉，面珠墩微紅，眼神亦帶點迷離。

「good」一聲，我吞啖口水，心跳開始加速，而且「細佬」仲有反應。

其他人訓曬覺，因此四周好安靜，呢一刻我仿佛聽到，「怦怦怦」急速嘅心跳聲。

「gur~」唔知係咪飲兩啖酒，個肚有氣，Kappa無端端「gur」左啖氣。

我望住佢gur氣嘅滑稽樣，忍唔住笑左一聲。

咁多年嚟，雖然無拍過拖，但都曾經試過暗戀，所以我知道鐘意一個人係咩感覺。

除左個心會怦怦跳之外，仲會俾佢嘅一舉一動深深吸引住，而無論佢做啲咩，你都會覺得好迷人。



至於我嘅內心，對Kappa就有呢種感覺。

就算佢著裙又著褲，就算佢「gur」氣唔掩口，但係呢啲「醜態」喺我眼中，都係可愛嘅一面。

可能呢啲就係所謂嘅「情人眼裡出西施」。

然而，對於呢個「西施」嘅背景，我仍然一無所知，唔好話佢嘅真實身份，其實我就連佢嘅中文名都唔知。

諗諗下，鐘意上一個連名都唔清楚嘅人，咁會唔會好奇怪？

於是我就問：「係啦，你中文名叫…」

講到一半，說話就停低，因為Kappa合埋左眼，訓左教。

剛才佢攬住我，伏喺我心口，就咁不知不覺訓著左。



我靜靜雞將隻手搭到佢膊頭攬住佢，然後合埋眼，慢慢咁入睡。