性交轉運打喪屍: （122）

楊過都覺得好不可思議：「我好似…真係無變喪屍。」

「你伸隻手出嚟。」

楊過聽阿得講，伸出右手。

然後，阿得扯甩Jojo嘴上個罩，俾佢再咬楊過隻手一啖。

「哇頂你！好痛呀！」



Jojo喺楊過手上留下一個好深嘅咬痕，Kappa第一時間又為楊過止血。

過左一陣，楊過個樣無任何變化，皮膚同雙眼都無變白，亦都無發癲亂咬人。

「係啦係啦，你條友身上真係有抗體！」阿得一口咬定。

「真係？」我地幾個異口同聲一齊問。

阿得好肯定咁點點頭：「嗯，無錯，楊過你身上嘅血可以用嚟整解藥。」



結果，我地居然係誤打誤撞嘅情況下，揾到製造解藥嘅最後一塊拼圖。

原來，做多啲運動，抵抗力真係好啲，連喪屍病毒都抵受到。

然而要用楊過嘅血，咁就要抽血，要抽血就要用到針筒，呢度剛好缺少左呢樣嘢，因此我地要派人到出面揾啲醫療用品。

楊過受左傷，唔適宜郁動，大家你眼望我眼，睇緊邊個出去好。

最後Kappa卻主動請纓，舉手話去揾。



我唔放心佢一個出去，所以就陪埋佢去。

楊過俾左兩碌木棍我地傍身，仲話過隔籬兩條街就有間藥房。

「Raaauuugggh—」

一落到樓下，就遇到三隻喪屍。

我都未有機會出手，Kappa幾下手勢就擊退左佢地。

佢真係好可靠，有佢喺身邊，感覺好安心。

我地到隔籬街逛逛，揾楊過所講嗰間藥房。

「我有嘢想問你。」Kappa肩並肩同我一齊行。



我以為佢有咩問題要問，殊不知居然問我：「頭先，Sandy挨住你，細細聲同你講咩呀？」

「無呀，都無講乜嘢。」

「但我見你地哄得好埋咁嘅？」

我發覺Kappa好似有啲呷醋。

「哈，你唔係呷醋下話？」

「呷醋係咩意思？」

「點解釋呢…即係你見到你愛嘅人，同第二個人一齊嘅時候，心入面會有種酸溜溜嘅感覺。」



「Um…我都唔知係咪呷醋，我淨係知唔想見到，你同Sandy行到咁埋。」

估唔到Kappa居然會呷醋，望住佢呢個樣，我覺得有啲窩心，有啲好笑。

「你做咩笑呀？」Kappa問。

「哈哈，無呀，我無笑呀！」

呢個時候，我地嚟到嗰一間藥房，剛踏入門口，遠處傳來猛烈嘅撞擊聲。

聽聲好似係汽車碰撞嘅聲音，不過我地無多加理會，入去揾針筒。

好彩藥房入面無喪屍，摷下啲櫃桶，揾左一陣就揾到要揾嘅嘢。

原路返回嘅時候，Kappa又問我：「我仲有個問題。」



「問啦。」

「阿得成日嗌『老婆』，其實『老婆』係咩嚟架？」

「當一對男女結左婚，男方就會稱呼女方做老婆，女方就稱呼男方做老公。」

連「老婆」都唔明，Kappa理所當然都唔會明咩係結婚，未等佢問出口，我就補充：「你想問咩係『結婚』呀嘛？簡單嚟講，結婚呢，就係當一對男女，彼此好愛對方嘅時候會做嘅事。」

「好愛對方…會做嘅事？咁我地係咪會結婚？」

望住佢一臉純真咁問，我忍唔住又笑一笑：「唔知呀，可能會，可能唔會。」

之後Kappa就靜左，無再出聲。



返到工廈，我地發現樓下多左一部大貨車。

上到去單位，道門口無端端打開左。

行入去，裡面嘅情景令我嚇左一跳。

單位內，有一大班著住黑色裝甲嘅人，揸住槍指住並圍住楊過佢地。

當中戴住臂章嗰個裝甲人，聽到我地嘅腳步聲，擰轉面一望，用冷冰冰嘅機械聲講：「Kappa，歡迎你歸隊。」