性交轉運打喪屍: （132）

震感越嚟越微弱，大廈漸漸停止搖晃。

Sandy同Shirley回頭行上嚟，將我從裝甲人身下拉返起身。

佢地啱先喺下層嘅樓梯口，睇到曬全個過程，終於知道我無講大話。運氣真係可以對抗敵人。

「踏踏踏—」

樓上又傳嚟Alpha同佢手下密集嘅腳步聲。



想抖啖氣都唔得，我同兩姊妹只有繼續逃跑。

我地沿住樓梯跑落去，落多兩三層之後，就遇到另一批裝甲人，從下面嘅樓梯上緊嚟。

前後被包抄，我地急急腳調頭，推開樓梯門，行出外面嘅走廊。

走廊上分佈住唔同嘅單位，我地分頭行事，睇下邊道門無鎖。

我運氣好，嚟到走廊中間嘅一個單位，一試就擰開把鎖，輕輕一推，大門就打開左。



「喂！呢度呀！」我yap手叫兩姊妹過嚟。

喺關上門一刻，Alpha把聲傳嚟：「你地同我反轉呢層，都要摷嗰幾條友出嚟！」

佢地似乎要全力搜索呢一層。

至於我地匿入嚟嘅呢個地方，係一間西裝鋪。

店內四周圍掛滿各種各樣嘅西裝，亦有擺放各樣皮具嘅玻璃櫃。



我地就推啲櫃塞住道門，另外亦留意到地板上有唔少裂縫。

而喺鋪頭嘅中央，更是裂開左一個大窿。

從個窿向下望落去，剛好見到本來我地住嘅嗰個貨倉。

實係之前Alpha同楊過糾纏嘅時候，射左啲激光上天花，直接射通左樓上樓下呢兩個單位。

我小心翼翼行近邊緣位置，睄落去樓下，斜望到Kappa同楊過被人綁住雙手，且背靠於墻上，有兩個裝甲人正看守住佢地。

Kappa好快發現到我，抬頭望上嚟。

見到我無事，佢鬆一口氣，並對住我一笑。

離遠睇，佢嘅嘴角帶血，額頭亦有瘀傷，照咁睇應該曾經被人暴打過。



可惡！Alpha呢條爛坦連自己友都唔留手！

兩個裝甲人似乎發現有異樣，順住Kappa嘅視線，擰轉面望上嚟。

我第一時間縮返個頭，退後幾步。

過左三十秒之後，我試探式望兩眼，確認裝甲人無望上嚟，先繼續向下望。

除左Kappa同楊過，仲有阿得喺第三個裝甲人嘅監視下，喺放置於貨倉中央嘅長檯前，拎住試管之類嘅化學工具，溝緊一啲化學嘢。

睇嚟佢好認真咁研究緊，兩隻變種喪屍嘅解藥。

「砰砰！」隔籬傳出兩下破門聲。



啲聲好響好接近，嚇到我地個心離一離，估計班友下一間就會揾到呢度。

「點算？班友就嚟殺到，我地無得避啦！」Sandy問我點算。

我掃視四周環境：「你地匿入去櫃入面，用嗰啲布料同西裝遮住，至於嗰班友，就我嚟對付。」

Sandy同Shirley知道我有運氣加持，所以唔擔心我嘅安危，唯一擔心係匿埋之後會唔會被發現。

「仲等咩！快啲匿埋啦！」我催促。

別無他法之下，對方最後按照我嘅提議，匿到入去一個放滿西裝嘅陳列櫃中，兼且用西裝遮擋自己身體。

下一秒，Alpha帶住手下破門而入。

「哈！原來你條友匿埋喺呢度！仲有兩條女呢？」Alpha環顧四周，無發現到兩姊妹。



「我唔知喎。」

「呵！無所謂，反正無論點走，都唔會走出我地嘅手指嚹！不過話時話，你條友都幾好嘢，咁都隊冧左我三個手下。」

「係咪想幫佢地報仇？係就快啲開槍啦！」我大膽挑釁。

連同Alpha總共有六個裝甲人，都無一個敢開槍。

原因係，我家陣拎住左一塊全身鏡。

塊鏡將我全個人遮住，我淨係露出半個頭同佢地講嘢。

只要對面一開槍，咁激光就會反彈過去。