性交轉運打喪屍: （133）

Alpha冷笑一聲，將激光槍掛喺腰間，隨即就用迅雷不及掩耳之勢，衝過嚟一拳窩落嚟。

我都未嚟得切反應，佢嘅拳頭就打爆前面塊玻璃，如鐵錘般重擊我嘅小腹。

我雙腳跪地，一手掩住個肚，另一隻手撐住地下，強烈嘅痛楚令人面容扭曲，甚至抖唔到氣。

然後，條仆街再用腳，狠狠踩我隻手。

「啊！！！」我痛苦大嗌。



「仲以為你有咩本事，原來不堪一擊！」Alpha踩多兩下先肯縮開腳。

痛苦萬分嘅我等緊運氣降臨，將我拯救。

「臨死前有無遺言？」Alpha重新攞起激光槍。

原本我諗住趁佢未開槍，轉身從身後個大箍窿跳落去下面貨倉，因為唔算好高，加上有運氣，照計跳落去都死唔去。

點不知，未等我動身，膝下原本有浮現裂縫嘅地板，突然全部裂開。



我成個人急速向下墜，Alpha退後退得快，否則佢都會遭殃。

「砰！」

身體垂直咁從兩米幾高嘅地方跌下，砸爛左阿得面前嘅長檯。

耳邊聽到Kappa驚慌嘅尖叫，眼前則天旋又地轉，個頭受到撞擊，暈得一陣陣。

除此之外，背脊非常之痛，手臂則俾破裂嘅燒杯碎片割傷，流左血，而且傷口似乎仲沾染左，一啲凝固左嘅深色液體。



「居然咁都跌唔死，你地三個同我搞掂佢。」居高臨下嘅Alpha命令，貨倉入面嘅三個裝甲人。

「快起身！唔好訓啦！快啲走呀！」Kappa雙手被捆綁，救唔到我，只能用呼喊嘅形式叫我走。

呢個時候，除左背脊，我feel到個頭同心口突然好痛，呢種痛係由內散發至外。

痛楚走遍全身，我喺地下典嚟典去，同時兩隻手臂變得一時蒼白，一時係原本嘅膚色。

三個裝甲人已經將我逼埋墻角，舉起激光槍瞄準。

我兩隻手掩住個頭同心口，瞳孔擴張，視線突然之間變得異常清晰。

清晰到我連三人身上嘅裝甲，上面所有紋理同坑紋，激光槍嘅所有細節等等，統統睇得一清二楚。

下一個瞬間，三道激光從槍口射出。



啲光好似慢動作咁朝住我射過嚟…

唔係…唔係啲光慢左…似乎係我變快左…

唔知點解，我感到全身有一股好強嘅力量湧緊出嚟…

兩下側身閃避，猶如matrix入面奇洛李維斯避子彈，我好輕易咁避開左啲激光。

隨後，一個跨步，再以快到眼都眨唔切嘅速度，閃現係其中一個裝甲人面前。

對方根本反應唔切，我毫不客氣對住佢個肚，用力揮出一拳。

諗唔到嘅係，呢一擊，居然打到對方爆甲。



條友俾我打飛到幾米遠，腹部嘅裝甲完全粉碎。

我成個人呆左，連我自己都被呢股匪夷所思嘅力量所震懾。

點解無啦啦會變到咁勁嘅？