性交轉運打喪屍: （145）

「Kappa，我想知乘哥屋企嗰個地下城堡，有無收埋好多金銀珠寶？」Sandy咬住餅乾，好奇咁問。

「Um…金銀珠寶係咪嚟架？」

「即係啲好靚又會閃令令嘅嘢。」Sandy解釋。

「好靚又閃令令嘅嘢，唔太覺眼喎。」

「唔會嘅，我估一定有，可能乘哥收得好埋，所以你先無發現。」Sandy一講起呢啲嘢就好雀躍，「諗諗下可能唔止有金銀珠寶，話唔定連鑽石都有，到時去到我一定要揾真啲先得。」



比起家姐，Shirley就關心未來嘅香港係咩環境多啲，反正佢地兩個都對未來非常好奇。

而呢一刻嘅我比較關心阿得，因為條友已經昏迷左好耐，唔知咩事一路都唔醒。

我醫飽肚之後，自己一個埋去，嘗試整醒對方：「喂阿得，點呀你，醒一醒啦喂！」

我搖一搖佢個身，睇下搖唔搖得醒佢，話曬只係俾人摑左一巴，無理由暈咁耐架？

「啊！老婆！」阿得突然扎醒睜開眼，趌起身攬埋嚟。



「乜你終於都醒啦？」

「老婆！」阿得越攬越實，睇嚟個人醒左但個腦未醒，又亂咁嗌人做老婆。

「咪咁啦，我唔係你老婆。」我想輕輕推開佢，但都未出力，條友突然又向後訓低，再一次暈左。

「搞咩呀你？無啦啦做乜暈過？」我細細力拍佢塊臉，今次點整都整唔醒對方。

「啪！」喺呢個時候，忽然有嘢擊中我條頸。



我當堂暈一暈，掩住條頸，差啲就摞低。

事因另一個暈低嘅人楊過醒左，兼且玩埋偷襲，出手刀打我條頸。

「對唔住！我唔可以俾你拎隻usb走！」楊過趁我仲暈陀陀，即刻摷我褲袋，好快就奪走嗰隻usb，「呢隻『手指』本來係屬於呢個度，所以一定要用嚟解救呢度嘅人！」

講完，對方就奔向大門，直衝出門口。

我第一時間想追上去，但係個人仲暈暈地，眼前天旋地轉，腳步浮浮。

「搞咩嘢你！隻usb俾人搶左啦！快啲追啦！」被綁實嘅Alpha心急如焚。

與此同時，剛才一路掛住傾計嘅Kappa同兩姊妹，終於發現楊過醒左，仲搶走左usb。

眩暈感逐漸散去，我同三人一齊出去追截楊過。



我嘅速度比佢地快好多，唔洗二十秒就從三樓落到去最低一層，並且嚟到工廈大門口攔截。

楊過比我慢，過左一陣佢先嚟到門口。

「讓開！我要將usb交出去！交俾乘哥或者其他信得過嘅人！」楊過叫我唔好攔路。

「唔得！我絕對唔會俾你帶隻usb走！」

「點解？你試下諗下你啲朋友、親戚、以前嘅同學、乃至任何一個你識得嘅人，佢地分分鐘依家俾喪屍追殺緊，乜你真係可以咁決絕，要置佢地於…」

「唔好再講！總之隻『手指』我一定帶走！」我態度極之堅決。

「好！既然傾唔；落去，咁無辦法啦！」楊過摩拳擦掌，擺出要決鬥嘅姿態。



依家嘅我身上流住紅眼同綠眼喪屍嘅血，力量同速度都超越一般人，如果出盡全力嘅話，楊過一定會受傷。

雖然喺呢一刻我地立場唔同，只不過佢一路以嚟其實都好照顧我，當日被困喺電腦商場，更加係佢帶其他人嚟救我，所以我真係唔想傷害佢，亦唔想同佢開片。

無奈對方心意已決，一個直拳向住我攻擊。

我反應及時，輕鬆側身避過左。

隨之佢接連揮拳，每拳都帶住狠勁，睇嚟呢次佢真係唔係講玩。

而我嘅速度喺佢之上，因此避過左大部分嘅攻擊。

佢一路進擊，我一路退後眼見就嚟俾逼到墻角，避無可避之際，先至逼不得已出手還擊。

我擋開對方兩下勾拳，然後出手打中佢嘅小腹。



出拳嘅時候我已經就左力，不過威力仍然唔細，一嘢就打到對方趴低。。

殊不知，倒下嘅楊過，居然捉住我隻腳，開口用力咬落去

「啊！！！」我痛到大嗌，忍唔住一腳伸開對方。

楊過俾我踢到飛起，然後再次倒地。

腳上嘅咬痕非常深，幾乎見血咁滯。

楊過好快起返身，趁機會好似隻牛咁用個膊頭撞埋嚟。

我一隻腳仲痛緊，所以只能用單腳跳起閃避。



隨即，楊過轉身起踭攻擊，眼見自己避唔到，唯有出拳迎擊。

我地分別都擊中對方，佢打中我心口，我打中佢膊頭。

論威力，我嘅一拳比佢嘅踭頭犀利，因此佢再一次我打到訓低。

「可惡！」

似乎佢知道唔夠我打，再起返身之後，無再攻過嚟，反而調頭走。

楊過一支箭跑返上樓上。

由於腳上嘅痛仲未消退，我只能單腳趌下趌下追上去。

單憑一隻腳嘅速度點快得過兩隻腳，就係咁，好快俾對方走甩左。