性交轉運打喪屍: （146）

過左一陣，Kappa同兩姊妹落到嚟。

「你隻腳受左傷？」Kappa一眼就留意到我腳上嘅咬痕。

「頭先俾楊過好大力咁咬左啖，不過依家唔痛啦。」

「咁楊過佢人呢？」Sandy問。

「返左上去，你地落嚟嗰陣無見到佢咩？」我問。



「無呀。」Shirley回答。

「隻『手指』仲喺佢手上，我地要快啲揾返佢出嚟！」

「Raaauuugggh！！！」

我說話一講完，身後傳嚟嚇人嘅咆哮聲。

「弊！有喪屍！」Sandy反應最好，伸手指住門口。



擰轉面，真係見到一大班喪屍撞開閘門，湧緊入嚟。

「Kappa，你同佢地兩個上去先，呢度我頂住！」

「但係數目咁多，你…」

「得架啦！我頂得住，你地上去揾楊過先！」

我催促佢地走先，與此同時，已經有三隻喪屍攻到埋身。



我一邊躲避，一邊連出三拳將佢地全部打低。

Kappa亦都聽我講，帶兩姊妹返上去先。

眼前目測有至少二十隻喪屍將我重重包圍，然而我已經唔係之前嘅我，呢一刻身上有強大嘅力量，所以唔洗驚呢班嘢。

我先嚟個三百六十度轉身揮拳，收拾曬前後左右嘅喪屍。

隨後有三隻喪屍撲埋嚟，喺我嘅眼中，佢地嘅動作好慢，未等到佢地埋身，我就㩒住佢地個頭，砌佢地落地下。

只係短短兩分鐘，已經有一半嘅喪屍訓低，而剩低嗰半，我再用多兩分鐘都解決埋。

呢一輪打鬥，令身上沾染左一撻撻鮮血，不過依家唔係整理儀容嘅時候，我要盡快同返Kappa佢地會合。

返上樓上，我逐層逐層咁揾：「Kappa，你地喺邊？楊過你快啲出嚟！」



洗樓洗左兩層，要去到第三層先再遇返Kappa佢地。

「你無嘢呀嘛，你身上咁多血嘅？」Kappa眉頭緊皺。

「唔洗擔心，我無事，無受傷。」

Kappa仔細打量我全身，確認我係咪真係無受傷。

我就問：「係啦，你地揾唔揾到楊過？」

三人搖搖頭，表示未揾到。

「我估佢都係匿埋左嘅啫，我地逐個地方揾一定揾到。」



於是，我地好仔細咁每層每個單位去搜索，後尾揾左好一陣，始終都係未揾唔到。

當上返去原本我地住嗰一層時，喺走廊上，卻遇到Alpha同佢嘅裝甲人手下。

我打左個突，嚇左一跳：「點…點解你地會鬆綁左嘅？」

Alpha冷笑一聲，踏前兩步，張開口露出兩隻崩左嘅門牙：「咪就係用門牙鋸斷條繩囉。」

頂！我太疏忽！居然咁都俾佢揾到機會解開條繩。

「好啦，你地自動出現，咁就唔洗揾啦。」

Alpha身後嘅一個裝甲人，單肩孭住一個大隻佬，無睇錯嘅話，似乎就係楊過。

「既然你揾到楊過，咁我地就一齊出發去大學。」我對Alpha講。



「哈哈哈哈哈哈—」Alpha仰天大笑，「同你地一齊？想創你個心咩，你真係以為我會帶埋你班爛坦返去未來？呃你架渣！我諗住講個大話氹你交返隻『手指』出嚟，不過家下隻『手指』喺我手上，所以唔洗再做戲啦！哈哈哈！」

仆佢個街！Alpha呢條粉腸果然信唔過！

「哈哈！你班仆街受死啦！」Alpha命令手下開槍,「同我開槍射死佢地，射死埋個二五女！」

七個裝甲人舉高激光槍，同步掹雞開火。

於狹窄嘅走廊之內，密集嘅激光朝住我地射過嚟。

我速度同反應都極快，第一時間拉住Kappa一齊伏低。

無奈一個人只得一雙手，拉唔到咁多個，因此只能眼白白睇住，前面嘅Shirley同Sandy被射成肉醬。



「可惡…」

Alpha不近人情嘅殺戮，激起我心中嘅怒火：「Kappa，你留喺度唔好郁！我要搞掂佢地！」

我返起身，用閃電般嘅速度衝過去，再用排山倒海嘅力量，瘋狂出拳擊打。

一瞬之間，頭先開槍嘅七個裝甲人，俾我打到飛去走廊嘅盡頭，身上嘅裝甲全部爛曬。

跟手我踢跌孭住楊過嘅裝甲人，再飛膝怒頂Alpha。

以上一連串嘅動作都完成左之後，對方先反應到過嚟。

倒地嘅Alpha嘴角流血，頭先佢用雙手抵擋我嘅膝撞，結果幾乎十隻手指腫曬。

當我想出最後一擊了解Alpha，喺呢個時候，喺走廊盡頭嘅裝甲人唔肯認輸，再對我開槍。
我即刻退後閃避，結果就俾左空擋Alpha。

條友咬到自己手臂流血，然後拎左一支長滴管出嚟，滴管裝住凝固左深色液體。

佢好快手就將啲液體統統滴曬落個傷口度。

「AH！！！」

隨即佢大嗌一聲，臉部表情變得扭曲，同時身上啲肌肉開始膨脹，雙眼更變成深藍色。

佢…係咪要變成同我一樣嘅…半人半喪屍？