我次次拍拖都拍唔長，因為我……: 阿希篇
我冷靜完之後去咗詢問處，問個女職員「唔該，我想搵劉梓謙，佢係幾多號病房？」職員示意佢係4A病房，我戰戰兢兢咁行到佢房前，敲咗吓房門，聽到佢話「入嚟啊」
我一打開房門畀眼前嘅畫面嚇到動彈不得，一開門迎面吹嚟一陣寒氣，果種凍即頭係入咗殮房咁凍，我望住阿謙插晒喉，身體好虛弱咁訓咗係病床上，睇落佢個樣瘦到面頰都凹晒，顴骨都突出嚟，睇嚟佢呢段日子都好痛苦，雖然係咁，但佢夾硬撐起笑容，想畀人睇到佢精神嘅一面
最恐怖嘅唔係阿謙個虛弱嘅樣，係佢身後有條女熊抱住佢，一睇就知條女唔係人嚟
因為佢身上散發住嘅氣場，令人覺得好毛骨悚然，我啲雞皮都起晒，我心諗咩料啊，點解會咁攬住阿謙，個女鬼係咩水，我同隻女鬼對望咗兩秒，女鬼都好似feel到我見到佢，用面目猙獰嘅眼神望住我，嚇到我唔敢郁阿謙用住氣弱游絲嘅語氣講「做咩咁嘅樣？畀我個病樣嚇親？唔洗驚喎，坐啦，唔好成碌木咁企係到啦」睇嚟阿謙唔知我見到佢隻背後靈所以嚇親，阿儀係我耳邊講咗句「果隻唔係好嘢嚟小心啲」伯母當時坐咗係阿謙隔離，佢企咗起身，接過我手上嘅鮮花話「哎呀啲花好靚，多謝你啊希，你坐啊，你兩個慢慢傾吓偈啦，我出去洗下個花樽」
伯母出咗去之後，個氣氛更恐怖，好似人氣少咗，間房好似愈嚟愈凍，我都唔敢正視隻女鬼，隻女鬼聽完伯母叫我個名之後，個眼神變得更猙獰，但我繼續扮到冇嘢咁問「阿謙你咁大件事，早咩唔早啲講，見到你瘦晒好心痛」佢話「我都冇預過個病情會惡化得咁快，上個月都仲好地地，唔知係咪因為Emma 佢走咗，我太傷心一時接受唔到，所以屈到病咗...」
係喎，睇佢FB知佢大學識咗個女朋友，好似係叫Emma,阿謙成日都會擺啲情侶合照上FB曬命，呢排的確唔見佢有再擺啲相上去，我再用眼尾掃吓隻女鬼，咪住......佢咪就係Emma
因為未見過真人，再加上平時佢吔自拍都有開啲美顏app ，所以我第一眼都認唔出隻背後靈係佢條女，咁就奇啦，點解條女死咗都要痴住阿謙阿謙繼續講「你可能有啲疑惑，唔知邊個係Emma,佢係我大學ocamp 識嘅女朋友，佢兩個月前不幸交通車禍死咗，我當時聽到呢個消息都好難過」心諗，我不嬲都有stalk你FB,IG
我知係邊個㗎啦，唔洗刻意解釋