我次次拍拖都拍唔長，因為我……: 女鬼篇

阿希執完嘢番咗嚟，佢仲好焦急咁同我講「阿儀，我今日番咗屋企執嘢，發現咗啲嘢，可能同你單案有關」佢即刻打開電話嘅相簿，畀咗張相我睇，係一道茅山符貼咗係門上面，阿希再畀咗張清晰啲嘅相我睇，上面嘅字跡的確好似之前道符，阿希繼續講「我之前屋企撞鬼，家姐搵咗師傅嚟做法事，佢話個師傅叫聰哥」

我一聽到就話「佢全名係咪陳振聰？」阿希搖搖頭話「唔係，佢叫譚耀聰，家姐佢都sd 咗呢個師傅嘅卡片畀我」阿希打開wtsapp對話記錄，開咗張圖畀我睇，係果個人嘅卡片，我細心咁睇卡片嘅內容，內容如下：
縱橫異界，所向披靡，
軀邪扶乩，無所不通。

名寫住譚耀聰師傅，地址係大埔某商場，正當我睇得好入神果陣，突然聽到開門聲，原來係大叔見完工番嚟，佢仲好風騷咁哼着歌，一隻手擰住個外賣盒話「今日見工勁順利，睇嚟都坐定粒六，切盒靚燒肉嚟賀一賀佢」

阿希話「你過嚟睇下，我搵到啲同阿儀單嘢有關嘅線索」大叔嘆咗口氣話「又係果單嘢啊，唉，收手喇，過咗咁多年，不如原諒個兇手喇...」聽完我覺得好嬲，忍唔住怒火大聲咁講「死果個唔係你，你梗係覺得無所謂喇，我畀人困住咗係呢到幾十年啊，好似坐監咁兇手就係出面逍遙法外，你同我講叫我睇開啲？原諒佢？你冇撚嘢啊？」





大叔突然間呆咗，好似聽到我鬧佢咁，眼神仲好閃縮咁，佢細細聲話「sorry大佬，我擺低啲燒肉係到，你想食嘅隨便」之後佢隨手打開咗盒燒肉係枱面，就走咗入廁所煲煙

心諗....佢係咪睇得太多鬼片，以為鬼最鍾意奶叉燒同燒肉我唔好呢味㗎囉

阿希望住我講「咁奇怪嘅，大叔頭先竟然有反應，理論上佢應該聽唔到你把聲」我話「唔知呢，佢好似聽到我講嘢咁，不過講番呢個師傅先，我又唔肯定佢係咪阿聰...」阿希話「過咗咁多年，可能佢改名換姓都唔出奇，不過就算佢唔係兇手，佢都應該同阿聰係同一茅山派系，我上網查過，茅山都好似有分唔同門派，而佢哋寫啲符咒都咁相似，我覺得佢可能會識兇手都唔奇」

我話「咁應該點做？係咪搵日去拜會下佢？」

阿希話「正有此意，我打算去搵佢扮顧客，套下佢料」我話「咁都好嘅，你打算幾時去搵佢？」阿希話「我約咗佢後日，因為老豆聽日番香港，我聽日都唔得閒，我後日會上去個師傅間鋪到」





我話「我可唔可以跟去？」阿希話「我覺得帶埋你去會有啲風險，因為個師傅識茅山，家姐話佢之前去我屋企果陣有用啲法器捉鬼，我怕佢到時見到你會傷害你，咁啦，我同佢見面果陣試吓偷偷影吓佢，攞啲相畀你睇吓，認下人」我話「咁好啦，唔該你」