我次次拍拖都拍唔長，因為我……: 阿希篇

老豆話今日佢會搭早機番嚟香港，番到嚟香港應該一點左右，我同家姐都一早去咗機場接佢機，我哋離遠見到老豆，老豆佢向我哋招手話「等咗好耐啊？」家姐話「唔係，我哋早你少少到姐，重唔重啊啲嘢？」家姐走上前幫手攞行李，我哋行近老豆之後，我見到啲好奇怪嘅嘢咦咩嚟，點解老豆條頸有條紅色嘅線，好似係縫衫嘅普通紅線，條線圍住佢條頸，我本身以為自己眼花，但捽完眼望多次都仲見到條紅線

老豆可能feel到望住佢問「做咩？我今日件衫唔好睇？」我話「唔係啊，幾好睇，新買㗎件衫？」我即刻轉移話題，緩和下個氣氛，老豆笑笑口話「件衫係印尼啲街邊檔買，都好平吓，你鍾意下次買件畀你喇」

究竟條紅線係咩嘢嚟，唔通老豆撞邪但睇佢面色又冇咩嘢，健健康康咁，我哋一早call咗Uber,老豆坐咗係前排，師機位隔離，我同家姐坐後面，我諗緊條紅線係咩嚟，但家姐又冇咩反應好似睇唔到咁，於是我決定用電話私chat 家姐，同佢講我見到嘅嘢

我趁家姐篤緊電話果陣，wtsapp 佢話「家姐，你見唔見到老豆條頸，有條紅色線圍住」

家姐話「做咩我坐你隔離都唔開口講嘢，要wtsapp 我」





我話「我覺得呢單嘢太靈異，唔想畀老豆聽到，怕嚇親老豆」

佢話「我以為你講嘅紅線係件衫有線頭突咗出嚟....你嘅意思係話，老豆撞咗嘢？」

我話「我都唔肯定係咩嚟，話說我呢排有陰陽眼，睇到鬼，但我都未見過老豆呢個情況」

佢話「我頭先裝下塊倒後鏡都見唔到老豆條頸有你所講嘅線....anyway, 點解你突然間有陰陽眼」

我心諗，死人都唔可以畀佢知我畀人屎眼通完之後開咗天眼所以作咗個大話「大叔有修法，教咗我點開陰陽眼」





家姐話「咁你琴日番咗屋企執嘢仲有冇見到鬼？」我話「冇喇，屋企變番正常」

家姐話「咁姐係屋企個結界有用，啲鬼入唔到屋，咁不如一陣睇吓老豆入咗屋企之後條線有冇消失？如果係邪嘢，應該入唔到結界入面」

家姐咁講都有道理，所以我打算睇下老豆一陣番到屋企之後會點