[愛情] [校園] [足球] 我鐘意你 但係我唔可以同你一齊: 1.
大家好，我叫馬子朗，今年13歲，讀緊中三，係一個讀書廢到出汁嘅垃圾，番學最叻嘅就係研究點樣上堂食野同或者訓覺唔比老師發現，同埋點樣最遲起身用最快嘅路線跑番學。
可以話其實我真係冇野叻，只係得打機同埋踼波叫做有番啲色水，通常學校都係得呢幾類人，我就係叫做懶懶地唔係deadline都唔交唔溫書個啲人。
其實以前小學我都係幾乖下，成績都叫做幾撚勁咁，只係因為去到升中學嘅暑假老豆老母買左部電腦係我房之後，我就冇再出過房門。遊戲嘅世界永遠係好過現實，到依家我都係咁諗。
順帶一提，我小學同中學係一條龍嘅所以黎黎去去都係個啲人，朋友都幾碼識左幾年左右。所以都冇話冇乜朋友，自問我個人都幾社交得，所以係我個級都叫小小出名咁啦。
我地學校就好撚奇怪嘅，又冇社又冇個啲社際嘅比賽，所以我地校園生活都叫做好撚悶下。
中二到中三嘅個人一個暑假都係平平無奇，校隊一三五練波，其餘嘅時間都係係屋企做個小宅宅。最興奮嘅一日都係8月1日
原因係因為每年嘅呢一日都係分班嘅大日子，全部人都會send自己係咩班，相認左之後就會入個啲所謂嘅whatsapp group，睇下自己有冇朋友同自己一班咁。
咁我都係一如以往咁入左去睇下有咩人啦，其中足球隊都有幾個friend同我一班，其實每次分班黎黎去去都係呢一班人，原因就係因為大家讀書都廢到仆街，所以大家都會分到去最廢個班。
咁我就繼續碌下有冇人同我一班啦，突然就見到呢個有啲熟口面嘅人名＂啊瑩＂，全名叫黃曉瑩，一望到呢個名我即刻皺一皺眉頭，諗番起兩年前嘅一件事。