九點十五分嘅時候,我己經到左x方糖嘅門口外

唔好問我點解會早到,一黎我唔係太敢遲一個未太熟嘅人到 

二黎,我心急得滯,番到屋企機都無打,八點半已經換好衫,但都好似有啲太早出門口

我都著番日常出街衫,運動型咁。上網見人約女仔出街第一次應該著啲咩,老西個啲真係笑撚死我,其實舒舒服服咪得

毒撚最忌就係咩?就係太有自信。所以都係做番平時做嘅野就好夠,唔做多就係贏。



九點九嘅時候,見到黃曉瑩慢慢行緊過來,我都企左係門口望住佢行過黎。

黃曉瑩行到過黎,面紅紅有啲唔好意思咁講「對唔住啊嘻嘻好似遲左少少」

「唔緊要啦!我都係岩岩到姐~」我企到腳仔開始軟,即刻同佢講 「入去囉?驚一陣多人無位」

「好啊!」瑩道

今晚嘅啊瑩著得幾可愛,灰色嘅露膊衫襯條黑色嘅牛仔褲,頭髮都放番落黎,我諗緊中一嘅佢同依家究竟分別有幾大。



「喂,咸濕仔!係咁望住我唔講野,諗緊啲咩!!」佢突然拍一拍我個頭,即刻叫醒左我

「唔係啊,諗緊點解你依家同中一咁大分別姐,哈哈」我完全唔驚咁係佢面前講左自己諗咩

「好大分別咩?你講下有咩分別?」佢驚訝地問

我即刻拉開話題「叫野食luuu,你想食咩啊?」唔通同你講我中一對你印象麻麻咩

「你食唔食柳槤㗎....」佢問我



我答佢「唔食㗎,但係你想叫黎食就食囉,我都無所謂~」

「但係好大陣味㗎喎...」黃曉瑩面紅紅問,好似驚我介意

「唔會啦!你叫啦​」我拍拍心口表示唔驚

其實我真係唔太鐘意柳槤,一黎好撚臭,二黎都係好撚臭。但係佢都話到想食,我都無得拒絕

「唔該~想要一個雪糕豆腐花,要曲奇嘅,一個柳槤珍珠」我揮手落單

叫完野食之後佢就即刻問我 :「快啲好講番岩岩你講緊嘅野!唔好以為我唔記得~」

「我岩岩講咩啊?我唔記得左啦喎​~~」我扮傻諗住可以過到關

「​話咩中一同依家好大分別!你對我以前印象係點嘅先!」佢追問



睇黎真係走唔到,點都要答㗎啦

「你記唔記得細細個有個男仔跌左個筆袋,之後叫你幫佢執番」我問

「我記得啊,個時仲有成班男仔係度」黃曉瑩講

​「我個時都係個班男仔其中,之後聽到你講左句頂你個肺之後,我就覺得你好似好惡,好似好難相處咁。但今年真係認識你之後,又好似覺得唔係喎,你都幾好啊又會幫助人又會提我起身,感覺就好易相處」我慢慢咁講,都完全講哂真話

黃曉瑩即刻好尷尬咁講​「咁我當時真係唔知講咩好,你地咁多男仔係度,我又有啲驚驚地,咪....咪諗住講句粗口打發你地」

​「你知唔知班男仔聽完之後勁撚驚你,包括我哈哈」我講

「知啊,咁咪好囉我又唔想佢地留係度~」黃曉瑩聽到我講個結果好似好滿意



我安慰番佢「唔緊要啦,依家認識左你之後,都覺得好好相處啊,同以前嘅印象原來差好多」

「梗係啦,本小姐易相處你依家先知實在太遲了~嘻嘻~~」黃曉瑩更加滿意自信咁講

呢個時候侍應都放左兩碗糖水落黎,我地都一路食一路傾

我望住佢食第一啖,佢好似一直都唔敢食,係度笑緊我

我問佢「你笑啲乜?我個樣係咪好好笑先」

「唔係啊,你唔覺得係一個唔食柳槤嘅人面前食柳槤,對方個個一直聞住好慘嘅咩哈哈哈哈」黃曉瑩一路笑一路講

「​都幾㗎,原來真係幾臭,我屋企人都唔食柳槤所以都好少會聞」我一路食一路講

我地食緊嘅途中不斷對望,我就一直擺出嬚棄嘅樣,佢就一直笑緊我,氣氛完全唔尷尬,就好似一對小情侶咁



可惜我地唔係。

食完之後我地就去左海旁行​​,因為糖水鋪行多十分鐘就係海旁,個度好舒服,夜晚都無乜人。

我地並肩地慢行,大家都行得好慢,不過黃曉瑩自從食糖水之後就一直笑到依家 

「​​你睇下你依家笑到,仲有無唔開心先?」我即刻問曉瑩

黃曉瑩望住我,停低左「無啦~~依家開心哂!!」

「講唔講得咩事先,定係你唔想講」我問

「唔洗講啦,反正依家我都無事啦,遲啲有咩問題再同你講!」黃曉瑩好快就帶過左



「最緊要開心就得啦!話說,其實你當唔當我係你嘅朋友。」我好認真咁問

一直都好驚佢唔當我係佢嘅朋友,始終好似識得太快就出左街傾計,所以我都想知佢諗緊啲乜

「哈哈哈,唔當啊!你只係我嘅糖水腳~​」黃曉瑩笑住講,都唔知係講笑定認真

我企左係度,佢一直行緊直到發現我停左佢先行番黎

「​傻仔,講笑咋,唔當你係朋友就唔會約你出黎糖水啦~」黃曉瑩笑住我係度講

仆街,係佢面前,我就好似個傻仔咁,不斷被佢撚緊,唔知呢件係好事定壞事。

「​咁我以後就係你嘅糖水良伴了!!」我興奮地講

「係啦係啦,以後我都淨係食柳槤睇你幾時頂唔順!​」黃曉瑩想嚇我

我即刻還擊「驚你有牙啊!我一定頂得順​」

好快就行到佢屋企附近嘅地方,之後大家慢慢行都講左好少野

大家都享受緊海浪同風聲,好快就到左,我自己都唔為意到左

「我到啦,我要番屋企啦!​」黃曉瑩講

「好啦,小心啲喎,番到屋企就同我講聲啦!​」我都開始有啲攰

「你諗住點番去?無左尾班車啦喎」佢問

我即刻扮型「哈哈,我有辦法啦!可能仲快過你番到去添!」

「​睇下點!我走啦送到呢度就得啦,拜拜!」瑩道

「拜拜!你今日好靚啊!​」我大聲叫

佢聽到之後都笑笑口離開

就係咁,我同黃曉瑩嘅第一次見面就係咁完左,我想問佢唔開心嘅原因呢個目標都無做到。

你叫我最渴望 卻也叫我猜不中
已有 0 人追稿