[愛情] [校園] [足球] 我鐘意你 但係我唔可以同你一齊: 14.
番到屋企已經兩點，屋企人都已經訓哂
"叮" 手機突然響起，見到黃曉瑩嘅ig 訊息
2:02am "我番到屋企啦～岩岩一番到去就去左沖涼"
2:03am "我都番到屋企啦！早啲休息啦～聽日仲要番學" 我覆
2:03am "點解你咁快番到去嘅，你唔係搭的士啊嘛..."
2:04am "唔係搭的士啊，秘密！＂
2:04am ＂唔講咪唔講！我遲啲實知，我訓啦，聽日見啦～＂
2:05am "早抖啦～＂
熄左電話之後，我都仲要沖埋個涼先訓得
「早晨喎朗哥，個樣咁攰嘅，腳仔軟啊？」啊婆問
「唔好講經住，跑左番學先」我即刻講
今日要比平時跑得更快，事因我再遲多左班地鐵，所以真係保特咁跑。
番到學校我都己經完全無哂力，尋日訓左三個鐘都唔知有無，但係仲有體育堂，所以想訓教都無得訓。
平時體育堂最活躍嘅我都完全無力，跑唔郁咁，今晚仲要練波都唔知點算
＂喂同學我地玩個熱身遊戲先，糖痴豆有無人唔識？＂體育Miss問
＂馬子朗，出黎做捉先＂
我行過去同個miss講 「我今日好攰啊個人無乜力，你搵過第二個做得唔得啊」
「你跑得快啊嘛，可以帶動佢地跑啊，你諗下，快啲捉完人咪無事可以休息囉」Miss睇黎真係要我做
我拿起色帶，然後開始捉人，跑左一轉，已經捉到個跑得比較慢嘅男仔。佢見我好似無咩力，想追番我。
我光速痴左去最近個啤到，佢捉唔到我之後就好快調轉頭捉第二個
我回緊氣都無留意隔離，我烏低身唞緊氣嘅時候，突然有隻手一野拍左落黎
＂呃啊＂我叫左一下然後再咳 「邊個無啦啦拍我啊！」我大叫
咳完望番上去，見到企係我隔離嘅黃曉瑩係度笑，原來我咁岩痴中左個個就係黃曉瑩
「哈哈哈哈，咁惡做咩喎」黃曉瑩一路笑一路講
「今日真係搞唔掂，跑兩跑都無哂力」 我講
黃曉瑩見我好似真係好攰，即刻問我
「你尋日究竟係點番屋企？你行路都唔會咁快啦」佢講
我答「亡命單車」
「哈哈哈，唔掛得啦，辛苦哂啦送到我番去」黃曉瑩親切地講
「無....無事啦！都係咁岩行到姐！」我有少少怕醜
「仲要人做捉，依家啲老師真係無人性」我講笑咁講
講都未講完，即刻有個女仔痴左落黃曉瑩度，代表住我又要做出去做被捉個一個
「仆街，又黎...走先，拜拜」我細細聲同黃曉瑩講
「哈哈哈抵啦拜拜」黃曉瑩笑得比岩岩更加大聲
出番去避左一陣就完左，基本上完左熱身之後我都己經無哂力，成個人攤左係度。體育Miss都好體諒我，佢都知道我今晚仲有波練就比我休息多左陣。
放左學就直落練波，上完堂仲要訓得個少少其實真係好唔想練，但為左進步，我想贏學界冠軍，我一定會去練，呢個係我一直嘅夢想。
自從C Grade飲恨輸左決賽第二名之後，我就一直都好唔憤氣，明明有好多機會最後都無把握到，最後就咁輸左一球單刀。
「今日會做啲戰術性嘅野，希望各位可以特別留心，我地今年B grade唔係好齊腳我諗大家都知道，但我地目標都無變到，我地要係兩年內贏學界冠軍，攞番我地失去左嘅野！」林sir今日鬥志旺盛
「好！我地今年一定贏！」「好啊！」「好！」其他隊友都比林sir訓話燃起鬥志
相反今日我個人好攰，完全無精神，佢地好有鬥志咁我都無乜反應。
練習開始，今日會教啲進攻嘅變化，我打右翼嘅職責係出波餵入中間比前鋒
個波黎到我度，第一球，我漏左，第二球，控唔好
「喂，子朗，做緊乜啊，發完夢未啊」林sir嚴肅地講
「唔好意思 sorry sorry」我無精神地道歉
第三球，攞得到個波，推左兩腳，出波！
落左底線。。。
「子朗你出黎休息，啊xxx你換入去打右邊」林sir大鬧
我無氣地跑番後備席，林sir見我唔太對路都比我回完氣先
「你今日搞乜撚野？」林sir用個好惡嘅語氣問我
「對唔住啊，我尋日休息得唔夠，係我踢得唔好。」我死死氣地說
「你休息一下，望下出面係點樣做，對你黎講唔難嘅」林sir講
我即刻道歉 「對唔住啊，唔會有下次」
「我知道啦，你平時練習表現都好好嘅，人都總會有唔得嘅時候，就當今日比你休息下啦」林sir突然做左公道伯
「我....我仲有正選㗎可...?」我慌忙地問
「梗係有啦，你係團隊入面好重要嘅一塊拼圖黎，快啲攞番好個狀態」林sir拍拍心口
隨後林sir就出番去教波，我就自己坐左係度休息
＂雖然話就話唔會，但會唔會之後真係要坐後備席...＂
心入面突然彈出左句 原來她不夠愛我 原來我坐後備座
好撚驚，雖然對自己都仲係有自信，但點都會有少少驚。
過左十五分鐘之後，我飲左啖水就出番去，依家已經好左好多，起碼比腳波都有番啲力同係準嘅
之後嘅訓練都好順利，我都追得番進度，其他隊友見我入番黎都多左比波我做，當做鼓勵我咁。
直到依家都好多謝好多謝有呢班咁好嘅兄弟同我經歷咁多事
完左訓練，一如以往地同啊婆，啊賢佢地買野飲。
「朗哥，估唔到真係講中左一開波就腳仔軟喎，尋日做左啲咩先，嘻嘻」咸濕賢一如以往地都係想聽色情野
「無啊，尋日夜訓左啲姐」我用平淡嘅語氣咁答
啊婆即刻亂入 「今朝都未問你，你尋日搞乜」
「咪都係傾下計，正正常常食下糖水咁囉，之後」我答
「之後？！」「之後！！！！」其他人起哂哄
「咪行下海旁送左佢屋企樓下囉，無乜特別」我再講
＂屌＂ ＂無撚用＂ 講完呢句聽到嘅回覆大概都係呢啲
「咁點解你今日表現麻麻地嘅，你唔係應該狀態大勇嘅咩？」啊羊問
「人地個可能心唔係依度呢，咁快就心不在焉，得唔得㗎你」啊行即刻串我
「尋日無尾班車，又要踩埋啲公共單車番去，攰到死，番到去又訓得兩個鐘，神仙都頂唔住啦」我已經被人問到無哂力
「唉你自己睇住啦，黎緊又有班會活動又有運動會，我驚你個小子朗頂唔住」啊婆搭住我話
「得啦，又唔係溝女，驚乜鬼」我講
好快大家都番左屋企休息，我番左屋企都直接係梳化訓著左