[愛情] [校園] [足球] 我鐘意你　但係我唔可以同你一齊: 15.

經過左糖水約會一事之後，都無再有特別野發生

我嘅生活都係練波，番學同訓教，多左樣野就係有陣時會同黃曉瑩打字吹陣水先訓

都係朋友個種嘅吹水，講下學校嘅日常，無乜特別

一個禮拜後就係我地嘅運動會，中學嘅運動會有兩日，第一日都係啲初賽，第二日先係最重要嘅班際4*100同其他決賽

今年我報左兩樣野，同班兄弟一齊玩下嘅800米同100米短跑。



仲有每年嘅4*100我都係直接入選，因為每年我都係班上面跑得最快個幾個，所以我都已經習慣左。

第一日都係hea下跑800米同跑個初賽100米，所以都叫做輕鬆，平時練波仲攰。

集合完點個名，第一個項目就已經係800米，所以我都同啊婆佢地一齊落去

臨走前見到黃曉瑩坐左係度，佢見我起左身就問

「你報左800米咩？」黃曉瑩問



我答佢「係啊！同佢地hea跑下吹陣水，反正都無得贏～」

「好啊，哈哈我今年無報到野，所以都係做觀眾」曉瑩食住零食講

「你就好啦，我個體育Miss叫我報多啲野玩，我又唔識拒絕，咪是但報左啲野囉，一陣仲有100米聽日仲要跑四一」我無奈地講

「好啦，加油啦～」黃曉瑩笑得好靚....

「收到你！！希望唔好訓低就得啦哈哈」我點頭講笑



佢笑住講　「咁你一陣唔得就比訊號我，我叫定白車 XD」

「落去啦，拜拜！」我甜笑住行落去

落到去佢地己經齊哂人，換哂鞋

「喂，一陣間開始大家一齊慢慢跑等大家齊人，慢慢享受下就算」啊羊同我地一齊係起跑線到講

「梗係啦，一陣等朗哥慢慢追上黎啦，人地腳仔軟」啊賢去到今日都仲串緊我

「你都傻嘅，我等你就真，肥仔」我串番佢

因為800米係全部人一齊起跑，所以我地五個都好有默契咁，起跑慢慢跑，等啲認真撚跑走哂先，我地先開始我地嘅旅程

見到看台嘅人都岩岩好先番埋位，都無乜點留意個賽事。



我一路跑一路問佢地「喂，你覺得我地咁樣跑會唔會比啲老師屌呢？」我地已經慢慢跑左一個圈，認真跑個啲人都就黎衝線　

「唔知喎，咁總有人跑得慢啲㗎嘛好似我地咁，哈哈」啊行講

「屌不如去到最後一百米我地用全力火影跑，最後個一個衝線請野飲！」啊婆見台上都無乜人留意就諗住玩下野

「就咁話啦」我點頭，差唔多跑到最後一百米，我地都好有默契咁留係一百米條線到

「準備啦，Set，Go!」我大叫

大家都拿出平時練波嘅幹勁，五條友火影上身一樣，雙手放後，用全力跑，為嘅就係唔想輸野飲。

看台上嘅人開始留意到我地，聽到少少笑聲



雖然啲人係度笑，但中學回憶其實就係咁樣制造出黎，啊行第一個就衝左線，啊婆同我都隨後過左終點

最後就係淨番啊羊大戰啊賢，呢個時候，勝負已分，啊羊以一個馬鼻嘅距離快過啊賢。

我地全部衝哂線之後，聽到好多人拍手同笑聲，好似做左個幾好氣氛嘅開頭。

「多謝賢哥」我地全部人拿住支寶礦力向啊賢道謝

「我同你地講，下年我唔會再輸」啊賢好唔憤氣地講

「你買定都得啦，下年嘅結果都會係一樣，哈哈」啊羊贏個馬鼻威到串佢

「屌你」啊賢講

好快我地都番左去看台，各有各休息，好多同學都同我地講番火影跑嘅事，估唔到原來有咁多人望住，都幾柒下。



見到黃曉瑩聽到我同其他同學嘅火影跑對話都係度笑緊

之後都無咩特別，100米初賽都如常地出線，所以話，其實第一日真係好悶，望下啲高年班嘅靚女跑下步，跳下遠

大家都帶左相機影相，我都唔例外，影左少少就完左第一日，通常影相都係第二日影，因為決賽贏左有獎牌影好似有feel啲。