之後呢幾日,係學校見到大家都會講句hello,放學夜晚見到佢地有keep住係skype嘅群組入邊講電話,我都會入去傾下計,講下花生野。

啊銀同啊鋒都仲未入黎,我都唔係好清楚點解,但氣氛己經完全唔尷尬,開始融入到佢地嘅話題。

話咁快就去到左星期四,班際足球比賽嘅第一場,今年我地級有六班,所以分左兩組,每組最高分嘅兩隊就會入四強。

我地D班第一場對B班,陣容就係我,啊羊,啊行,啊維(足球隊後備),同埋龍門啊銀

B班嘅人馬唔算勁,好似全部都係籃球同田徑隊,所以我地都唔係好緊張。



啊柔同曉瑩都買左飯過黎睇波,唔知道曉瑩過黎睇係為左睇我定係真係純粹睇啊銀嘅處子戰呢....

"咇!"好快球證就吹左雞,B班嘅隊型都好分散下,真係唔太似識踢波咁。

我攞住個波,爆一爆,就入左佢地嘅禁區,呢個時候仲淨底三個防守球員,其中一個衝左上黎搶我波。

我用個美斯著名嘅Shoulder fake 假動作,當我膊頭向左嘅時候,防守緊我嘅球員都以為我向左,但我一個轉向右邊,佢已經眼望望,身體卻跟唔上我,直接比我過左,仲要跌左係度,聽到觀眾嘩左一聲,好多笑聲。最後連埋龍門仲有兩個防守球員

​「朗!」啊行後上大叫,見到啊行跑到禁區,一個通透嘅直接蕩穿兩個防守球員嘅中間,啊行接到嘅時候已經係單刀一打一龍門



啊行細腳睇準,射入網仔。"咇咇!"一比零,觀眾席嘅學生都紛紛拍手,有啲就目瞪口呆講唔出野,見到啊柔同曉瑩都好大聲歡呼緊。

開波三十秒,我地就已經入左波,我地四個都無慶祝,因為知道我地入波係應該嘅,我拍左下啊行隻手就行番去自己半場。

相反,見到啊銀好興奮咁慶祝緊,仲要叫得好大聲「好野!好波啊大家!」

「放心啊銀,你好快就會有得出黎踢」我同佢講

好快又繼續開波,我地都繼續逼搶,我睇準時機加快壓力,迫到對面中場一個傳失,導致係我地嘅界外球。



我係後場邊線
將個波傳係啊羊腳中,啊羊攞左個波之後,轉身突然係中圈二十碼大腳抽射,力度可以話係無得救,對面龍門掂到個波但都無阻入網。"咇咇!"二比零

"嘩""嘩好勁啊!"觀眾席全部人都比啊羊嘅射門嚇親

啊羊都無乜反應,好似第一球咁行番番去自己半場,平時練波都知佢成日係鵝眉月頂練遠射,所以佢係呢到射得入我都知道呢啲就係訓練嘅成果

「勁喎,真係比你練到番黎」番自己半場嘅時我拍拍佢講

「還好啦,我都射得唔準」啊羊好似對自己嘅入波唔太滿意

雖然我好想比啊銀出黎踢,但係我都想入多過三球先比佢出黎,穩陣啲好。

B班佢地好似傾好左啲野,見到佢地個陣型都唔一樣,"咇!"再次開波

我地好快就迫走左佢地個波,當我攞番個波嘅時候,對面即刻有三個人跑過黎迫我,我做唔到啲咩,轉身都轉唔到,想傳波比啊行嘅時候,其中一個進攻球員搶走左個波,開始進攻。



情況有啲不利,得番啊行一個對住三個進攻球員,我都趕唔切番去,啊行都比佢地三個傳到防守唔到。對方捉到時間用力起腳,力度唔比啊羊嘅射門差

"無啦呢球我估,啊銀都係新手龍門"我係中場望住個波飛緊去啊銀面前心諗

"碰!"啊銀飛身用單手岩岩好撲走左,角球

「嘩!!!啊銀你咁勁㗎咩!」我跑番後場大叫

「哈哈,我都係學英超啲龍門,但我隻手依家好痛」啊銀苦笑

防守完角球後,半場嘅哨子吹起,我地番去休息嘅時候,啊銀隻手好似紅左

「啊銀你仲得唔得?我地可以換個龍門㗎喎,唔洗死頂」啊行問佢



「我得,你地快啲入多幾球比我出黎啦哈哈」啊銀講笑道

「佢地依家一見啊朗攞波就幾個夾佢,啊朗你諗住點?」啊羊問

「一係你同啊維留係後場,我試下同啊行上去二打四」我講

啊行即刻屌左我兩句「好心你岩岩就唔好咁驚,上去扭佢地啦,你又唔係過唔到佢地,唔洗咁驚」

佢呢句都點醒左我,「我岩岩都唔知做乜,佢地三個突然咁樣我嚇撚親姐,無下球」我有信心咁講

"咇咇!"球證示意休息時間結束,我地都好快入番球場

下半場正式開始,B班嘅人好似都專注左好多,比波都準左,但係好可惜佢地嘅程度都比唔上我地經過校隊訓練嘅我地,傳左幾腳就比我地迫甩左。

啊行係前場比左個波我,同樣嘅情況再次出現,三個人即刻衝上黎想包夾我,就連本身防緊啊行嘅球員都跑過黎,好似同我宣戰一樣。



今次我無再驚,無再想回後,聽到啊羊大叫左一聲「去!」我就知道我應該要做啲咩

我高速盤球,用速度將其中一個解決,前方仲有兩個,一左一右,兩邊都無得去。

正當佢地咁諗嘅時候,我一個從右到左嘅牛尾巴穿過左右邊防守球員嘅雙腳中間,再高速走入去佢地兩個人嘅中間攞番個波,佢地己經反應唔切,只能夠望住我同龍門嘅一對一。

龍門出迎,但佢出迎嘅時候我望到左邊有個空位比我射,當然對方嘅龍門都同啊銀差唔多經驗,所以破綻好大。我細細力no look射左去龍門無可能撲到嘅左面網仔,就好似表演緊一樣,"咇咇!"三比零

入完後我即刻跑番龍門「啊銀,係你嘅表演時間啦」我換出左班上其中一個後備龍門,然後比啊銀出去踢。

我坐係觀眾席休息,因為我今場嘅工作都做哂,波都入埋,觀眾席見我換走都拍手歡呼。我坐左係黃曉瑩同啊柔隔離,佢地見到啊銀出黎踢都好期待,「加油啊啊銀!」啊柔大叫

「勁唔勁先,哈哈」我問佢地



「勁啦,你一個過左三個喎!」啊柔即刻興奮地講

「算你有留意啦~」我講

黃曉瑩係佢手中拎左支寶礦力出黎比我,然後講「球星你嘅」

「嘩!多謝哂!有無留心睇到我入波先嘻嘻」我甜甜笑住問

「有啊!雖然我唔係好識睇波,但我有見到有三條友夾住你你都入到波,果然係足球隊」黃曉瑩講嘅時候,留意到佢面紅紅地

啊行係呢個時候搏到球十二碼,正當我以為準備四比零嘅時候,佢讓左比啊銀射。

「嘩,今次好睇啦,啊銀嘅處子戰係咪會有波人咁癲」我同班女仔講

「如果佢真係入左佢嘅處子戰就真係完美啦」啊柔講完之後即刻大叫「啊銀加油啊!!射入佢!!」

啊銀放好個波,睇得出佢好緊張,步法唔係太穩,起腳直射左邊!龍門捉到路但好可惜遲左一秒先反應到啊銀嘅射門,"咇咇!"四比零

啊銀好興奮咁跑左過黎觀眾席慶祝,同我同曉瑩佢地拍哂手,又搞埋啲球星著名入波動作,搞左勁撚耐。

「連啊銀都入到波,真係痴撚線,有邊個會諗到」我講

「啊銀好波啊!」曉瑩同啊柔大叫左一聲

聽到曉瑩咁樣叫之後突然心情有啲唔好,唔知點解個心有啲唔舒服。啊銀入波佢就叫到咁樣,但我入波好似就無咁

唔通我係妒忌?定係我入波嘅時候聽唔到曉瑩大叫,所以依家聽到會唔開心。究竟我入波嘅時候曉瑩有啲咩反應呢,定係佢對啊銀有野呢。

我好想知,只但係我唔敢問,我唔想搞到我地之間好尷尬,呢一支野飲究竟又代表啲咩,會唔會其實啊銀都有。

我坐左係佢地隔離諗左好耐,球證都吹雞完場,四比零嘅賽果,大家各入一球,我估啊銀係最滿意嘅一個。

「喂,馬子朗,完場啦,你係咪要出去握手?」「喂,喂!」黃曉瑩拍一拍我我先回番神

「啊!係啊係啊,我出去先啦,班房見啦~多謝你今日黎睇我地」我係黃曉瑩耳邊講

「記住飲哂支野佢啊!拜拜~」曉瑩揮手

就係咁,我中三嘅第一場班際足球比賽就係咁完結,之後都仲會有其他賽事,對我地最有威脅嘅應該係C班,姐係啊婆個班。

 
已有 0 人追稿