[愛情] [校園] [足球] 我鐘意你 但係我唔可以同你一齊: 22.
我地下一場嘅班際係一場硬杖，雖然都係分組賽，但我地對嘅係C班，姐係啊婆同啊賢嘅班別。佢地應該係唯一一隊同我地最有冠軍相嘅一隊。
我同啊羊同啊行都特別留底睇佢地對A班嘅比賽，啊賢基本上一個就可以守得住成條防線，雖然A班嘅人都唔勁，得一兩個足球隊，但係啊賢嘅防守能力實在係太好。
＂唔知我地班有無可能攻得破佢嘅防守呢？＂ 我坐係觀眾席心諗
話口未完，啊婆就己經一人推住個波直接衝上A班嘅三人防線，作為正選中場嘅佢，好簡單用左幾個假身就過哂啲人，亦將個波輕鬆送入網。
同我地唔同嘅係，佢入完波之後成個傻閪咁向觀眾席慶祝。用佢最鐘意嘅球星尼馬嘅動作 - 巴西舞，觀眾們都紛紛拍手歡呼，但係我真係忍唔住笑
「屌你睇下佢，成個傻閪咁，真係好撚好笑」我笑撚住同啊行講
「哈哈哈哈，真係成個傻閪咁，睇下到時對我地仲有無得慶祝？」啊行都笑鳩佢
好快，C班都以5比0嘅賽果大勝A班，我地睇完都番左去。
XXXXX
依家番到屋企夜晚臨訓前有個習慣，就係會入skype睇下佢地係唔係入面傾緊計，今日因為練完波先番屋企所以我入去嘅時候佢地已經傾緊。
＂嘟！＂入到去通話嘅時候都會嘟一聲，會比人地知道有人入左黎
「喂喂喂！啊朗，你入黎就岩啦，我地傾緊啲野想搞，不如我地呢到幾個加埋啊鋒啊銀佢地搞個BBQ？」啊柔一見到我入黎就率先問我
「喂早晨咁多位，你岩岩講BBQ? 會唔會太少人啊我地？」我問
「我地都覺得太少人，所以諗住大家都叫啲朋友黎，每人帶一兩個一齊玩下咁，你點睇？」曉瑩講
「我無問題啊，十幾個人都幾有feel啊~但係邊到有地方比我地燒？學校？」我再問
呢個時候好少講野嘅啊靜出聲「我屋企個會所有得租場，所以諗住過黎我呢到」
「咁就掂哂啦！就咁話啦，今個禮拜六你地有無問題？」啊柔興奮地問
「我ok」「ok」「我可以啊」我地三個都同意左
「咁就咁啦！有其他資料就聽日講啦，今日又班際又練波攰到傻左，訓先啦」我同佢地講byebye
好快我就訓左，平時都會睇多陣電話先訓，但今日真係好攰
「喂！你今個禮拜六得唔得閒？有野醒你」朝早番學嘅時候我問啊婆
「做咩，每次你講有野醒我都唔係啲咩好野黎㗎喎」啊婆半信半疑
「今個禮拜六有個BBQ，重女局」我嘗試用重女呢個字眼吸引佢
「重女！？屌最衰我星期六約左人，下次啦，啊羊好似得閒，你問下佢」啊婆有啲失望，可能因為真係第一次唔係玩佢
番到學校，訓左兩堂又小息。「喂，你今個禮拜六得唔得閒」我行過去問啊羊
「得啊，有咩路數益我先」啊羊問
「星期六，BBQ局，重女唔係講笑」我用同樣嘅口吻吸引佢
點知佢竟然好順攤咁答應左「得，有無女都到，我都好想燒野食」啊羊三秒都無就答應左
咁就搞掂了，搵到個朋友同我去，多啲人好玩啲，我都無野需要煩。
小息完左之後，今日上嘅堂都係悶到死，基本上係可以比我訓成日。
點知 ＂同學我地今日黎個突擊測驗，考番上個禮拜學嘅野，唔合格嘅就留堂溫書溫到合格為止＂
仆街啦，我咁大個仔，小學到中二都未試過突擊測驗，依家同我講玩埋啲咁嘅野，仲要留堂。
我即刻望住身邊嘅人，諗住睇下有無人救得到我，比我抄下答案咁。佢地嘅眼神同我一樣都－絕望。
我就知道，今次真係仆街了。
我向後望住黃曉瑩，諗住佢都可以幫下我，問「大佬，你識唔識上個禮拜啲野啊，我唔想留堂啊鳴」
「我....可能仲廢過你，我唔訓教姐，唔代表我有聽書㗎嘛」黃曉瑩都失落咁講
講都未講完，份圈就己經派左過黎.....
我望落去，第一題，＂根據《山居秋暝》的課文內容，「隨意春芳歇，王孫自可留」中「隨意」一詞是甚麼意思＂
我屌你啊，我連呢句野有出現過我都唔知，點做.....
我跳落第二題 " 根據《廉頗藺相如列傳》（節錄）的課文內容，「今兩虎共鬥，其勢不俱生。」一句中「生」字是什麼意思 "
最後我選擇左訓教，有啲咩今晚放學再算。反正我地咁多個人都唔識點做，應該有好多人留堂，就一齊留到學校收，佢地都奈我地唔何
放學嘅時候，我仲諗住一完就跑出課室，避過留堂一事。點知一響鐘，個啊sir己經係出面等緊。
我企左係門口死死氣地行番自己個位，準備迎接自己嘅死刑，黃曉瑩見到我呢個舉動都大笑出聲
「笑咩喎，我諗住可以即刻跑出去點知佢係門口等實我地咁痴線」我見到佢笑我然後同佢講
「啊柔同啊靜都唔洗留堂，一陣放學懷疑要自己走，慘到」曉瑩悶悶不樂道
「咁一係我同你放啦！突然好想食麥旋風無人陪都食」我問曉瑩
佢聽到麥旋風三隻字之後隻眼放大左，然後興奮咁講「好啊！！我都好耐都無食過啦，咁我地放左學就即刻去啦 yeah!!」
曉瑩似乎好鐘意食野，佢每次聽到野食佢都會好興奮好興奮，成個小朋友咁。
留堂嘅補考亦都開始左，但我地邊有可能一個下午咁快就會突然間識。到最後，個啊sir 6點鐘都放左我地走，睇黎真係對我地無咩辦法。
本身平時同我放學嘅啊婆因為係第二班，所以佢己經一早走左，我都唔洗比佢知我同黃曉瑩放學。
放學之後，我就同曉瑩肩並肩咁一齊行，有講有笑，講緊我地星期六BBQ想食啲咩同帶邊個朋友，其他同級嘅同學見到我地都帶有疑惑嘅眼神，彷彿就好似想問我地係咪一齊左嘅樣。
好快我地都去到麥當勞，「唔該啊姨，想要兩個麥旋風，一個曲奇，你要咩味？」我問曉瑩
「我要聰明豆！」佢興奮地答
「一個曲奇一個聰明豆唔該哂～」我同啊姨職員講
「好啊細佬，咁夜先放學嘅你地？」個啊姨無啦啦問
「係啊，比老師留堂哈哈」曉瑩幫左我答
個啊姨整完我地嘅麥旋風轉身，比我地「拿你地嘅麥旋風啊，小心比老師睇到你地拍拖啊！拜拜！」
「啊姨，我地其實....」正當我想解釋嘅時候，個啊姨已經招呼緊我地後面等緊嘅人。
曉瑩都好似無聽到個啊姨講野咁，好快就拎住佢嘅麥旋風食
「嘩！正！好耐無食過啦！」曉瑩食完一啖之後滿足咁講
「你鐘意食聰明豆㗎原來，你係我第一個識嘅人叫聰明豆」我同曉瑩講
「係啊！我覺得聰明豆同個雪糕好夾！襯番我個人，咁聰明嘻嘻」曉瑩自信地講
「你聰明嘅話，就唔洗同我一樣呢個鐘數先番屋企啦蠢人」我講笑咁串佢
「咩喎！我真係好醒㗎！不過唔係讀書個方面姐嘻嘻，你唔食聰明豆你先蠢！」曉瑩聽到我講野之後扮嬲咁講
佢扮嬲嘅時候真係幾得意，好少會見到呢一面嘅佢。平時我地係學校都係好普通嘅同學關係，就好似得我地兩個人獨處嘅時候先可以見得到呢一面。
我地一路行一路食，食緊嘅途中曉瑩都好專心食緊佢嘅麥旋風，而我就不停係到諗緊岩岩啊姨講嘅野
乜我地真係好似情侶咩？連啊姨都係咁諗嘅時候，其實黃曉瑩佢嘅諗法又係咩呢，佢會唔會都對我有啲好感呢。
而我，當我望住佢扮嬲同見到佢見到食野成個小朋友咁，我會好想保護佢嘅感覺，而我都好似比佢吸引住左，會好想見多啲佢呢一面。
我諗，我會唔會係鐘意左佢....
正當我自己腦補到呢個地方嘅時候，曉瑩突然拍一拍我將我帶番到現實「喂！我到啦！個麥旋風都比我秒殺左啦哈哈！」曉瑩食完笑住地講
「噢，好啦，我行呢邊去地鐵站，你番到去就講聲啦！小心啲啊」我講
「知道啦！聽日見啦，多謝你個麥旋風嘻嘻，拜拜」曉瑩揮手道
「拜拜！」
你似美麗城堡的一個待嫁的女巫有著各様法術，一再施法使我迷倒