今日係星期六,亦都係BBQ嘅大日子,事關啊靜住嘅地方同我好近,行三分鐘就到所以我都訓到好晏。

訓醒嘅時候已經四點半,我地約六點。都仲有個半鐘時間比我打多幾場FIFA,再準備下。

我同啊羊約左早啲係地鐵站等,因為佢唔識去,啊鋒同啊銀好似已經去左買野同啊柔啊靜準備緊。

其實我有諗過同佢地早啲上去準備,但係我訓到呢個鐘數都應該幫唔到啲咩,最多一陣我搞開火。

我早左少少就到左地鐵站等啊羊,亦都見到佢行緊過黎



「喂,快啲行啦!我成日無食野啦,好肚餓」啊羊見到我之後講

「我都未食野,岩岩先醒」我答

正當我地行到去啊靜屋企樓下嘅時候,我打電話比啊靜

「Hi啊靜,我地係樓下啦,你落黎接我地?」我問啊靜

突然出左啊柔把聲「密碼係xxxx你一陣自己上黎啦,係喎!啊瑩仲未到,你一陣去接埋佢啦,佢好似唔識路。」



「哦,好啦有無野要買上黎?」我問係電話嘅啊柔

「買多樽蜜糖上黎」啊柔好似好急促咁講,好快就收左線

收左線之後,我企左係大門出面問啊羊「啊柔叫我番去接黃曉瑩喎,我地好似要番去」

「下,我好肚餓啊,大門密碼係咩啊,我自己上去先啦一係」啊羊好似好想上去

「xxxx,咁你上左去先啦,我一陣上黎」我回啊羊



臨走前,見到啊羊好似露出左一個好奸猾嘅樣貌,唔知係咪我睇錯呢。

呢個時候,"我沒有為你傷春悲秋不配有憾事"電話響起,係黃曉瑩

「喂~?你係邊啊?我唔識路,啊柔話你好似過緊黎接我?」曉瑩溫柔地講

「我行緊過黎啦,二十秒後到」我聽到佢話到左都加快左腳步

係遠處已經見到黃曉瑩,佢著住左一條吊帶嘅上衣加條牛仔褲,同上次我地單獨出去食糖水嘅感覺好似

放假嘅佢顯得好日系,佢見到我嘅時候都行左上黎「馬子朗!」佢興奮咁叫我

「早晨啊,曉瑩姐,我地要去超級市場買少少野再上去」我甜甜笑住覆

「早咩晨啊!依家六點啦!我地要遲到啦!」曉瑩急促咁講



「我起左身無耐咋,同埋我地要買野遲少少都無所謂嘅~」我安慰佢道

行到超級市場,攞完支蜜糖就行去比錢,途中見到曉瑩停低左望住一包大棉花糖若有所思。

「喂望咩啊,比錢啦」我同佢講

「好啦....」曉瑩好似有啲不捨咁望住個個方向離開

排緊隊嘅時候,我係到諗,其實佢係咪想買個包棉花糖?但係如果我睇錯嘅話其實佢係睇緊其他野嘅點算

「你等我一等,幫我排住隊先。」我同黃曉瑩講

「哦...好啊」佢好似有啲不解我做啲咩但係都留左係到排隊



我行番去攞左兩包大嘅棉花糖之後再行番去曉瑩到,"希望我唔會估錯啦..."我心諗

去番排隊嘅時候,已經見到曉瑩行緊上去比錢,我跑番去將個兩大包棉花糖放落去比錢個到,然後比錢

曉瑩見到我呢個舉動好似好驚訝,然後甜甜一笑。見佢笑得好燦爛,我就知道我應該無估錯。

「你又知我想燒棉花糖食嘅!」比完錢之後曉瑩笑住問我

「見你臨走前望住個方向停左一停諗緊野,所以先估下你係咪想食,所以就跑番去買左」我解釋道

「好野!我地上次班會活動都無燒到棉花糖,我想燒好耐㗎啦!但我驚佢地未必食,所以都唔敢買」曉瑩講

我拍拍心口講「放心,佢地唔食我都會同你食哂佢嘅!但我估佢地都應該會食哈哈」

傾左陣計我地都行到去啊靜屋企樓下,準備上去,希望唔好係最遲啦。
已有 0 人追稿