[愛情] [校園] [足球] 我鐘意你 但係我唔可以同你一齊: 25.
之後都無咩特別，好快我同曉瑩都比佢地叫左番黎執野。
「係喎，一陣有無下場？」啊鋒問
「係囉係囉！不如搵啲野做再番屋企啦！」啊柔附和
我即刻興奮咁講「都估你地會有下場，有無話想做啲咩先」
「我想飲酒」其中啊朱同啊銀都咁樣講
「但係我地都未夠歲數買酒喎，邊到黎酒比我地啊？」曉瑩問
我平時附近有間士多仔同個老闆娘好熟，佢都照賣比我，如果我依家去仲趕唔趕得切呢？
我睇一睇手機，九點半，我記得好似十點先收
「我諗我有辦法，不過我要依家即刻去買酒，如果唔係就可能趕唔切」我即刻同大家講
「邊到有酒比你買？」啊銀不解咁問
「我平時都會係附近有間士多仔到買酒飲下，老闆娘同我熟又唔理，我估應該可以買到」我解釋道
啊柔即刻講，「咁你同啊羊去買，之後我比我地去左邊嘅地址你，你再搵我地啦！唔該哂啦～」
「好啦，我好快番黎～」我講
臨走前見到曉瑩望住我呢邊，講真其實有啲想叫埋佢去，但無理由叫個女仔去同我搬酒。
落到樓下，我急步行過去士多嘅方向，啊羊都跟唔上我嘅腳步
佢停低左，我見到佢停左都番去搵佢
「快啲啦！佢十點收㗎啦！」我同啊羊講
佢望一望錶「仲有成半個鐘先收檔，你步程都係十分鐘姐，你行咁快做咩啊」
「你唔好理啦，一係我去買先啦，你一陣再追上黎囉」我煩燥咁講
「你係咪想快啲見到人姐其實」啊羊呢個時候講左一句我回應唔到嘅說話
我無講野，因為我唔知道點同佢講，我亦都唔否認呢個事實，係，我心入面係想快啲見到曉瑩，但我都唔知道點解我會咁想見到佢，我係咪真係鐘意左佢。
見到佢同其他異性有講有笑我會妒忌，見到佢望住野食嘅樣我會覺得佢好得意，呢種感覺好獨一無二，其他女仔比唔到我。
我放慢左腳步，跟住啊羊嘅步速行。點知啊羊行得快左好多，到我跟唔上佢，「喂！你唔係話唔好行咁快咩？」我問係前面嘅啊羊
「你唔係要快啲咩？行啦，一世人兩兄弟點會唔知你諗緊乜」啊羊同我講
聽到佢咁講之後，我有啲想咀啖佢，好似就算我唔洗講啲咩好，佢都會知道我諗啲乜，呢種兄弟真係一世人得幾個。
當然我無咀落去啦，我唔是基的。
好快我哋都去到士多到「啊仔！今次帶埋朋友黎喎」老闆娘見到我同啊羊講
「係啊！我哋今日去左燒野食啊，仲有好多人，我可唔可以要三打藍妹啊？」我問老闆娘
「梗係得啦~你攞唔攞到㗎？好重㗎喎」
「得㗎啦，我地兩個壯男點會拎唔到哈哈」啊羊講笑道
老闆娘抬左兩箱啤酒出黎 「拿，呢道齊㗎啦，見係啊仔收你平啲啦！」
「咁多謝哂啦靚女姨姨」我窩心地講
「口甜啦衰仔」姨姨揮手道
啊瑩都係電話比左佢地嘅地址我地，係一個好大嘅公園，有好大塊草，朝早比人野餐個啲。
我同啊羊抬住一人一箱嘅啤酒慢慢行去個公園到，的確我係好心急，但係箱酒真係太重，無得唔慢慢行。
幾經辛苦，終於行到去公園，見到佢地圍左個圈坐，好似傾緊計等緊我地。
「喂～講緊咩啊你地～」我行到就即刻放低箱酒係圈中間問佢地
「無啊，我地岩岩都係認識緊大家，講下八卦野咁」啊鋒講
「玩咩先，依家有酒啦你地想做啲咩先」啊柔望住啊銀同啊朱問
「唔知啊，玩下真心話大冒險囉！答唔到嘅就要飲！」啊銀提議
我見啊瑩隔離仲有少少位即刻扮唔為意咁坐係佢隔離，然後講「好啊，啊羊快啲坐低啦，開波啦」
啊羊坐低左之後都好快開始左遊戲，「啊羊你轉個樽啦，你最後一個坐低你轉先」啊朱講
「好啊，黎㗎啦喎！」啊羊開始轉
「唔好啊」「唔好中我啊唔想咁快飲酒住」大家都好驚咁大叫
個樽轉左好耐，最後支向啊鋒身上
「真心話定大冒險！？」啊柔笑住用手指指向啊鋒問
「呃，真心話囉」啊鋒無奈地說
我仲以為頭幾條問題大家都會錫住黎問，通常都係玩落去先會愈問愈深入，點知....
「你依家有無鐘意人！」啊柔第一題就問呢啲，睇黎今次都係兇多吉少。
啊鋒聽完個問題之後，諗左一陣，拎起自己嘅酒樽，正當我以為佢要飲嘅時候。
「有」佢放低手上嘅酒樣講
「Woooooo」「啊鋒估你唔到喎」全場聽到啊鋒嘅答覆之後起哄
見到啊桐嘅眼神帶住有啲疑惑，唔知佢係咪啊鋒嘅心上人呢？
好快啊鋒就攞起中間嘅酒樽，好似想快啲下個等佢唔再係討論嘅對象
酒樽亦都同時轉緊，停左係我同啊羊嘅中間
「咁樣姐係點先，拿，好明顯係近啊朗多啲㗎」啊羊講
「唔係啊，中間喎，重新轉過啦啊鋒」我提議
啊柔好唔滿意我地嘅答法，提議左一句「不如你地兩個都答哂啦！」
仆街啦，咁快就要答呢啲問題
「呢條問題問哂你地兩個，你地上一次鐘意人係幾時」啊朱向我地問
「小四」啊羊好爽快就答左，點解佢可以完全唔驚，雖然呢條問題比起上一條真係唔太難答，但我隔離坐住嘅係曉瑩，都有少少尷尬
「呃....中一囉」我慢慢講
曉瑩聽到之後笑左一笑，然後係我隔離細細聲問 「同班同你坐個個啊？嘻嘻」
我塊面仲紅過岩岩，因為真係好尷尬「你轉到我再答你啦」我眼神閃避
「你一陣再轉到你自己我實問！哼！」曉瑩扮嬲咁講
「下個轉你先哈哈，我已經喵準好你」我同佢對望眼神確定咁講
最後，當然無轉到佢啦，我真係自己轉番自己，我屌
「嘩，你真係好好彩喎，咁想我地問問題，哈哈」啊柔同其他人指住我黎笑
「唉，快啲問啦」我已經生無可戀，準備好要飲酒嘅覺悟
「你依家有無鐘意嘅人或者對人有好感！？邊個！？」今次到啊桐問
仆街啦，點解唔係曉瑩問佢個條問題，起碼個條己經係以前，唔係問依家咁尷尬
我停左係到諗，究竟我講唔講好，因為我唔想咁快就飲酒，我都驚會醉。
「有啊」我過左一陣先答佢地
「咁係邊個先～」曉瑩突然跳左出黎問
「唔係就咁答有定無㗎咋咩？？」我問
「依家梗係愈問愈深入㗎啦！」啊柔即刻解釋，好似好想我答
我的確係對曉瑩有意思，但我真係未知道呢一種係好感定鐘意，如果我講左出黎會唔會大家都難做，萬一佢對我係無興趣嘅話，我會唔會同佢變得尷尬。
我慢慢攞起酒樽問「飲幾多」，是關我係第一個要飲嘅人，佢地最後提議我飲哂成枝
我拎起枝樽，一野將成枝啤手飲哂落肚。
唔知點解係個一刻，我無勇氣講出黎，我想自己都搵到我係對曉瑩係好感對鐘意呢一個答案。另一個原因係，我唔敢聽到我講完之後佢嘅反應係點，如果唔係我想要嘅答案，我又接唔接受到呢？如果佢唔係對我有同樣嘅感覺，其實同每個男仔私底下相處都係可以做到最真嘅佢又係點呢。
我唔想知道，至少我呢一刻真係唔敢去面對。
我飲完之後都無再抽過我，可以話係不幸中嘅大幸吧。
其中有一次抽到啊瑩，有人問佢有無鐘意嘅人，但係揀左飲酒就無左件事。
玩到咁上下之後，公園嘅燈都突然之間熄左，我地乜都望唔到，我地大家呢個時候都飲到有少少wing，曉瑩佢拎左手機出黎開電話入面嘅電筒。
我突然唔知點解都攞埋部電話出黎，但我唔係開電話燈，而係開左相機，換做自拍，影低左曉瑩開住電筒望住我嘅一刻，呢張相好靚，係漆黑中嘅我地，相入面見到一點小小嘅燈光，照住我同曉瑩。雖然張相唔係好太見得到我地兩個人嘅樣，但我地嘅頭髮特徵都好明顯，睇得出係我同佢，如果其他人唔睇真啲都未必知道係我地嘅自拍。
亦都係因為呢一點，我反而覺得咁樣都唔錯，就好似我地兩個人嘅小秘密一樣，係我地兩個人都會認得出嘅相。
「走啦不如，啊鋒好似唔太得了」啊桐呢個時候提議
啊鋒醉左，訓左係啊桐嘅膊頭到，如果我好似啊鋒一樣咁大膽就好了。
啊柔同啊靜都有少少唔得，佢地都直接番左去。
我主動問啊瑩 「你仲有無wing？」
「無啦，好精神！我行條直線比你睇！」佢講
曉瑩口講無事，但其實佢都唔太得了，佢行左頭三步，中間好似唔小心踩錯腳，就黎跌落地下。
我即刻跑左上去扶住佢，第一次同佢有咁親密嘅身體接觸，佢係我懷中望住我，我亦望住佢。
「今晚不如我送你番去？」我係未放手之前同曉瑩講左呢番說話
「好啦都係....麻煩哂啦」曉瑩紅住面咁同我講
由於佢地有啲人一早無道別就走左，所以我地都無再特別番去同你地講拜拜，我地一直沿著海邊行番去。
我地一開始行嘅時候都無講野，可能因為岩岩嘅事
「吹下風啦，個人會醒啲」直到行緊海旁嘅時候我同曉瑩講
「依家好左好多啦，岩岩真係唔係太得」曉瑩唔好意思咁講
「係囉，仲話自己得，明明直路都行唔到」我用一半指責一半講笑嘅語氣講
曉瑩聽到之後更加唔好意思，然後講「嘻嘻，唔好意思囉！我依家無問題㗎啦！」
「係呢，點解你無答到真心話大冒險個條問題嘅」我嘗試問佢
「你咪又係！問你個陣你都飲酒唔答，你答左我先啦！」曉瑩突然激動咁講
「我都唔知道，只係覺得好多野都未肯定，我連自己都未知自己諗緊啲乜所以我唔敢講。你呢？」我慢慢地講出
「我都係，我連自己都未搞掂唔想累到人」曉瑩認真說道
我第一次聽曉瑩講一啲咁深入嘅事，可能係有酒嘅加持，令到大家都講左自己嘅心事出黎
雖然我唔係好明佢自己都未搞掂係咩意思，但我估佢都可能係同我一樣未肯定自己嘅諗法掛。
「我到啦！你都早啲番去喎，番到去如果有嘅就沖杯蜜糖水啦」講都未講完曉瑩已經番到屋企樓下，我都係第一次送到曉瑩樓下
「好啦，記住唔好洗頭，聽日訓醒先洗，聽人講好似飲酒洗頭會頭痛」我講
「拜拜！星期一見～」曉瑩臨走前回頭對我甜甜一笑
我都笑到眼都見唔到「拜拜，番到去同我講聲啦！」
「知道啦～唔該哂你送我番黎啊！」曉瑩講
我細細聲講「為左你，值得嘅」
「你講咩話？聽唔到啊」曉瑩因為行得太遠已經聽唔到我講咩
「無野啊！早啲休息啦！」我大叫
我停左係到望住曉瑩入左大堂門口然後轉身離開，究竟曉瑩諗緊嘅對象係邊個呢。