[愛情] [校園] [足球] 我鐘意你 但係我唔可以同你一齊: 26.
亡命單車，呢個都係我一向淩晨番屋企嘅方法。一黎唔係太遠，唔洗嘥錢答的士。二黎我都幾鐘意夜晚無人得我一個係條街到周圍踩。
送完曉瑩番去之後，我求其揀左架公共單車就起行番屋企。
其實我都有少少wing，但係我唔想行番屋企，呢個都係最後嘅辦法。
踩緊嘅途中，其實我都係左fing右fing，踩唔到條直線，去到有一個落斜坡位，突然剎唔到車，加上我有啲醉嘅原因，我失平衡咁係斜坡嘅最頂炒落去。
＂碰！碰！＂我成個身體己經離開左架車，成隻腳比架單車扎住左，痛得忍不欲生，感覺到有液體係我隻腳到流緊出黎
我拎開架單車，見到我嘅右腳膝頭爆哂血，手同腳都有皮外傷。正當我唔知點做嘅時候，因為我右腳未行得郁。
突然有個有心人踩緊單車經過左我，亦都停低左幫我叫白車。
XXXX
我望一望電話，四點鐘。
我已經係醫院出番黎，做左啲普通嘅包紮就走得，姑娘建議我呢個禮拜唔好做運動住，因為會好痛。
但係班際嘅第二場就係星期二，亦姐係兩日後。我好想幫自己班拎到首名出線，下場唔洗咁辛苦。
仲要對上啊婆同啊賢嘅C班，我都好想自己落場對佢地。
番到屋企，啊媽望住我問我搞咩，我同佢講番件事之後比人屌左鑊，同埋佢叫我星期一唔好番學，休息多一日先。
我受左傷呢一件事無同過任何人講，亦都唔諗住講，因為一黎好撚柒，二黎係我更加唔想比啊羊同啊行知，因為佢地未必會比我踢。
上到床，開番部電話睇，見到有幾個未讀嘅訊息，其中兩個係黃曉瑩嘅
2:05am ＂我番到屋企啦～多謝你送我番黎！＂
3:20am ＂人呢，你唔係真係去左飲酒啊嘛？(擔心樣) ＂
我即刻覆佢 4:05am ＂我番到去啦！岩岩突然有啲野做無睇電話＂
始終都係唔敢講，雖然係皮外傷，但係都仲係好痛。同埋真係好柒，仲以為自己平時都有踩就算飲左酒都無事，無諗過一飲酒就出事，好快我係床都訓著左。
一訓就訓左成日，第二日都無咩特別，因為係星期日，同我隻腳都要休息，所以留左係屋企做下宅男。曉瑩同啊柔佢地都有講電話，我夜晚都有入去講左陣，但無提到我聽日唔番學同我嘅受傷嘅事。
星期一，我訓到下午三點先起身，因為前一日打機打到好晏先訓。我慢慢行落樓買左啲野食，其實我普通行路係唔痛，但當我想試下跑嘅時候就會有少少痛。
我諗我如果聽日落場踢嘅話都應該無問題掛....我真係好想自己落場同啊婆決一死戰，始終我同佢之前嘅班際都未對過。
＂叮！＂我褲袋中嘅電話突然響左一響，係曉瑩同啊婆嘅訊息。
來自黃曉瑩：3:50pm ＂你做咩無番學嘅！？今日成日上堂都好悶啊＂
來自啊婆：3:50pm ＂咁快驚左聽日對決唔番學？你聽日唔好唔番啊＂
係喎，已經係放學時間，見到曉瑩嘅慰問我都甜甜咁笑左一下，然後覆
3:52pm ＂屋企有啲事啊，今日番唔到黎，聽日就番啦 (鬼臉emoji)＂
3:53pm ＂我聽日實番你放心，朝早照舊地鐵站等啦（中指emoji) "
仲有一日，我會唔會可以係聽日前回復得番隻腳都係問題，但係照我計都應該勉強踢得到。
星期二，亦都係我地班同C班大戰嘅一日，雖然只係分組賽，贏輸都會出線，但我真係好想親手打贏C班。
平時我踢波都係著短褲，但今日特登著左條長嘅運動褲，為左唔好比佢地知道呢件事。
「喂，準備好比我打爆未」啊婆見到我第一句就同我講
「收皮啦，你一陣比我地炒唔好喊就真」我還擊
番到課室，己經見到曉瑩坐左係個位到睇緊書，佢見到我番黎即刻拍一拍我
「喂！尋日你知唔知我好悶啊，平時上堂都起碼有你係到同我吹下水」曉瑩抱怨地說
「無辦法啦，我都有陣時係唔番㗎啦！今日番左黎咪得囉！我要班際啊，今日對C班」我抱抱頭講
「你做咩個日咁夜先番到屋企嘅....？」曉瑩好似有啲擔心
「哦！無咩野啊，我有啲野做咋嘛！」我扮傻
曉瑩聽到我呢個答覆好似有啲唔滿意，佢＂哼＂左一聲，另轉頭唔理我，去左同啊柔傾計。
死啦，佢唔係真係嬲啊嘛....但係我唔想同佢講我受左傷嘅事。
我跟左過去曉瑩同啊柔後面，嘗試同佢地傾計睇下佢地反應如何，「喂！啊朗！你尋日做咩無番學啊！」啊柔見到我即刻熱情咁講
「無啊，想休息一下就無番哈哈」我答，但見到黃曉瑩嘅樣唔太好
「聽講你今日班際喎，我一陣過黎支持你先！」啊柔講
「好啊！黃曉瑩你去唔去啊？」我試探地問曉瑩
曉瑩好無情咁講一句「有野做啊，唔得閒」然後就番左去自己個位，得番我同啊柔
「你激嬲左佢啊？」啊柔問
「唔知啊，我試下同佢傾下啦」我轉身番去自己個位，因為上堂鐘都響起。
我坐番埋位，但已經係上堂嘅時間，平時另轉頭諗住同曉瑩傾計佢都會理我，但我依家另轉頭想同佢解釋嘅時候就完全當我隱形咁。
過左一堂，都係咁，兩堂，都仲係咁。
小息嘅鐘聲亦響起，岩岩個兩堂係我上得最辛苦嘅兩堂，訓唔著之如仲要被曉瑩當無到一樣，簡直係生不如死。
我忍唔住啦，我唔想曉瑩唔理我，我決定同佢坦白。
落左堂之後，我即刻行去曉瑩前面，講「你做咩唔開心啊？係咪我無同你講」
曉瑩見到我行上黎首先都係無理我，但係我再阻住佢前面嘅去路，唔比佢走。
「做咩？你都唔講，咁我仲嬲黎做啲咩？」曉瑩煩躁地講，更加想離開。
我將長褲拎起，比佢睇我嘅膝頭。曉瑩即刻收起左皺起嘅眉頭，然後擔心地問
「做咩事啊？點解無啦啦會咁嘅？你一陣仲點踢波啊？」曉瑩雙眼望住我講
「個日我番屋企嘅時候，踩單車出左啲意外，所以就...」我雙眼望向自己隻腳講
「姐係你講有野做就係受左傷？你下次要同我講啊！同埋一陣不如唔好踢啦....你隻腳得唔得㗎」曉瑩誠懇咁望住我講
「知道啦....我無事嘅，但我真係好想同啊婆決一死戰，我等左呢場波好耐，我唔可以咁就唔踢」我無奈咁同曉瑩講
曉瑩交叉住手，好似老闆咁，嘗試心理上阻止我去踢，但我決心真係太大，再同佢解釋左一陣之後，佢都無再阻止到我
「好啦，咁你小心啲啊...」曉瑩講
「你一陣係咪真係黎唔到睇啊？係喎，可唔可以唔好同啊羊同啊行佢地講，我怕佢地唔比我踢」我問
「傻嘅，梗係黎啦！我要睇住你唔好踢得咁激烈，一陣個傷再嚴重左點算！」曉瑩重回笑容
我都笑左一笑，「唔嬲啦？嘻嘻」
「無嬲過！唔知你講咩！哼！」曉瑩老闆模式重現
這話語 這笑顏 幼嫩而笨拙性格 不礙眼 不厭煩 仍然全部想多貪