[愛情] [校園] [足球] 我鐘意你　但係我唔可以同你一齊: 27.

＂叮噹叮噹，叮噹叮噹＂中午嘅鐘聲響起，代表我地同C班嘅大戰亦都好快開始

我趁啊羊同啊行唔為意時偷偷地入左廁所，換左條運動長褲。如果我著短褲比佢地睇到我嘅傷勢佢地一定會阻止我踼，即使我好想踼都係。

我係廁所去番課室會合佢地再落去，臨走前曉瑩行左上黎我到問「你係咪真係踼得到㗎？唔好勉強喎！」

「你放心啦，我無事嘅，我一定會嬴」我好有自信咁同曉瑩講

「嗯....好啦，我一陣同啊柔佢地落黎睇你啦！」曉瑩好似仲係有啲擔心



「嗯，我落去熱身先啦，拜拜～」我揮手道別

我同啊銀，啊羊，啊鋒同埋足球隊嘅其中一個後備 - 啊樂一齊落去熱身

落到球場，已經見到有好多人係觀眾席，比平時仲要多，觀眾席已經差唔多無哂位，有學生已經圍住個球場坐。

可能係我地D班同C班都係今年嘅冠軍大熱，其他班都無乜睇頭，所以我地嘅對碰應該係最重要嘅一場。

C班嘅人其實都幾勁，完全係夠我地D班踼，可以話係五五開，有進攻同防守都得嘅啊婆，加上可以一人防住成隊A班嘅啊賢。另外都係一個無咩經驗嘅龍門，一個足球隊同籃球隊後備 -　傑仔，啊生



熱身嘅時候慢跑一下，做下普通控轉球，隻腳感覺都無問題。

啊婆同啊賢都落左黎開始熱身，見佢地都好似好有信心咁

熱完身之後，比賽正式開始，球證亦叫雙方隊長行前猜開波，通常都係最近球證嘅兩個上，今次就係我同啊婆

「喂，準備好輸未？」啊婆一行上黎就串柒柒咁講，亦留意到我著緊長褲

「你見我唔洗著短褲都知你輸硬啦」我回覆



球證亦留意到我地嘅火藥味，好快就分開左我地，然後示意開波

開波前見到曉瑩同啊柔佢地坐左係觀眾席嘅最後，我遠距離同曉瑩對望左一下，見到佢嘅眼神好似有啲擔心咁，唔知我有無睇錯啦，但係就無左我第一場佢望住我個種興奮同信心。

＂咇咇！＂球證示意比賽開始，C班開波

啊婆隨著哨子開波比啊賢，我都開始跑上去迫，啊賢同傑仔猜左幾腳之後都大腳斬比啊婆

呢球好高好急，但啊婆好輕鬆就攞定左個波，亦開始向我地禁區推進

正當啊婆推到入禁區嘅時候，啊羊同啊行同一時間夾住左係啊婆嘅中間，令佢失去左前進同退後嘅路線。

啊婆想以一敵二，嘗試用施丹轉身擺脫面前嘅啊行，可惜，啊行唔係之前佢地對A班嘅普通球員，成功阻止到啊婆嘅轉身，拎番個波。

 啊行亦係呢個時候推進，輕鬆扭過左傑仔同啊生將個波交左比我，我同啊行處於二打一對住啊賢



我拎住個波，做左幾下假腳之後，啊賢好似都無咩反應，好似一切都係佢預計之內。推到入禁區，係最危險嘅時候我選擇左將個波橫轉比後上嘅啊行

啊賢好似等待緊呢個時機好耐，亦係我地中間搶走左個波，睇黎佢真係睇穿哂我嘅打法。

大家都打唔出破口，啊婆都一樣只要佢拎住個波就會有啊行同啊羊兩個包夾住，我負責一個人睇哂傑仔同啊生。自從個次進攻之後啊婆嘅回防都多左，同樣我地亦打唔穿啊賢嘅防守。車輛戰一樣好快就吹左半場。

半場我行番去休息區，我隻腳開始感受到痛楚，因為五人足球嘅來回跑同強度都好高，由其是對住C班呢隊強隊，令我隻腳嘅痛楚開始加劇。

我坐底左，試圖去拍一下自己隻右腳，令佢舒服啲，但可惜拍一拍嘅個一下唔小心拍中左傷口嘅位置，令我唔小心＂啊！＂咁叫左一下

全場都聽到我呢一下大叫，因為真係好大聲，包括對面嘅C班同啊行啊羊。

「你做咩突然之間叫得咁大聲，仲要係好似好痛咁叫」啊行上前問道



「無啊，無事」我嘗試扮咩都唔知，想暪住過關

「你今日做咩著長褲嘅」到啊羊問

啊行呢個時候拎起我嘅褲，嘗試將條長褲拉高，我即刻㩒住佢隻手，但啊行實在太大力，我反抗唔到。

我嘅傷口呢個時候徹徹底底咁露哂出黎，佢地睇到一開始係擔心嘅樣，但之後開始有啲嬲。

「你做咩開波前唔同我地講？」啊行好大聲咁鬧我，連對面都聽得到佢把聲

「我....唔想你地擔心姐...」我細細聲講

「你明知你唔踼呢場都無問題㗎」啊羊講

「我知，但我真係好想踼」我答



啊行唔太知道可以點做，走左去第二邊飲水，啊羊再次問「你踼唔踼得到下半場？唔得嘅可以幫你換人，你自己諗下先」

之後我坐低左休息飲水，諗左一陣，其實佢地講得好有道理，我真係未必要為左呢場波而令自己更加傷。我望一望觀眾席看台，見到曉瑩同啊柔都擔心地望緊我，但我嘅眼中只係望到啊瑩，我個腦呢個時候唯一諗得到嘅就係＂我唔可以放棄＂

「得，比我踼」我呢個時候選擇左要繼續

「好，咁你自己睇住踼，記住，嬴輸我地都晉級」啊羊冷靜咁同我講，雖然佢好冷靜，但我都感覺到佢好想嬴，所以佢應該都想比我繼續上場

＂咇咇＂球證吹雞示意球員要重新進場，我係休息區臨走前望一望曉瑩，佢雖然望落好擔心，但都有用唇語同我講左聲＂加油啊！＂

我見得到，點點頭然後就行番出去

下半場，零比零，開始了