[愛情] [校園] [足球] 我鐘意你　但係我唔可以同你一齊: 35.

平時我都唔係啲好準時嘅人黎，可能係心急嘅關係我早左十分鐘到達老地方，䁱瑩都準時係老地方出現

「咁準時嘅䁱瑩姐」我見到佢第一時間講

「咩喎，我平時好遲咩！哼！」䁱瑩雙手叉腰紅卜卜咁講

我搭住佢膊頭講「唔係唔係，我以為你會覆電話覆到唔知時間姐嘻嘻」

䁱瑩雙手放低左，突然一野打左落我個肚度「今晚餐糖水你嘅！」





呢一下其實唔大力，但係我都扮下野，面容扭曲左一陣然後點頭「當然啦，今晚我嘅！」

我地並肩咁行過去糖水舖，中間都係講下䁱瑩個IG貼文嘅人嘅第一印象，但就無講到我。

去到鋪頭入面，發現今日嘅人好多，我地平時坐開嘅位都比人坐左。

我就隨便揀左個位，今日呢個位隔離比較熱鬧，我地平時鐘意坐個個角落頭嘅卡位就係貪佢少人坐可以易啲傾偈。

但今日真係太多人，迫於無奈之下我地坐左個中間搭枱，四方八面都有人，連隔離講緊啲乜我都聽得好清楚。





「不如我地今日食第二間囉，好似好多人係到傾唔到偈」我問䁱瑩

䁱瑩周圍望左陣，眼神有啲疑惑咁講「但係我想食榴槤喎嘻嘻，定係我地快啲食完之後去海旁講啊」

「好啦，咁一陣食完之後送你番去！」我講完呢句野之後都示意埋單

「唔該，一個榴槤晶珠，一個雪糕豆腐花，要曲奇味嘅！」我講

䁱瑩見到我落單之際都攞起手機繼續覆IG，我叫完之後都好奇咁望下佢覆緊邊個。





見到都有幾多男仔有留言等緊佢回覆，心入面嘅醋意就上起。

「嘩咁多仔仔嘅嘻嘻，大把等緊你覆喎」我同曉瑩講

「無啦，全部都係普通同學，有啲都唔係真係咁想覆」曉瑩回

＂靚仔，你嘅雪糕豆腐花，榴槤晶珠＂店員亦係呢個時候上左我地嘅糖水

曉瑩都終於放低左部電話，第一次望住我

老實講，我係有小小唔開心，本身諗住兩個人出黎食糖水係可以傾下計，望下佢都好，但係依家呢個環境都唔係太講到野

加上曉瑩都仲忙緊覆野，不過無辦法，我又唔係佢邊個，都無得講咁多。

「做咩個樣好似咁愁嘅，食野先啦！」曉瑩望完我之後講





我盡我所能咁扮無事，好似平時傻更更嘅馬子朗，「咩啊！我發緊呆咋！食野啦！」

諗諗下都有成兩個禮拜無食過糖水了，但點解食落好似唔甜嘅，仲有啲酸酸地。。

我個腦不停就係諗住想同曉瑩兩個人相處，同埋佢電話入面等緊佢回覆嘅男仔

＂屌，愈食愈撚酸＂我係心入面同自己講

食完之後我地都好快就走左，曉瑩亦都無再拎起電話，我地一齊慢慢行到去海旁。

曉瑩揀左其中一張凳坐，有人坐左係隔離，好似有番岩岩係糖水鋪嘅感覺。

「不如我地跳過啲圍牆坐係下面啲石囉？」我突然心血來頭咁樣問佢，事因我唔想岩岩嘅環境再發生





曉瑩好似欲言又止咁樣無講野，唔知佢係咪怕污糟呢

我見曉瑩無講野，開口問「你係咪怕啲石污糟啊？一係我地照坐番係啲凳到囉！」

「唔係啊....我係驚會唔會比人捉到，始終咁樣跳落去都唔係咁好...」曉瑩終於開口

「哦！無事啦！我有時行過都見到好多人咁樣做，下面都好似幾有feel」我嘗試說服佢

「好啦！咁我跟住你㗎啦喎，一陣跌左落海你要負責㗎！」曉瑩笑住講

我唔想淨係你跌落海我先要負責，我想你所有野都由我負責....

當然呢句我藏左係心入面...無講到出黎啦