[愛情] [校園] [足球] 我鐘意你　但係我唔可以同你一齊: 37.

＂沙～～沙～～濕....泊，沙～～沙～～濕....泊＂海浪嘅聲音明顯反映出我同曉瑩之間嘅安靜，大家都享受緊海浪嘅聲音，無特別講野。

我地同行人路嘅距離好遠，就算有人講緊野我地都聽唔到，有一種與世隔絕嘅感覺。呢一刻我地兩個就好似活係第二個世界一樣，遠離煩擾。

我地一直坐係到，大概過左半個鐘之後，曉瑩終於開番眼「嘩，咁就半個鐘㗎啦！？」

「哈哈係喎，我都唔係好覺，坐係到時間好似會放慢咁，好似過左兩三分鐘咁」我都開左眼望住佢講

「依家幾點啊？」曉瑩問我，我拎左部電話出黎睇一睇「依家都差唔多三點啦，好彩聽日啲堂有得訓嘻嘻，如果唔係實眼訓死」





「你洗唔洗番屋企休息啊，聽日都仲要番學」我問曉瑩

「下，但係我唔想走住...」曉瑩好似依依不捨咁坐左係到，動作完全無想走嘅念頭

曉瑩見我都坐左係到，然後問「你會唔會好攰啊，定係你走先啊？我好快就會走㗎啦！」

「唔好啦，我都仲想留係到享受下，難得搵到呢個咁舒服嘅地方。」我望住前面嘅海答曉瑩，一黎呢到真係好舒服，二黎我都想留係到陪曉瑩

曉瑩聽到我講之後，突然靈機一觸，眼睛閃令令咁望住我「不如我地留到睇日出囉？呢到好似係靠少少東，應該有日出睇！」





「距離日出仲有四個鐘喎小姐，你真係頂得住咁耐咩？」我問

「哈哈，頂唔住㗎！但係今日咁舒服，真係唔想走。最多我聽日做一日壞學生，同你一齊上堂訓教啦！」曉瑩遮住個嘴係到笑

「好啊就同你玩到底，一係我地睇完日出之後番去換件衫出去食個早餐再番學！」我興奮地提議

曉瑩聽到早餐呢隻字眼神更加閃令令，「咩話！早餐好啊！我好耐無食過早餐啦，平時番學都唔食早餐嘅，放假都係訓到下午嘻嘻」

就係咁樣，我地決定左坐到日出，之後一齊食早餐再番學。諗起都爽，有得同曉瑩獨處咁耐。。。





「係喎你知唔知呢我地班個個芷晴呢好似話鐘意啊鋒...」坐坐下曉瑩突然間講起我地同班嘅八卦

「竟然係咁！？睇唔出喎，佢呢種文文靜靜嘅風格同啊鋒差勁遠哈哈」我講

「係囉！我都無諗過，但都係傳出黎㗎咋！我唔知係唔係真㗎」曉瑩即刻戴番個頭盔

傾傾下我突然一醒，＂既然都講到呢個話題，不如試下問曉瑩有無鐘意嘅人囉＂我腦海拋出左呢個想法

「係囉，我地級都開始咁多人傳呢啲戀愛緋聞，咁你呢曉瑩姐，你又有無鐘意嘅人先嘻嘻」我帶住小小緊張又興奮嘅語氣問

以往平時曉瑩聽到呢啲問題會答我「你估下」或者唔答，但今次竟然好快咁答左我，唔知係咪環境所影響，佢嘅回覆好快同好直接。

「好感就有嘅，不過講到鐘意又好似未到？」曉瑩講

呢一個答案令我更加想追問佢，起碼知道佢所講嘅人係唔係我。





「咁...係邊個先！」我見佢上句答得咁直接諗住乘機追殺

「哈哈，唔講住啦，直到我肯定我係唔係鐘意佢我再同你講啦。依家都只係有少少好感」曉瑩答

我真的很期待你能夠答那個人是我

「咁我地都係中三姐，又未必真係咁快分清楚好感同鐘意有咩分別，我都係近排先開始理解到少少」我望住海概嘆

曉瑩聽到我呢句之後已經明白我呢一句中嘅意義，由其是最後一句

「你好似有啲少男心事喎，朗哥，分享下比姐姐聽先啦」曉瑩用姦笑嘅眼神望住我

「你想聽咩先？」我問曉瑩，「咁以你呢排嘅了解，你覺得好感同鐘意有咩分別」曉瑩好快就問左佢想問嘅野





「我覺得，好感可能只係純粹見到佢，你會好開心，心入面會有種激情同火花嘅感覺，但鐘意係會想同佢做好多野？一齊去見證好多事，我會去諗我地嘅未來，同埋我會有一種欣賞你全部嘅感覺，唔會因為你有啲咩缺點而無左個種激情，而係會喜歡埋你嘅缺點，亦都係全部。我都係自己嘅感覺黎咋，我都係中三，可能我錯都唔出奇㗎。」我講

「都講得幾好啊，聽完你咁樣講又好似真係易分左咩係鐘意定好感」曉瑩坐左係到諗左陣然後再慢慢講

「我都係少少見識姐，唔好用得咁盡，費事我自己見識教壞左你。」我微笑住同曉瑩講

曉瑩聽完我講之後又沉思左一陣，可能佢都仲諗緊佢嘅事，但好快我地呢個話題都好快轉左去第二度。最後我地都唔知大家講緊嘅對象係邊個，唔聽到答案可能唔洗受傷，起碼仲有希望嘅曙光，對吧？

好快，我地傾下傾下已經差唔多六點，距離太陽升起嘅時間都唔遠。

你  何以始終不說話  儘管講出不快吧 事與冀盼有落差  請不必驚怕
我  仍然會冷靜聆聽 仍然緊守於身邊  與你進退也共鳴