《相隔100年嘅愛情故事》《1874》: 第四章

之後，我係廚房同佢講:「雨婷，我而家煮飯，你係出面等。」佢哦咗一聲。


我打開嗰雪櫃，睇下有咩餸煮，見到嗰雪櫃除咗幾pack可樂之外，就乜都無，我心諗:「仆街，唔記得咗買餸。」


我之後就同佢落咗街，我話:「對唔住呀，我唔記得買餸，要出街食。」佢話唔緊要，有得食就得。之後，我就同佢食m記。我同佢食完m記就去咗超巿掃貨，之後就返咗屋企。


返到屋企之後，我就教佢點樣用花灑，等佢沖完涼之後已經12點，我聽日仲要返工。係喎，仆街！我間屋係四百呎嘅一人單位，何來兩張床，點算呀，我無理由要佢訓廳㗎，係喎，有計。






我去咗雜物房搵呀搵，搵呀搵。終於搵到啦！係我大學去camp時候嘅睡袋呀。我就比咗間房比雨婷訓，我就喺廳訓睡袋。


第二日，我提早起身，因為要煮早餐比雨婷食，(我平時就咁喺七仔買嗰雪芳蛋糕加杯咖啡就算)，我留咗張memo紙同佢講話我要返工，同埋教咗佢點開電視，跟住我就去咗返工。


返到10點嘅時候，我嗰新上司就出咗嚟話:「咁多位好，相信你地前日都知我會嚟做你地上司，我叫belle，大家可以叫我做belle姐，有咩事就入我房叫我，唔阻大家做。」跟住佢就入咗佢間房。我心諗:「嘩!嗰belle姐咁惡，同上一個根本係兩個人嚟。」阿田無啦啦走過嚟，喺我耳仔邊講:「喂!我唔好睇嗰belle姐好惡，佢廿四歲咋。」我係佢耳仔邊講:「唔係呀嘛，仲細過我，咁細就做到上司？！」佢戚一戚膊，表示唔知道，不過算啦，佢係我上司，點樣都唔關我事啦。






終於放工啦，我即刻衝返屋企睇雨婷做緊啲乜。


返到屋企，見到佢眼都唔眨咁睇緊電視，好彩唔係睇大台啲劇，如果唔係我一定唔比佢睇電視。佢連我入咗嚟都唔知，我咳咗兩聲，示意我喺度。佢見到我之後話:「你返嚟啦，我乜都無做呀，淨係睇電視咋。」我心諗:「你隻眼咁都無盲到真係好勁。」跟住我就去咗煮飯。


煮煮下飯嘅時候，有人msg我，係Andrew「12點，平時間bar」我覆佢「ok」之後我就同雨婷食飯，佢真係好鐘意食嘢，佢食得好快，仲快過我。食完佢好快就去咗訓覺，唔知係咪因為以前嘅人都係咁早訓。






我睇下部電話，都係9點幾，就落街行下，順便買幾套衫比佢。買完之後我放低喺屋企就搭車去bar到。


去到bar門口見到有兩條mk仔喺度僚女仔，平時我都會直行直過，但係唔知嗰日癡咗邊條線，走咗去救嗰女仔，我都叫食過下夜粥，兩條蛋散我好快就搞掂咗。跟住我睇下嗰女仔有無事，跟住我先發現原來係belle姐，我話:「belle姐係你？我係X房網嘅員工呀。」佢好似醉到咩聲都聽唔到，我msg咗Andrew，「我唔得閒呀，嚟唔到，之後補返數。」我扶住佢搭的土返到公司，佢即刻衝咗入女廁嘔。


佢出嚟之後終於酒醒咗啲，可以正常對話。


我問佢:「belle姐點解你會飲咁多酒嘅？」我面上面有假到出汁嘅笑容。佢笑得妞甜咁話:「私低下叫我阿belle啦，我而家又唔係你上司。」佢而家同今朝根本係兩個人嚟，佢話:「你係咪覺得點解我而家一啲都唔惡呢，其實今朝我係扮出嚟㗎，我覺得如果我唔惡，啲下屬唔會聽我講嘢，其實間公司係我daddy㗎，佢話我遲早都要繼承間公司，而家快啲熟悉下好啲，但係我根本未ready，講到呢度你應該明點解我會飲咁多酒啦。」我發現佢原來流緊眼淚，我就話:「我明啦，原來你咁大壓力㗎。」之後佢就同就不斷同我訴苦，跟住佢可能太眼訓，挨住我膊頭訓咗，之後我好小心咁抱咗佢去pantry嘅梳化到訓，之後我就返咗屋企訓覺。