《喜歡自殺的妳，怎會如此可愛》: 【第二幕：跳海吧少女】(1)

【第二幕：跳海吧少女】(1)

陳老師望見他倆，詫異地問道：「裘若睛，你唔係話返實驗室攞埋啲嘢就走啦咩？做咩仲喺度？仲有陳立草點解你喺度嘅？」

陳立草腦袋高速運轉，正打算編一個藉口，但裘若睛搶先一步回答：「係呀陳sir，啱啱見到枱上面有啲嘢未執好順便執埋啫，陳立草過嚟搵我食飯，好快搞掂啦。」

「竟然仲有啲嘢未收返埋去，個TA搞咩嘢呀，好啦好啦，快手啲搞掂啦，我等陣嚟鎖門。」

陳老師說完轉身就走，裘若睛立即怒視陳立草，「做咩搞我個頭，做咩過嚟搵我。」



「你冷靜啲先，我啱啱喺對面樓望過去實驗室，好似見到有爆炸，所以衝過嚟。」

「爆炸？點解你會見到㗎？唔係，等陣先邊度有爆炸？」

「我都唔知呀，我都淨係見到幾秒，跟住就冇嘢，但係好似琴日咁樣，我驚你有事，所以...」

「唔緊要啦，我而家冇事喇，我地等陣開會見啦。」

「你個樣邊忽似冇事呀，不如我哋一齊食晏晝啦。」



「唔食啦，我直接返去班房準備啦，畢竟一陣係學校百週年校慶籌委會第一次開會，同埋我都唔肚餓...」嘴裏說著不餓，但肚子咕嚕咕嚕叫出賣了她，陳立草看穿了她的倔強，於是給她一個下台階，「你都知我選擇困難症㗎喇，咁你覺得我應該食牛腩河定係四餸車仔麵？」

裘若睛轉身背對著他，低聲說道：「牛腩河，多蔥。」

「收到，陣間見。」

裘若睛望着他離去，心裏想的是他才是最關心自己的人。

炎炎夏日，人們喜歡把冷氣調到最低溫度，然後再披上薄褸，裘若睛的手腳都快要凍住時，陳立草提著熱騰騰的牛腩河和車仔麵到來。



「拿，呢度係你碗牛腩麵。」裘若睛接過塑膠碗，低頭暴風式吸入一條接一條的麵條，「都係英記牛腩麵，最合我胃口。」她一臉滿足的神情，看到陳立草打開他的車仔麵後，盯着他碗中的雞翼和腸仔，毫不留情地夾走了它們。

陳立草翻了白眼作無聲反抗，但還是讓她拿走了。

陳立草看著她臉頰鼓鼓的，由心微笑，裘若睛發現他嘴角朝上因而不爽地問：「點呀，未見過人食嘢呀？」

「得啦得啦，唔望住你喇，你食嘢啦。」

枱上散落稍後開會的議程，陳立草怕裘若睛不小心弄髒了，於是將它們拾起。

「喂，其實今年校慶係做乜嘢㗎？」

「都係傳承呀，團結呀，乘風破浪嗰啲。」

陳立草翻了幾頁，其中一頁的一項活動用紅色圈起來，「不能說的秘密？呢個咩嚟㗎？」



「喔，呢個係校慶表演劇目，講一百年前學校創立嘅時候，一啲因為當時環境而不能說的事情放入咗喺時間囊入面，係一百年後嘅今日唔再係唔能夠講嘅嘢。」

「唔能夠講嘅嘢？會唔會好敏感呀？你唔驚畀校長否決咩？」

「算啦，佢要否決再算啦，又要帶出到校訓天下為公，又要傳承，我同郭偉航諗到頭都爆，都淨係諗到啲咁嘅嘢，已經盡咗力。」

「你講起郭偉航，我想問...你同佢..係咪..」

「係呀。」裘若晴收起了臉上笑容，不敢直視陳立草，他本來想追問下去，但還是識趣地收了口。

雖然陳立草只是隨口一問，但都足以令裘若晴心情低落，頓然失去了食欲。

她多吃兩口後，便放下手中的筷子，「我食唔落去啦，你幫我食埋啦。」



陳立草沒有接過她的食物，他匆匆吃過自己的，然後出去扔了垃圾。

他回來的時候，課室裏的桌椅已經排好，裘若晴坐在了主席位，而郭偉航坐在了她的身旁。

裘若晴用力地克制自己的情緒，但是眼角仍露出難受的神色。

陳立草看穿了她偽裝的堅強，上前主動要求和郭偉航調位，「等陣開會，我驚阿晴佢抄唔切會議內容，不如我坐係佢隔離幫佢手寫。」

陳立草是學校辯論隊隊員，所以郭偉航沒有想太多，便跟他調了位。

陳立草坐下來後，裘若晴長呼了一口氣，他拍拍她的肩膀，在她耳邊說了一句：「加油，我喺度。」

幾小時後會議終於完了，陳立草寫下下次開會的時間便放下筆，伸懶腰，轉頭望向裘若晴，「你等陣諗住做啲乜嘢？」

//待續