《喜歡自殺的妳，怎會如此可愛》: 【第二幕：跳海吧少女】(2)

【第二幕：跳海吧少女】(2)

裘若晴邊打呵欠，邊回道：「應該返去瞓陣覺，然之後去自修室溫書。」

陳立草想陪她多一段時間，「我今晚冇人同我食飯，一唔一齊食呀？我都可以去自修室溫書嘅。」

裘若晴滿臉不相信，「你會冇人同你食飯，你唔係晚晚都全家一齊食嘅咩？」

「總之佢哋全部都唔得閒呀。」



正當他以為她會拒絕之際，裘若晴點頭，「見你咁慘就陪下你食飯啦。」

陳立草笑得像個傻子，心裏慶幸她終於將鎖上的大門推開了些許。

「得啦、得啦，知道有人陪你食飯好開心。」裘若晴一臉不屑，但被陳立草的微笑所感染，心口不再隱隱作痛。

他倆並肩而行，慢步回裘若晴的家，路上他們閒話家常，由最近看的Netflix談到明天哪裏有遊行，唯獨對裘若晴的近況隻字不提。

陳立草前腳剛踏入她的家門，裘若晴便扔下一句，「你自便啦，我去瞓覺啦。」



「真心咩？」

「如果驚你嘅話，我仲會畀你上嚟屋企咩？」裘若晴倦意來襲，「好啦，唔講啦，記得三個鐘頭之後叫醒我。」

陳立草留在客廳，來回踱步打發時間，看到餐桌上散落同一位婆婆的照片。

她是裘若晴的婆婆，自從她的父母離婚，婆婆便一直照顧她。小時候，陳立草每次上裘若晴的家裏玩耍，婆婆總會準備好水果或者零食給他們。

「係喎，婆婆去咗邊？」陳立草在她的家中四處尋找，但都沒有找到婆婆的身影。陳立草想著答案就是，「可能佢返咗鄉下啩。」



陳立草在客廳已經找不到事情做，於是走到裘若晴的房門前，「喂，你瞓覺咁我有咩好做？」

門內沒有傳來任何聲音，陳立草推開房門，裘若晴正熟睡，他走到床邊，她臉上的黑眼圈讓她看起來很久很久已經沒有睡覺。

「究竟發生咩事？阿晴做咩搞到咁樣？」

他明知道來到她的家並沒有任何事情可以做，但還是選擇留在這裏，因為他只想陪著如此難過的她。

「不如準備晚餐畀佢算，反正佢咁鍾意食嘢，食完嘢應該開心啲掛。」

陳立草煮了水煮魚，炒了回鍋肉，並準備心太軟，然後累倒在梳化上。

裘若晴被食物的香氣喚醒，從房間裏施施然地走出來，「果然係甜品學會主席，煮嘢食係有一手嘅。」

「飯煲好咗啦，你食住先，我有啲攰。」



他小睡片刻，醒過來後發現食物只剩下一碗的份量，「裘若晴，你有冇咁食得呀。」

「你仲好講，你啲水煮魚唔夠辣，回鍋肉又鹹咗啲，連心太軟都唔夠甜，係我畀面你先食咁多咋。」

「哦，咁我真係多謝曬你呀。你食完嘅話，唔該幫手洗碗。」

裘若晴裝作聽不到，「吓，你講咩呀？我去自修室霸住位先，你慢慢食，記得、記得食完順便洗埋碗。」

陳立草為裘若晴的無恥而又翻了白眼，心裏咒罵她，但還是匆忙地吃過飯，自動自覺地去洗碗。

當陳立草終於踏入自修室時，裘若晴正在做試卷，他坐在她的身邊拿出補課的練習。

九時正，自修室準備關門，他們收拾過後停留在電梯大堂，「其實你都淨係做一份卷，點解唔留返喺屋企做？」



「就係唔想喺屋企做囉，好啦你今日都陪咗好耐㗎喇，你快啲返屋企啦。」

雖然陳立草陪了她一整天，但還是弄不明白她為何心情如此低落。

只是因為跟郭偉航分手嗎？看起來不只是這樣。陳立草不打算像昨天般直接回家，準備死纏爛打跟著她，「你可唔可以陪我去一個地方？」

「去邊呀？IG pier?」

「西環鐘聲泳棚。」

「真心咩？ 而家九點囉。」

「咁你聽日有咩做呀？」

「冇嘢做都唔代表要去㗎。」



陳立草唯有使出必殺技，「一杯珍珠奶茶，加一碟燒賣。」

「唔係食嘢嘅問題呀。」

陳立草再加碼，「加多個鹽酥雞扒，冇得再多啦。」

「好啦咁我姑且陪下你去啦。」

//待續