《一次無心嘅表白，竟然令到佢同咗我一齊II》: 第一章

2013年12月31日

呢一年嘅除夕特別多人重視，無他嘅，因為正值係百年一遇，跨越一三一四（一生一世）嘅日子。好多人相信，或者係希望當刻陪伴自己嘅人可以同自己一生一世。
呢一晚，我並冇好似其他人咁出去倒數狂歡，而選擇自己一個留係屋企。呢啲咁重要嘅日子都要留係屋企嘅人，唔洗問都知冇人約啦！不過呢啲衰嘢就無謂提啦，其實最主要嘅原因都係想係新一年之前，為過去劃上句號…

由於阿娘同咗我呀爸兩個去咗二人世界嘅關係，悲慘嘅我食完個杯麵之後，就重回電腦嘅面前，不過並唔係上高登同一眾巴絲打一齊倒數，而係打開microsoft word。

「阿穎，記唔記得我哋點識架？當時嘅我哋原本只係一個seller同個客嘅關係，我從來冇諗過我哋仲會有其他嘅可能。記得我哋第一次傾電話嘅時候，你對我同阿靜嘅事好好奇，而我亦都滔滔不絕咁將我同阿靜嘅事講哂俾你聽，係嗰幾個鐘入面，我就好似開咗場冇中場休息嘅talkshow咁……」

係一路打呢封信嘅同時，回憶又再次沉澱到兩年前……



當時啱啱同初戀阿靜分手嘅我，過咗幾個月頹廢都無法形容嘅生活。視兩個sem嘅gpa如無物都不再講，除咗長年累月咁係房到喊（同鳩叫）之外，仲專登日日去以前同阿靜一齊行過嘅地方嚟虐待自己。
由於我係從來唔會係屋企人面前表露出任何唔開心嘅情緒，所以我同阿靜分手嘅事佢哋應該都唔知。不過真係唔知係我掩飾得太好吖，定我兩位高堂遲鈍，好似冇為意阿靜冇再上嚟咁。如果你話佢哋知道但唔踢爆我啫！咁你就錯啦，因為就係過年前一日，我呀爸竟然懶風趣咁話：

「過幾日叫阿靜上嚟拜年啦！」

我苦笑咗一下：「睇下點先啦…」

但我呀爸唔知我腦海入面浮現嗰幾百字粗口真言係幾想爆哂出嚟…當刻我真係想返入房鳩叫返幾粒鐘嚟發洩…



雖然失戀嘅頹廢生活就人人都差不多架啦，不過作為我其中一個紅顏知己嘅kate就慘啲…

「5…4…3…2…1…新年快樂！！！！！」隨住電視入面嘅倒數聲完結，所有親戚嘅祝賀聲都此起彼落，而我亦都拎起咗個電話，打咗俾阿靜…

「嘟…嘟…你已經接駁到……」其實我都只係想親口對阿靜講句新年快樂啫…可惜連個咁簡單嘅願望都唔俾我實現。為免俾屋企人發現我有異樣，近乎絕望嘅我踏出咗屋企門口……

走咗落樓下嘅走廊…漫無目的咁行，同時打咗俾kate。

「新年快樂~」電話嘅另一端傳嚟阿kate嘅祝賀，而我依然默不作聲…



「做咩呀你？？」

「阿靜…唔肯聽我電話…我只係想親口同佢講句新年快樂都唔得呀……」呢番說話，我係帶住一把好難聽嘅喊聲講出嚟。

「唉…你又嚟……都算啦，做乜迫人新年流流強姦我隻耳仔呀屌你……」

雖然聽得出阿kate係為咗引我笑，可惜始終笑唔出…之不過，對於佢嘅一番好意，我都作出咗回應：「屌你，你咪一樣新年流流迫我聽粗口~」

「你迫我嘅！係呢，你而家係邊呀，咁靜嘅？」

「屌你，又提個靜字…」

「對唔住囉，咁你而家係邊呀？」

其實真係唔係我想咁敏感，只係呢個字就好比緊箍咒，有人提起我都會痛不欲生…



「um…算係街掛…」

「啫係係邊？」

「我而家身處係一條就快被清拆嘅屋村嘅一條長走廊到。」

「咁凍，你係咪痴線架？」

「剩係咁你就已經話我痴線，如果我話埋你知嗰環境你咪嚇死？」

「我俾你嚇大架啦，講啦。」

由於當時嘅環境比起鬼屋嘅佈置有過之而無不及，有心臟病，高血壓或孕婦等生物最好跳咗下面嗰句佢，否則發生任何意外，我只會開香檳興祝地球又唔見咗個人架啫！



「你想像下，一條就拆嘅屋村，入面超過一半嘅屋都已經係空置咗嘅，而啲街燈又因為十幾年冇換過而變得昏暗，係一條長到幾乎望唔到盡頭嘅走廊望上去，十間有九間屋係冇開燈，一間啲燈係閃下閃下嘅，再配合埋得8度嘅天氣同寒風，真係隨時有個人影出現都分分鐘嚇到你喊出嚟啦！」

係我將呢個咁陰森恐怖嘅環境完美咁描述出嚟之前，竟然換嚟一個咁嘅答案：「其實你係個咁嘅地方喊，就算鬼都怕咗你啦！而且，我要收返啱啱話你痴線呢句說話…」

「都知你唔會咁殘忍話我痴線架啦！」

「唔係呀…係因為痴線跟本形容唔到你。」

雖然我啲紅顏成日剩係識得同我（言語上）鬥嘴（當然我唔介意肉體上都鬥啦），但其實大家都係口是心非架啫。就好似阿kate咁，新年流流，雖然一直怪我係到喊衰哂佢未來一年嘅運，但就一直陪住我，直到確認我唔會去向閻王拜年先收線。