《一次無心嘅表白，竟然令到佢同咗我一齊II》: 第二章

而係我同阿靜分手之後，佢嘅一切已經成為我班紅顏如知己同我傾談時候嘅禁語。不過梗有啲仆街鍾意篤我死穴……

「啊，你知唔知呀，我今日約咗阿靜~」呢番說話，經常出現係阿靜嘅好姐妹----helena嘅口中。

「咁關我咩事，叫咗你唔好同我提起佢咯！！！！！」

「講下咋麻。你唔好話你冇用，分咗手兩個月都仲係咁！」

「你都識講啦，兩個月咋……」



「咁又係，半年後你仲記得佢係邊個先算啦，哈~」

就憑佢呢句，我相信佢身邊啲人個個唔係有間歇性失憶就係冇感情冇血性嘅生物。
雖然我同阿靜分咗手，但就唔知點解同佢位姐妹慢慢熟起上嚟。基於由細到大都係異性堆中生存嘅我，只能夠解釋為，呢條仆街又冇當過我係男仔……

至於我嗰兩位好「兄弟」，chloe同hailey，雖然係我失戀之後一直都有搵我陪我，不過初戀嘅傷口，你估真係話俾啲時間就好到架啦咩…更何況我只係一個做兵都被嫌多餘嘅生物。

係我幾經辛苦咁捱過咗聖誕同新年之後，經驗話我知仲有個終極大佬未打…冇錯呀，就係情人節呀…其實我唔明架，點解下下啲人都要好似有第二個結婚周年咁嚟興祝。明明嗰地球又唔會因為呢日叫情人節而突然轉得快咗（或者慢咗），但啲情侶竟然可以有超能令到個地球係呢日變得比太陽更光更曬。

其實我完全唔明訂定情人節條仆街係咩心態。對我嚟講呢一日簡直係將毒撚悲歌同甜蜜戀人嘅矛盾推至一個更極端嘅境界。有情人係呢日更感溫暖；毒撚就雪上加霜，呢個一石二鳥之計竟然可以做到全世界嘅人類受惠，諗得出嘅人真係高明。而發展到現代竟然仲可以俾廣告商同商家借機吸血，咁有延續性嘅計劃，真係唔係人先諗到。



呢啲咁恐怖嘅日子，作為個啱啱失戀，仲係地獄到徘徊緊嘅生物，好應該安坐家中，免受閃光彈嘅無情攻擊。當然，我係冇咁做嘅。

而且仲特登一日就出咗門口，由最近嘅青衣嘅海邊，到海輝道花園直落尖沙嘴海旁，最後再到荃灣碼頭，由頭到尾來回咁行咗次。唔識我嘅，聽完一定會話我痴線，但熟我嘅都知，我已經係連青山都唔敢收嘅生物。

經過咗幾個月非常人嘅生活之後，再難癒合嘅傷口都會開始結疤，我都由第二個sem break開始，慢慢做返個正常嘅禽獸。

係sem break嘅某一日，無所事事嘅我，係睇睇下pps嘅途中，被淘寶廣告入面，一set domo嘅擺設吸引住我嘅眼球。

禁到入去，笑一笑：「阿靜…應該會鍾意。」



由於當時我仲未了解到強大嘅google搜尋器原來係可以解答到人類99.99%嘅問題，所以我笑完之後就開始煩惱，點係淘寶買嘢……

唯一慶幸嘅，就係小弟嘅人際關係網總算唔細，係msn到問咗成個下晝，終於搵到個朋友識人可以幫我。
朋友：「乜你鍾意domo架咩？」

「唔係，想送俾人啫。」

「但係chloe唔鍾意domo架喎。啊，又係俾阿靜…你真係……」

頒個推理專家大獎俾你好冇…

「我唔否認你嘅推理。」

「呀大少，真係怕咗你，都半年啦，你仲嚟……」



我真係唔知可以應乜好：「得啦得啦，幫我問啦，thx」

呢啲咁唔耐煩嘅回應通常只係會出現係以下呢啲對話入面架啫~
「哎呀，咪成日掛住打機啦衰仔！」
「得啦呀媽。」

「哎呀，早啲瞓啦衰仔！」
「得啦呀媽。」

「哎呀，咪成日掛住玩pad唔打文啦仆街仔！」
「？！」

其實之所以會出現呢啲咁唔耐煩嘅回應，只係因為我哋習慣咗。習慣有人一直係我哋身邊提醒自己，應該做咩，唔應該做咩，將呢啲提醒視為理所當然。但我哋永遠都會忽略咗講呢啲說話嘅人，隨時都可能會離自己好遠好遠。所以當下可以做嘅，就只有將每一日都當成自己同重視嘅人所相處嘅最後一日，可能下一秒已經係永遠。