《一次無心嘅表白，竟然令到佢同咗我一齊II》: 第四章

係我聽完條問題，都未接收得切，chloe已經以0.2843秒去搶答咗：「食屎啦hailey！無啦啦擺我上枱！！」

「問下咋麻！咁激動做乜！唔通俾我講中咗？！」

「多謝先啦，呢條死咸濕仔留返俾你好啲！」

「喂喂，我講咗幾多次，唔好成日死咸濕仔咁叫我啫！我明明係個色魔，你無啦啦降我咁多級，點對得住一眾良家婦女呀，一間人哋睇少咗我嘅殺傷力而受到傷害你點負責呀？」

聽完之後，佢哋例牌咁白咗我一下眼，跟住chloe話：「hailey呀，不如我哋轉枱啦，呢到無啦啦有個痴線佬搭枱都有嘅。」



唉，我呢兩位大小姐真係好失望，識咗我咁多年都仲話我痴線。我明明就係好正常，明明同佢哋一樣，點解係要針對我啫，雖則我聰明絕頂，又口甜舌滑…口才了得先啱，鄙人才疏學淺，將就下啦，不過就算我幾多優點都好，都冇罪架！

之後都係一如既往，食完飯之後hea陣再食糖水再hea陣先返屋企。不過真係唔知係咪我心虛定多心，每次都覺得hailey有啲嘢，但又唔知點講，三人行嘅感覺話變咗質又唔係，但話同以前一樣又呃到人呃唔到阿強。

而每次出完街，都一定係我同hailey先送chloe返屋企，跟住我再送佢搭車。呢段路簡直就好似玩緊場心理攻防戰咁，兩個人每講一句嘢都要諗清楚會唔會出玩尷尬嘅成分，種心理壓力分分鐘大過啲人偷食俾人爆大獲。

當送完chloe公主安全返到佢屋企之後，hailey問：「係呢，你ok吖麻？」

「下？」



「我指你今日又走去行…」

「ok啦，傷口呢啲嘢，唔掂咪唔痛囉，哈哈~」講完之後，突然又變返冷場。

過咗陣，hailey又問：「係呢，頭先食飯問你條問題你都未答我喎！」

「點答啫，又唔會真係發生。」

「咁當啦，如果而家有女溝你呢？」



「我第一時間建議佢去驗腦！！」

「咁你就錯啦，你應該去叫嗰啲人去做全身檢查，鍾意得你嘅應該都係有絕症，想係臨死前積下福！」

唔經唔覺又已經行到去小巴站，睇住hailey上車之後，我收到個好熟口面，但又唔記得乜水嘅電話。

「阿恆…聽日得唔得閒呀？」雖然電話另一頭嘅聲音有啲哽咽，但跟據我嘅聲音識別系統，我大概認得就係當年小六嗰陣差啲就同咗我一齊嘅女仔，cindy。

當刻我諗嘅並唔係點解佢喊同點解會係搵我，而係…佢點會有我電話。

「你點知我電話架？」我都知人哋喊緊仲問啲咁嘅嘢係好仆街，不過…我的而且確係仆街嚟架麻。

「吓…？」「我問人咋麻。」

「哦，咁搵我咩事？」



「聽日得唔得閒，我想見你。」

出乎意料地，我完全冇泛起任何心甜嘅感覺，反而俾呢句說話勾起我同佢嘅過去，不禁令我百感交集。

「如果你冇搬嘅話，我而家係你樓下。」

「咁你等我15分鐘得唔得？」

「嗯。」

係等cindy嘅時候，我同佢嘅過去就好似有部投影機將啲影象投射係我眼前咁。記得當年，每日同佢返學放學都行過呢條路，雖然已經過咗好多年，但同佢嘅回憶依然好清晰咁呈現係我眼前。每日為咗可以同佢一齊返學而早成半個鐘出門口嘅日子；每日都打電話叫佢起身嘅日子；因為懶而叫佢幫我做功課嘅日子……一切一切我都深深咁刻係腦海入面。

呢個冇同我真正發展成情侶嘅女仔，我冇去估佢發生咩事，更加冇去諗點解佢要搵我，我只知道，佢依然係我會關心嘅人已經足夠。