《一次無心嘅表白，竟然令到佢同咗我一齊II》: 第三章

一個sem break話長又唔夠奧運會咁長，話短又唔夠廣告時間短，係呢啲理應一班人去宿營，旅行嘅好日子，我依然都係貫徹我痴線嘅行為，繼續行下海邊，籍住海水拍打岸邊嘅聲音，重新聽一次我同阿靜嘅故事……

望住我哋最後一次約會嘅地方，過去嘅畫面不停咁浮現係我腦海入面。

「阿恆，你話如果將來老咗依然可以一齊坐係到睇日落，你話幾好呢！」
「一定可以！」

「阿靜，如果可以，我想一世都唔離開你呀！」
「傻瓜！」



「阿恆，我之前去過個沙灘好靚架，下次一齊去吖！」
「好呀！」

熱戀嘅時候總係會向對方許下好多諾言，但當離開之後，所有承諾都退成遺憾，深深咁刻係個心入面，偶爾牽動住自己嘅情緒。

「喂，你又嚟呀，返嚟啦仆街，一沉返冇人救到你架啦！」久違嘅阿強就係我就嚟沉返入憶海嘅時候將我拉返出嚟。

「挑，諗下嘢都唔俾咩，咁你唔好講嘢啦，講嘢都要經個腦架。」

「你係真係諗下先好，咁難得冇事，你又想沉返落去呀。」



「嗱，我唔認為我冇事架，之不過，傷口呢啲嘢，只係唔掂就暫時唔痛架啫！」

「既然你咁悶，咪約hailey出嚟陪下你囉，反正嗰晚之後………」

係阿強條咸濕仔未講完之前我已經打斷咗佢：「我似係嗰啲當人水泡嘅人嚟咩！何況嗰晚乜都冇發生過，唔好講到我同佢咁曖昧呀！」

呢頭講完，嗰頭我就拎起個電話：

「嘟…嘟…」



「hailey？一間得唔得閒呀，出嚟食飯吖。」

「ok呀，咁你叫唔叫埋chloe吖？」

「咁我打俾佢啦，7點荃灣地鐵站等。」

嗱，我絕對唔係口裡說不，身體卻很誠實嗰啲人嚟架，之不過，大家話哂好兄弟，得閒出嚟食餐都要理由咩？其實人愈大，要約朋友出嚟短聚就愈難，唔係呢個要陪老婆就係嗰個要開ot。每次約親出嚟梗會有人問做咩，但係…乜想見下老朋友都要原因架咩……？或者，冇原因嘅聚會先至係友誼嘅憑證。

至於我同hailey嗰晚發生咩事？簡單啲講就係，我聖誕叫咗佢出嚟陪我飲酒，之後唔知點解會飲醉咗，又唔知點解會瞓咗係佢張床到，又唔知點解會攬住佢瞓咋麻！但事實係乜都冇發生過！

但係嗰晚之前，我同佢嘅關係總係有種講唔出嘅怪異感覺，雖然依然好似以往一樣一齊嬉笑打罵，依然成日傾電話，但…始終好似多咗道牆係我哋中間咁……

到咗夜晚，嗰兩位出名“準時”嘅大小姐竟然早過我係到等。當佢哋一見到我走埋去，佢哋就開始用我可以聽到嘅聽量講嘢：



Chloe嘴角微笑咁話：「hailey呀，不如我哋估下呢條友今日又去咗邊吖！」

「好呀，輸咗請食糖水！」

點知佢哋好似夾埋咁，同時答：「海輝道公園！」

我懷疑其實係咪我個身某個地方裝咗個gps，而個gps係顯示俾全世界睇，以前阿靜又估到我去過邊，而家兩位大小姐又估到……

我嘆一下氣之後話：「咁同時估中，啫係打和啦，冇贏冇輸，好嘢，玩完。」

點知chloe話：「唔係呀，我哋贏咗，你輸！」

吓？！

「你講錯定我聽錯？」



「總之你就輸咗，一間嗰餐糖水，多謝先啦~」

而hailey都和應chloe：「多謝阿恆~」

仆街，呢啲咁公平嘅遊戲，我有得贏咩？所以話，啲死港女真係俾人縱壞哂，咁霸權嘅嘢都做得出，恃住自己係娘娘就洗到啲兵盡哂，真係痴線。不過最痴線都係啲做兵嘅仆街，唔去縱佢又點會壞呢！古語《歌詞集，張智霖篇，你太善良節》都有云啦：「受騙的那個比騙徒更混帳。」縱容港女者比港女更喪盡天良！

所謂錯就要認，打就唔好企定。我承認chloe係我縱壞，咁唔代表我錯哂架喎！公主病得兩種特徵架啫，一係有錢，一係靚女，而又有錢又靚女嗰啲跟本本身就係公主，何來病之有呢！所以我服役多年嚟只係服從公主啫，並唔係縱壞佢！

係食緊飯嘅時候，hailey突然問咗個嚇到我幾乎將啲飯由個鼻到噴返出嚟嘅問題：

「如果chloe而家話鍾意你，你受唔受？」