對於嗰set應該已經消失郵局中嘅domo,我除咗表示遺憾都唔知可以俾咩反應好。不過為咗阿靜嘅生日禮物,我約咗一個小學同學windy出嚟陪我揀禮物。

嗱!我知你哋諗乜架,又想講:「屌,又係女。」吖麻。但你哋真係怪錯咗我啦,我已經盡量將啲女嘅數目減至最低,避免陰陽失調架啦,放過我吧。

Windy作為其中一個極少數仲有聯絡嘅小學同學,當然有佢嘅原因架啦。

「咩呀?又買嘢俾阿靜?你癲夠未呀,佢唔會同返你一齊架啦,你醒下啦。」windy係電話中講。

唔洗我講,我諗大家都明咩原因啦!



「就咁嘅,生日禮物嘅嘢,心意嚟架啫,我邊敢諗同返佢一齊。」

「你話你廢唔廢吖,又要唔敢諗同返人一齊,又要送嘢俾人!」

話雖如此,結果咪又係口裡說不,身體就出咗嚟。

其實我完全估唔到,明明係我約佢出嚟買公仔,但點解會係我陪佢睇咗3粒鐘衫。

「小姐,我好似約你出嚟陪我搵domo公仔架喎。」



「好心你咪咁執著啦,而家帶你睇下其他嘢,俾意見你咋!」

下……係咩……?

「喂,你睇下呢件靚唔靚?」「喂,呢隻色襯唔襯我呀?」「喂,呢套衫咁襯好唔好睇呀?」「喂,…………」

但最後竟然俾佢回一句絕句嚟將我秒殺。

「算啦,你啲眼光咁差,問你都哂氣!」



嘩!得呀,哂咗咁多條氣,呢啲嘢我真係何止識條春呀,我識條鐵添呀!

不過好彩,又真係係陪佢兜兜下期間,俾我係一間我都唔知應該稱呼為咩鋪頭入面見到隻差唔多有半個人咁大嘅domo。呢刻嘅我有如狗公見到女神向自己招手般,一邊流口水一邊衝埋去(又可能冇咁樣衰嘅)。

係我好興奮咁買咗隻公仔之後,我依然要承受行街睇衫之苦。呢個故事教訓,約人出街真係好睇對象同做咩,唔係只會令你陷入萬劫不復之地。當然,你唔好問點解唔約返hailey同chloe,關係上我真係好難約呢兩條友去買禮物俾我前度架喎!

返到屋企,見到msn又俾人轟炸:「佢話叫你直接打俾佢同佢聯絡。」

「ok,thx。」

我望住個鐘,12點幾唔係好夜啫……我諗。

不過,我邊有咁仆街先得架,所以只係sd咗個sms俾佢:「唔好意思呀,我係收唔到setdomo嘅人呀,幾時方便可以打俾你?」

點知9秒9都冇佢就回咗我啦:「um…我瞓啦,不如聽日我4點打俾你?」



如是者,到咗第二日4點,佢打咗俾我。

「係,你好呀,我真係到而家都未收到,咁點算?」

「er…我真係寄咗架喎…或者咁吖,我退返錢俾你吖。」

其實既然我買咗個公仔,嗰set嘢真係可以無視,但唔知點解個心總係有種覺得只要係阿靜鍾意嘅,我都想買嚟俾佢嘅感覺。

「唔係錢嘅問題…而係…我係想買嚟送俾我個ex架…」

「咁我出錢幫你訂過吖…」

「咁又唔好,寄失又唔係你錯,我黑仔啫……」所以我從來唔信男女平等,如果換轉係個男seller,仲講得出呢句嘅唔係錢多就係基嘅!



「下,咁好似對你唔係好公平喎…」

「唔緊要啦,反正我黑開架啦,哈哈~」

「係呢,我可唔可以八卦下你同你個ex嘅事??」

對於難得有人自投羅網,又多個俾我發表嘅渠道,我當然非常樂意分享架啦。於是,我又將我同阿靜所發生嘅故事一五一十咁同佢講哂。其實諗返起都幾憎自己,阿 靜唔鍾意我做嘅嘢我一直當成法律咁去遵守到今時今日,偏偏佢最憎我成日同人講我同佢嘅事呢點,我就好似吸毒咁介極都介唔甩。好似上個故咁,我又犯咗法架 啦…

「你真係好長情呀!」呢個係阿穎聽完之後嘅第一個反應。

無錯,阿穎,呢個故嘅女主角,我相信應該都係有史以嚟最遲出場嘅女主角。係我開呢三個幾鐘冇中場休息嘅talkshow入面,我除咗知佢叫阿穎之外,仲知佢只係得17歲,係個好單純(好傻)嘅小妹妹。

聽完佢嘅回應之後,我不禁笑咗下…其實分咗手半年對我嚟講真係唔算耐,何況係我世界入面,如果真係愛一個人,有一世時間都只係好短…好似我對chloe 咁,6年時間,你話耐咩?我唔覺。或者可能只係得我咁痴線,係21世界仲玩痴情,但所謂嘅愛情,唔係應該就係再多嘅磨擦都只係將彼此嘅棱角磨走,然後每一 對都磨合成「唯一」嘅天下無雙架咩?

我相信唔會有人一出世就識得玩人,但就係因為價值觀嘅改變,過往壞咗就修補返佢嘅觀念,已經演變到今日壞咗就換過佢嘅奢侈。如果當初我同阿靜嘅關係出現咗裂痕嘅時候,我同佢可以一齊修補呢條裂痕,今日會變成點?



不過我深明理想與現實呢點,同初戀同諧白首呢啲咁科幻嘅諗法,自從同阿靜分手之後,連同所有諾言都一齊被打破。我依然相信有梁祝有羅蜜歐與朱麗葉,但只會出現係科幻小說入面。

面對佢嘅回應,我只係簡單咁答咗句:「多謝。」其實我好想講,你聽埋我同chloe嘅故事先讚我都未遲。但我冇咁做,因為我知道無論我點講,都冇辦法表達我對chloe呢幾年嚟嘅愛意……

就係呢一日,足以影響我一生嘅人不知不覺咁闖入咗我嘅生命。


已有 0 人追稿