《一次無心嘅表白，竟然令到佢同咗我一齊II》: 第八章
自從同阿穎傾完一次電話之後，我哋都慢慢開始會sms講下其他話題，不過嗰陣嘅我，無論講乜都離唔開阿靜…同chloe。
身位人渣界嘅學習對象，我係將我花心嘅事實話咗俾阿穎知，而可能呢位小妹妹入世未深，唔明白人性為何物，佢係完全接受唔到我咁仆街。
「下…乜你咁都得架咩？你講嗰個chloe知唔知你咁花心架？」阿穎聽完我嗰番「偉論」之後，個世界好似俾我崩潰咗咁，意圖垂死掙扎，想我否定呢件事。
「佢識我第一年已經知。不過花唔花心真係咁重要咩？啲死港女講到懶清高咁一心一意，迷啲泡菜仔咪又係迷到乜水都流哂出嚟！搶佔道德高地就係人都識架啦，分別在於呢班人大把都其身不正，一時唔偷雞就做保長咁雞咋麻！」
「嘩，乜你講個係人都咁衰咁架…我識嗰啲都唔係嘅…」未自過世面嘅小妹妹依然唔相信我所謂嘅社會現實。
「我係眼中，呢個世界所有生物都係仆街，分別只係在於被開發與否同程度之別。我又冇女，點解唔可以花心？就算我係世紀賤男都總比嗰啲掛住個君子面具嚟食女嘅撚樣好啦！再者，迷韓星迷到上哂腦嘅死港女唔通思想上真係冇出軌？點解我花心，就有問題，迷韓星嘅花痴就肯定係抱住迷偶像嘅心態先？」我其實冇扯火架，只係討論得比較激烈啫！
「我唔知應你咩好……」
「算啦，唔好講呢樣。講樣你更加估唔到嘅嘢你聽啦~曾經，chloe係講過一句說話令我堅信我嘅花心錯唔哂。」
呢句係轉述chloe嘅原句：「我真係唔明點解你可以花心得嚟又對我哋每一個都咁好。」
我唔敢講我對佢哋好好，但至少無論任何一個任何時候有問題，我都「I'm ready I'm ready.」而同阿靜拍拖嘅時候，我亦都冇再去諗chloe，好定唔好，我只可以將所有對我嘅評價留返俾我重視過嘅每一個人嚟定奪，但至少為求令佢哋開心，我盡咗力。
而chloe一句簡單嘅心底話，已經令我覺得做算做咗咁多年兵，其實都好幸福。
「可能佢就係因為你咁花心先唔同你一齊咋！」
我突然感受到萬箭穿心有咩感覺……
「挑，你話呀，佢係嫌我毒矮柒肥樣樣齊，驚拖住我出街俾人以為佢拖住個弱能人士先唔受我咋。」嗱，我冇曲線踩啲弱能人士架，明肛社唔好又搶道德高地呀。
「咁又唔好講到嗰個女仔都睇樣咁，你個ex咪又係同咗你一齊~」
吖，我屌…呢句係踩我定安慰緊我…
「所以我一直認為佢當時應該係撞親個腦，或者隻眼有嚴重近視，後期醫返好所以飛咗我。」
「咁係你識啲女仔嘅問題啫！我都唔睇樣架！」
個個女仔都唔睇樣架，只係唔知點解又會咁啱見到個男仔個樣冇嗰種男朋友嘅feel咋麻，咁啱對嗰啲相貌平凡嘅男人冇feel咋麻，絕對冇睇樣架！正如其實好多人去到夜總會，帶埋啲女出街，上埋酒店房都係純粹談心架啫，絕對唔係叫雞架！
面對阿穎呢啲完全漠視良心嘅答案，只有一笑置之。
不知不覺間，又到6月尾，仲有兩個星期左右就係chloe生日，亦都係我最悲哀嘅日子。
「今年又送啲咩俾chloe好呀……」電話另一頭嘅hailey近乎無視我嘅狀態，一邊食薯片，一邊睇劇。
「喂喂，幫手度度啦大佬！！」
「唓，你年年都剩係識送公仔架啦，除咗史迪仔，你識送咩吖！」
「有！將自己綁個蝴蝶結之後當禮物送俾佢！」語畢，hailey係另一頭完全靜哂。我已經可以完全想像到佢白完一下眼之後繼續若無其事咁睇劇，實行膠都費事派俾我。
「不如咁啦，你買咩，我夾一半算啦！」
「你上年已經咁講架啦，仲有成兩星期，咁急做乜啫，到時你都未諗到先咁做啦，唔係一間你後悔我都唔會俾返錢你架！」
不過就係chloe生日前幾日，發生咗段小插曲。
話說嗰晚，我同chloe如常咁傾電話。唔知大家有冇試過，每當到夜晚，個人就特別多愁善感，乜嘢寂寞失落通通出哂嚟。
係同chloe傾傾下電話期間，我提起阿靜。
「如果而家仲同緊佢一齊，你話幾好呢…」我望住漆黑嘅夜空，不自覺諗返起曾經就係呢張床上面，攬住阿靜，望住同一片天。
「車，你嗰時冇同到佢一齊咪乜事都冇囉！」
Chloe嘅說話一瞬間將我嘅憤恨集結埋一齊：「係呀，我唔同佢一齊咪冇事囉。如果唔係因為你，我點會同佢一齊呀？我就係想證明俾你條死港女睇我係會有人鍾意咋！！！！！！！！」
隨住我嘅話音一落，連空氣都好似靜止咗咁。
冷靜落嚟次後，我發現我頭先嘅橫蠻無理攪到而家形成咗個收唔到科嘅局面。而家彷彿邊個開聲先，嗰個就輸咗咁。
而係隔咗唔知幾耐，chloe首先打破沉默：「sorry呀…」
嘩！唔知太陽聽日會唔會係西邊升起呢？面對住一句咁估唔到嘅答覆，我突然唔識俾反應，直頭好似lag機一樣，所以我係冇應到機。
「喂！？」chloe繼續叫我。
我唔係唔想應，只係我突然間乜都反應唔切啫。試諗下，呢頭好唔理性咁去鬧完一個自己迷戀咗咁多年嘅女神，佢竟然冇趕我出軍營，仲同我講sorry，咁嘅環境，美國中情局嘅超級電腦都會lag機啦！
「嗯…」
之後繼續沉默…
過多陣，chloe話：「我瞓啦，你都早啲瞓啦，拜。」
「嗯…」
直到佢生日嗰日之前，我哋都冇搵大家。
而就係chloe大小姐生日正日，我原本以為chloe同hailey過就得，點知hailey打俾我。
「喂，你嚟唔嚟架！」開聲嘅係chloe。
「咁你想唔想我嚟吖？」
「我而家問你呀，你過唔過嚟呀！」
「咁你想唔想我嚟先得架！」
以上對話大概loop咗3分鐘至30分鐘左右，途中有好幾次我心甜到唔識接落去。可能我覺得，可以陪佢過正日生日嘅人，其實算係一種身份嘅肯定，總好過佢生日，永遠都唔關我事吖……
終於，我把口敵唔過我嘅身體，我出咗去。