《一次無心嘅表白，竟然令到佢同咗我一齊II》: 第十章

第十章

一時之間反應唔切佢嘅答案嘅我，結果帶咗佢去一個同任何人出街都絕對係最有利嘅地方----書店。真係無論三歲定八十，男女老幼，識嘅唔熟嘅都唔洗擔心冇話題，因為入到書店之後，啲氣氛已經令你被收聲。

雖然好想可以同佢多啲交流，但望住佢一入到書局就走咗去英文書嗰邊，自覺我同佢之間有好大條鴻溝，唯有自己死返去中文文盲嘅禁地。

係我行到差不多盡頭嘅時候，見到有本李天命的唔知咩藝術，初頭以為個算命佬轉咗行做藝術家，點知睇睇下見到連隻龜都唔見，再望一望個書櫃櫃寫住哲學類，我恍然大悟。難怪啲風水命理咁抽象，任你講乜都得啦，原來有哲學根基係到有見及此，我相信柏拉圖呀，阿里士多德之類嘅哲學家一定測風水命理嘅高手。

不過係我連點可以入行做一個（呃）風水命理嘅大師嘅一章都未睇到嘅時候，阿穎突然出現係我隔離：「咦，你睇緊啲咩呀？」



「好似係個風水師用哲學教你煮餸。」

「吓！？咁得意，得架咩？我又睇！」跟據我識咗佢個幾月嘅關係，我相信佢真係唔係扮傻，佢跟本就係醫返都哂藥費。

「得架！嗱，你而家走去個收銀到念魔咒，念完就可以得到李天命教煮餸嘅名額一個 。」阿穎聽完之後，彷彿先開始明白，我一開始講本書嘅時候已經係玩佢。

當阿穎察覺到自己俾我整蠱之後，即刻雙手遮住塊面，不過我睇得出，佢傻笑得好開心。

望住阿穎嘅舉動，我都不禁笑起上嚟：「唉，救命，你返火星啦，地球好危險架！」



「衰人！衰人！衰人……」阿穎邊講邊拍打我。

突然間，一種好熟悉嘅感覺浮現係我腦海入面…

「衰人！成日蝦我！」每次同阿靜玩完之後，佢實會搶咗個受害者嘅角色嚟做。

「邊有蝦你啫！明明就係你蝦我！」而我係俾人咬完，「吱」完仲要做埋罪人。

阿靜…我…突然好想俾你咬返啖……



「喂喂？」

我回神望向阿穎，苦笑咗下：「我諗起，以前阿靜都好鍾意叫我做衰人。」

「er…sorry…」

「傻啦，啊，不如去食嘢啦~」

「好呀。」

不過對又一城稍為有啲認知嘅人應該都知道除咗個food court 之外，其實係冇嘢好食（實情係都唔見得個foodcourt有嘢好食）。

係食緊飯嘅時候，我收到阿kate一條令我哭笑不得嘅sms：「喂，你聽日生日，我特登請咗假陪你興祝呀，你冇約人架可？」

我望一望個日曆，之後伏咗係枱到鳩笑咗好耐，直到阿穎差啲call青山我先收斂下。



阿穎：「做咩無啦啦笑到咁？」

我將條sms俾咗阿穎睇。

阿穎一臉驚訝咁問：「原來你聽日生日呀？」

阿穎講完我又繼續笑…

阿穎：「做咩啫，有人陪你過生日咋麻，洗唔洗笑成咁？」

「問題係…佢記錯咗我生日呢……」一邊講，我繼續一邊笑到收唔到聲。

「吓？！」



「係呀，大大話話都識咗咁多年，咁都記錯得，真係好過份囉！」我依然忍唔到笑…

「咁你幾多號生日架？」

「佢請早咗一日。」

「咁都唔係好過份啫！」

我大概笑咗半粒鐘，直到斷氣咁滯先肯收聲。

當我將記錯日子呢啲咁殘忍嘅事實sd咗俾阿kate之後，佢打咗俾我：

「你講笑咋？」

「唔係咧小姐，你真係柒咗！」



「哼，咁算囉，我消假返工囉！」

「年輕人，咁你又唔好咁衝動，你一番美意，邊捨得咁對你~」

為免唔會冷落我面前嗰位小妹妹，只好忍痛收線。

阿穎：「咁你生日點慶祝架？」

仆街啦…我十幾年嚟嘅生日，除咗上年叫特別啲，俾人強吻之外，真係冇興祝過喎…

「冇興祝過！生日呢啲嘢，有幾咁特別啫，個地球又唔會因為我而轉慢啲，個世界又唔會圍住我而轉，一起身都係嗰個太陽，嗰個天，有乜好興祝！」我用咗0.8346秒去度咗個咁冠冕堂皇嘅理由去掩飾冇人陪我過生日呢啲咁悲哀嘅過去。

「咁今年咪有得興祝下囉~」



我又俾阿穎嘅單純天真秒殺咗……