經過上年係海洋公園做咗成日私人物品管理員嘅我,為咗阻止上年自己嘅悲劇發生,於是用咗九萬幾個理由(分別係冇錢啦,冇銀啦,冇金啦,再用各國語言唔同鄉音嚟表達)。而chloe可能礙於幾日前嘅事,所以佢都冇異議,結果…我哋三個同平日一樣,係條街唔知俾乜咁就過咗。

但生日蛋糕呢啲例牌嘢,我點會唔記得吖,我趁chloe同hailey去咗廁所,用咗9.99秒嘅速度飛咗去間麵包鋪到,買咗個蛋糕。就係chloe行出嚟嘅時候,我點起蛋糕上嘅蠟燭,一邊行近佢一邊用我美妙絕倫,繞梁三日嘅相反嘅聲線去唱生日歌。

望住chloe笑到肌肉抽筋咁款,我覺得我個蛋糕買得非常值得。

就係我唱完嘅一刻,chloe笑住咁話:「仆你個街,紙包蛋糕嚟嘅!」

係呀,係紙包蛋糕呀,有問題咩?!而且,我唱歌嘅地點,正正係chloe屋企附近,我相信佢未來一個月都應該唔洗出街見人。



「咩啫,健康呀,你話減肥架麻,cream又冇,朱古力又冇,又細份,呢個蛋糕直頭為你度身訂造架啦!」

你哋唔好以為呢part只係玩佢,其實已經準備咗個真蛋糕呀。直到嗰晚送埋佢返屋企,佢全日所收到嘅禮物都只係價值4蚊嘅紙包蛋糕。我對chloe嘅愛,大家真係有目共睹架啦,為咗可以令佢有個畢生難忘跑生日,我攪盡腦汁,用盡心血先諗呢個咁絕妙嘅計劃,諗返都不禁想讚自己絕頂聰明。

就係chloe生日後兩日,阿穎幫我再訂過嘅domo亦都到咗,不過因為佢又要補課,而我嘅booking 又排到2046,所以好難約出嚟交收。

經過無數次嘅改期,終於約咗係8月6日。

其實到呢一刻為止,呢個小妹妹對我嚟講都不過係個脅持住我份禮物嘅生物。不過在於天下男兒皆咸濕嘅理論嚟講,點會冇幻想過佢咩樣吖。



而每逢講親女呢樣嘢,熱衷於呢個話題嘅阿強都會興奮到7孔流精。人哋未出發先興奮,但阿強未見面都已經精盡人亡…

阿強:「屌你點解唔叫條女俾張相你睇啫!」

「我做乜要睇佢張相呢?」

「女呢啲嘢,識多個冇壞架麻!」

「你唔俾人哋係侏羅紀穿越時空架?」



「咁可能人哋樣靚腰幼腳長身材正呢!!」阿強愈講,個樣就愈淫賤,直頭已經係去到用個腦去強姦緊個幻想出哂嘅生物咁。

「第一,影相嘅嘢,你唔係信呀!?第二,有都唔到你食啦仆街。」

雖則阿強啲思維真係好唔要得,小妹妹都唔放過(我唔否認小妹妹嘅價值較高),但講真,對一個未知嘅生物,係人都好奇架啦,只不過唔同人好奇點唔同啫。

當時我係到諗:如果佢係個靚女都幾好喎~如果靚女得嚟又帶種傲嬌嘅感覺,咁就真係完美啦(to me you are perfect)!

到咗8月6日,我為咗阿靜嘅生日禮物真係作出咗好大犧牲,足足推咗46個學生妹,72個model,由此可見我真係幾愛阿靜呢!

回歸正題,由於我哋約咗係九龍塘站到交收,而個站又出名多人嘅關係,我跟本冇辦法靠推理去估邊個係阿穎。係呀,我係咁無聊架啦,唔通真係傻下傻下咁企定定等人咩,唔用下腦啲時間點過!

等咗陣,阿穎終於打電話嚟。

「hello,我到咗啦,著白色衫架,你呢?」



聽完之後我即時掃視方圓幾百厘米嘅範圍,俾我見到有個女仔個樣傻下傻下咁周圍望,直覺話我知係佢。

我慢慢走向佢嘅方向,一邊同佢講:「唔好再周圍望啦,你個樣好傻呀~」

而佢亦都好似已經發現到我一樣,話:「哼,明明到咗都要特登唔出現,係到笑人!」

走到佢面前嘅時候,佢遞起手上袋嘢:「嗱,你嘅寶貝呀!」

我呆咗三秒,跟住個頭不自覺咁向下望咁望:「仲係到呀~」

唔知阿穎係真痴定假呆,佢竟然好似聽唔明我講乜咁:「咩呀,咪呢件囉。」

俾佢嘅單純打沉嘅我只有一臉無奈咁接過佢手上袋嘢。而我同佢嘅關係,原本應該就呢一刻開始就結束,但偏偏,緣份令到我同佢開展咗一段科幻嘅故事。



係交收完之後,我哋理應各行各路,但由於我作為一隻正常嘅雄性生物,面對住一個不單止有幾分姿色,仲要純過蒸餾水嘅生物,我嘅大腦中樞神經跳過哂所有成敗得失嘅計算,直接控制咗我講咗句:「反正出到嚟,不如一齊行陣吖。」

「ok吖,反正我溫書都溫到好攰!」我得到個完全估唔到嘅答案。
已有 0 人追稿