Ch 1 ~ 中五那年的數學堂 Part 2(連載日期:2021/09/02)

再過多兩分鐘,全級考第二嘅林俊軒同學都返到班房......

「俊軒!你返到黎就好啦,拿拿聲幫幫大家手,Maths功課完全搞唔掂呀!」俊軒同樣未坐低,剩低仲未做完第一堂就要交功課嘅幾個deadline fighters,都急急腳走黎問佢借功課”參考“,以求準時可以交到功課,唔使俾人罰留堂。

「唉,真係冇你地收呀,等我一陣先啦......」俊軒嘆氣道,然後由書包拎出自己本Maths簿「唔該你地呀,抄都抄得醒目少少呀,我唔想一陣間Mr Ho捉到,然後大家齊齊畀人記缺點同罰留堂呀!」

「知道!」班deadline fighter於是就即刻拎咗俊軒份功課去抄。「真係冇你地班友乎呀!」俊軒再自我嘆氣道。



五分鐘後,「叮咚、叮咚、…」學校嘅鐘聲徐徐響起,除左代表住每日課堂嘅開始之外,同時都代表住交呢份數學功課嘅死綫都到了。然而,因爲得到韻喬同俊軒兩大學霸嘅幫助,大家都可以準時妥當咁交到今日份功課。
 
再過兩分鐘,教5A數學嘅魔人Mr Ho到達班房。一入門口就用佢把老牛聲叫同學「麻煩大家傳份功課出去第一排嘅同學度!」同學們於是就將功課傳去前面,然後由Mr Ho收集。

Mr Ho見到大家都有交齊功課表示非常滿意,於是點頭道「大家都好乖呀,準時交功課,希望大家去到DSE之前,都要keep住呢團火啊!」

但其實喺班同學嘅心裏面,已經有幾百萬隻草泥馬喺大草原上奔騰。
 
收好功課之後,Mr Ho決定趁大家未訓醒嘅情況下,對5A投下一個TNT級嘅震撼彈...



「各位同學!話説中秋節都就快到啦可,所以Mr Ho我今次做個好人,決定送一份禮物畀大家!」

「咩禮物咁有heart啊Mr Ho?一人一個月餅?」班會主席趙建龍道。

「阿趙同學!月餅食得太多嘅話對身體唔好呀!而且我又唔係出面嗰啲咩月餅炒家,點會有重貨月餅賣大包呢?你真係當阿sir我係正職走水貨兼職教書啦喎?!」但一眾同學聽到之後,完全笑唔出,班房内嘅氣壓更突然變得沉重。

「哈哈,為咗大家將來嘅中秋節幸福快樂,所以我決定下個禮拜送個最為興奮嘅禮物畀大家,就係噔噔噔噔:QUIZ。時間就係下個禮拜二!」

「到時候派卷之後,邊個唔合格嘅話,放學就自動波去402室留堂做數啦!」Mr Ho説罷,班上隨即颳起一陣兵荒馬亂。
 


「下!又quiz啊!?」「有冇搞錯呀!呢啲咩禮物黎咖!」「又quiz!?使唔使咁密啊?想做死我地咩!!」「唉,又要準備留堂啦,真心so9sad!」「一啲都唔興奮囉!」
 
聽到一陣抱怨聲嘅Mr Ho終於忍唔住回應「其實呢,如果平時大家上堂嘅時候都專心啲,放學喺屋企做多啲題目就得咖啦。如果大家都做得有合格嘅話,怕咩要放學留堂呢?」
 
其實呢間學校每日都有固定嘅功課留堂班,基本上都係作為懲罰欠交功課同學嘅一種手段。

留堂班裏面會有老師點名。同學如果去留堂班去得太多嘅話,會對該學年嘅操行分有一定嘅負面影響,所以對於留堂,大家平時都係可免則免。
 
而自Form 4開學以黎,一直坐喺韻喬旁邊嘅李天殷同學,聽到Mr Ho所送上所謂嘅中秋節禮物之後,突然一臉誠懇咁同韻喬講「天才喬!依家得你先可以救我咖啦!你今次一定一定要幫我啊喬喬!」

到底,天殷想韻喬點樣幫佢呢?

(待續~)

IG link https://instagram.com/bear_big_big_writer
已有 0 人追稿