Ch 5 ~ 張韻喬同學,請你幫一幫忙吧(上) Part 3(連載日期:2021/10/02)

(雙平台一萬點擊加更,多謝大家一直支持)

「媽,其實我已經有….女朋…..友咖啦!」「咩話?小軒你再講多次?」

「我話我已經有女朋友啦媽媽」
 
林太聽畢,即刻猶疑咗兩秒,因為自己可以畀俊軒瞞咗咁耐,一直唔知個仔其實有拍拖。



但喺商界打滾多年、同林生一齊見過、經歷過唔少風浪嘅林太,都唔係一盞省油的燈,於是就問「小軒,你確定你冇同我講大話?」
 
「媽媽我係認真,我……我真係已經有女朋友咖啦」俊軒都冇辦法,講左個大話就一定要繼續落去,如果唔係最後自己穿煲嘅話,一定必死無疑。

「咁好啦小軒。姑且呢一刻我就信住你先」但其實林太都仲係唔相信俊軒,於是同俊軒講話

「不過,你要喺今個星期之內,我要你帶你女朋友返黎屋企,同我地食一餐晚飯,你做到嘅話,我就會相信你。」

「而媽媽都會應承你,以後唔會再逼你去出席嗰啲單身party,作為交換條件...」



「但係,如果畀我知道你講大話,呃我同你爸爸嘅話,你自己以後就好自為之!」林太施展出縱橫商場先會用到嘅氣場,基本上已經將俊軒嚇到震哂。

俊軒聽完之後,心裏面固然非常不安,因為林太要自己拎出,自己已經有女朋友嘅證明。

但做戲都要做足全套,唯有強作鎮定同林太講「好呀,你話咖。」
 
説畢,林太離開大廳,而俊軒都返房做自己嘢,同時都開始盤算要點樣呃林太。當然林太都......

不過呢,呢個大話俊軒實在講得太大啦,俊軒都覺得自己一個未必搞得掂,於是唯有去Signal同好朋友求救。
 


俊軒第一個諗到嘅,唔使講都知道係禮謙「喂謙謙,十萬火急十萬火急,今次要你cover我,認真……」所以俊軒第一時間就打電話搵呢個死黨出手相救。
 
不過,禮謙當時並冇聽電話,所以俊軒只係將上面嘅説話,留咗去留言信箱。

隔左5分鐘之後,禮謙就call返俊軒,第一句就話「軒軒,你冷靜少少先啦。你慢慢話我知,頭先到底發生咩事,所以要即刻打電話畀我?」。
 
於是俊軒就喺電話度,將頭先嘅事話返畀禮謙知道「頭先呀,我阿媽又逼我去咩相睇party。咁自己又唔想去,於是我呃咗我阿媽,話我依家有女朋友!」

「嘩,你連伯母都敢呃呀?咁跟住呢?」

「然後佢應該都唔信我,於是叫我喺呢個禮拜内,帶個女朋友返屋企食飯,今次…..唉」
 
「嘩,情聖,搵個女同學同你一齊上你屋企食飯,對你黎講簡直easy job啦呢啲,你呀,唔係已經有哂全級女同學嘅電話嘅?」

「咁你咪求其去你個”後宮“資料庫度,搵一個順你眼,你又有少少鍾意嘅咪得囉!」禮謙好快就幫俊軒搵到一個非常好嘅解決辦法。


 
不過,俊軒聽到之後就好大反應話「妖,我都話過我平時我冇好似張韻喬同學所講咁四圍溝女囉!點解你係都唔信我講呢?」

「而且我都係得閒同佢地傾下計、食下飯咋嘛,我又唔係真係同佢地想發展落去,無厘頭又會有邊個肯上黎先得咖?」
 
「咪住先,到底你做咩要同林auntie講大話,呃佢你有女朋友呢?你唔想去咪直接同伯母講呀嘛?我記得佢應該都好開明咖喎」禮謙反問俊軒。
 
唔想面對嘅俊軒,於是就繼續描述佢眼前嘅難題畀死黨知道......

「唉,佢話我爸爸年紀都開始大,但係我到依家又未有拖拍,屋企又得我一個單傳,怕屋企後繼無人喎,所以佢一直耐唔耐就要我去啲單身party相睇….」
 
「哈哈!睇唔出你啊嗎咁鼓勵你拍拖喎,好多啊媽唔係一聽到仔女出去拍拖,就即刻好似打鑼打鼓咁,又要問三問四咖咩?」

「咁你去完嗰啲party之後又有咩feel呀?分享分享都好呀?」禮謙擺明又想食花生。



(待續 ~)

IG link https://instagram.com/bear_big_big_writer
已有 0 人追稿