《愛在。貴族學園》: Ch 5 ~ 張韻喬同學，請你幫一幫忙吧（上） Part 2

Ch 5 ~ 張韻喬同學，請你幫一幫忙吧（上） Part 2（連載日期：2021/09/30）

林太send畀俊軒嘅訊息，内容係咁嘅

「媽：小軒，放學後即刻同我返屋企，唔好留喺學校，或者叫司機車你去第二度玩。見字請覆。      12:05」
 
“唉，今次又有咩事啊？我阿媽次次喺我上緊堂嘅時候，講親呢句之後，永遠都冇好嘢嘅…..”俊軒喺心裏面同自己講，同一時間喺位裏面倒抽一口涼氣。

不過喺心中千萬個不願意嘅同時，俊軒已經打咗個「喔」字比林太。





就算過埋之後嘅午飯時間，同埋下晝嘅課堂，俊軒都冇再諗太多，到底一陣間返到屋企之後會發生咩事。

直到放學嘅時候，當俊軒去完locker放低書，然後行出校門之後，林家嘅司機已經喺度等緊俊軒。

當俊軒上車安坐，司機就直接將座駕，開返喺灣仔半山嘅林家大宅。

喺路上，俊軒完全冇出聲，但心裏面嘅不安感覺，就越來越強烈。

而喺返到大宅之後，俊軒第一時間跑到大宅大門，而吩咐自己早啲返屋企嘅林太，就已經坐咗喺大廳裏面，一邊飲茶一邊等緊俊軒。
 




「二少爺，歡迎返黎。」譚管家見到俊軒返到屋企就恭候佢。

俊軒都係一個有禮貌嘅人，於是回應「多謝譚管家。」
 
譚管家報以微笑，續道「二少爺，夫人已經喺大廳等緊你，而且夫人頭先已經吩咐過我，要我喺你返到黎嘅時候，叫你直接過去搵夫人先。」「好嘅，唔該…..」

其實俊軒都知道媽媽每次急call佢返屋企嘅話，通常都係有啲事，但俊軒萬萬冇諗過林太會咁早返屋企。「媽，你咁早返黎嘅？公司啲嘢你搞掂哂啦？」
 
「哦，小軒你返黎啦？依家識得主動關心下屋企嘅事啦喎，真係乖啦」林太稱讚俊軒道





「公司啲嘢呢，其實有咁多人幫我地睇住，都叫做還好啦，你就少擔心啦。」

「不過呢，依家有樣嘢就真係比公司嘅業務更重要，而且更加要令我擔心…..」
 
「比起公司嘅嘢更加令你擔心？咁到底發生咩事？…..」俊軒初時都好奇咁問，但後來開始就越來越不安。

林太於是二話不説，就喺手袋裏面，拎左一張城中某著名媒人搞嘅相睇party傳單，然後交到俊軒手上，再同俊軒講「媽媽我呢，想你去參加呢個活動……」

俊軒見到後，面上流露出一個十萬個不願意嘅表情，同林太講

「媽媽啊，我真係唔想再去呢類單身party呀，裏面都冇同我年紀相近嘅女仔，就算我入到去都搵唔到對象嘅？媽媽呀，我唔去得唔得呀？」

「唔得！」林太斬釘截鐵咁講，而且嘗試勸解俊軒「你要知道一樣嘢呀小軒，你係我地林家唯一嘅男丁。」

「如果小軒你唔去，再認識唔到女朋友嘅話，恐怕我地林家將來就要絕後啦！」




 
「媽媽呀，我依家先至Form 5上學期咋！你依家講到繼後香燈嘅話題，會唔會諗得太長遠左、走得太前呢？」俊軒非常無奈咁回應

「而且，我之後仲要考DSE同大學咖，如果最後我兩樣都做唔到嘅話，到時候就真係搵鬼要我，唔絕後都唔得囉！」
 
「小軒，其實依家開始有對象，都已經唔快咖啦，畢竟喺結婚之前，兩個人之間都要好長時間相處」林太上前輕輕同俊軒講...

「同時睇清楚到底對方係真心，定係只不過係貪我地林家嘅錢，所以先會同你一齊」

「而且，你啊爸年紀都已經唔細咖啦，如果依家開始嘅話，時間都差唔多咖啦。」
 
「但係….」俊軒試圖向林太解釋佢立場「party入面嘅人，其實好多都係姐姐甚至auntie，都完全唔係fit for我呢個年紀咖！」

「媽媽，如果真係要揀，就一定要揀最高質，同埋都要我自己鍾意先得咖。」





「而且，你要記住我一對就要對成世咖！點可以就去個party，然後見到一個覺得順眼嘅話，就話要一齊一世咁兒戲咖？」

「我想親自去尋找自己幸福啊！我唔想將來個老婆都要畀人安排啊！」

「ok，小軒你同我停！」林太見俊軒愈黎愈激動，於是都出口制止佢繼續講落去。

「嗱，咁媽媽好認真咁問你，你唔好同我講大話，你知我都識你部分同學嘅屋企人咖啦。我問你，到底你依家有冇拍拖？」
 
面對林太突如其來嘅問題，俊軒嘅表情由憤怒變得不安。大家都知道俊軒嘅條件其實都唔差，要喺學校搵女朋友嘅話，根本就唔成問題。

問題只係在於，自己（應該）鍾意嗰個連電話號碼都仲未拎到，仲話要對方做自己女朋友？
 
但到咗呢個咁重要嘅時刻，為咗令到自己可以唔去呢個party，俊軒於是決定同林太對賭，講一次大話。

但係呢一個大話，俊軒之後再諗返起，自然都會覺得係值得，而且，都係佢人生之中，最重要嘅一個決定……





（待續 ~）

IG link https://instagram.com/bear_big_big_writer